Dodadi 17 - O GIKIMOI AWI JAJI ma BUKU

O jaji ma nonako o Abrahamka gena womasuna

¹ Ma orasi o taungu mogiowo de saange ipasaka, so o Abram awi umuru o taungu morisiwo de siwoka, kagena de o Jou womasimane unaka, de wotemo, “Ngohi manena o Gikimoi Wilalamo, so bilasu o moi-moi naakaka imatero Ngohi dede ngona pomarimoika ma ngale ani sininga asa foloi itiai Ngohika.

² Kanaga ngonaka gena Ngohi Ai jaji idomaka asa tosiganapu. Komagena so Ngohi tonihike ngonaka ani ngopa de ani dano sidago lo ani galaweweku gena foloisi yadala.”

³ Kagena de o Abram wobukuku wosuba de o Gikimoi wotemo kali,

^4-5 “Ngohi manena gena tonijaji ngonaka, igogou ngona magena asa nodadi o bi bangsa yadadala manga ete de manga topora. Ma ngale de ma ngeko komagena so o orasi manena ani ronga gena upa he o Abram, ma ngale o baba wihohoromati, duma tatagali imadadi o Abraham, gena ma ngale yadadala manga baba ma duhutu.

⁶ Ngohi asa tonihike ngonaka ani ngopa de ani dano yadala icarawa so ona magena lo asa imadadi o bi bangsa o dunia ma dokuka, de to ona manga sidongirabano ma binuka lo done asa idadi kolano.

⁷ De Ngohi manena gena todadi to ngini nia Gikimoi de to Ngohi Ai jaji magena asa tacoho tagogou dede ngona, de komagena lo ani ngopa de ani danoka gena itagi gila-gila ka sidutu ikakali.

⁸ Ngohi asa o Kanaan ma tona manena tinihike nginika, o tona magena kiaka o orasi manena ngona masirete nodogogeka, so koloko o nyawa itatagino. O tona gena dangodu idadi to ngona ani ngopa de ani dano manga pusaka ka sidutu ikakali, de Ngohi asa todadi to ona manga Gikimoi.

⁹ Nako ngona gena, bai ngona masirete, de lo ani ngopa de ani dano sidago lo ani galaweweku bilasu nanga jaji manena niacoho nikaeli de moiwa aku yafati.

^10-11 De maro to ngone nanga jaji ma nonako moi Ngohi dede nginika gena, ngini yanau ningodu bilasu nimasuna.

¹² O orasi kangano manena de isolano ngona ani ngopa yanau asa isibubuoku la nakoso manga umuru o wange tupaange gena bilasu imasuna. Komagena lo bilasu nasuna to ngona ani gilalo yanau ani tahuka imomanara, bai ona isibubuo ani tahuka bai lo ona naijaka.

¹³ Ngini moi-moi gena bilasu nimasuna kasi, la magena aku idadi nia nonako moi nia roheka de isidumu gena igogou Ai jaji magena ikakali.

¹⁴ O nyawa yanau moi la woholu womasuna, komagena lo kanaga woholu womasigocoho to Ngohi Ai jajika, de una magena to Ngohi Ai nyawa manga gegetoka gena wowosawa.

¹⁵ Ngona kanena de isikahika ani pedeka gena he upa nomisiaso ongo Sarai, duma isolano o wange manena ami ronga gena ongo Sara (gena ma ngale o kolano ma ngopa).

¹⁶ Muna magena to Ngohi Ai laha asa tomisidumu so igogou done asa mosibuo o ngopa yanau moi. La muna asa modadi o bi bangsa manga ede de manga topora, de lo ami ngopa de ami danoku ma binuka lo done asa idadi o kolano. Komagena.”

¹⁷ So kagena de o Abraham wobukuku de wosuba, duma awi sininga ma rabaka idohe de lo itemo, “Ce! Ngohi topiricayawa maro ngohi ai umuru he o taungu ratu moi de bilasu o ngopa ka tamakesi. De lo topiricayawa ongo Sara ami umuru o taungu morisiwoka de aku ka mopuosi.”

¹⁸ So una wotemo o Gikimoika, “Daloha ilaku de o Ismael bato wodadi to ngohi ai warisi ma jojoho de wakokuasa.”

¹⁹ Duma o Gikimoi gena unaka wotemo, “Upa komagena. Ani pedeka ongo Sara done asa o ngopa yanau moi mowisibuo de ngona asa nowisironga o Ishak. Ngohi Ai jaji tacoho tagogou dede ani ngopa una magena de lo to una awi ngopa de awi danoku gena ma bati sidutu ikakali, la ma ngale Ngohi manena gena asa todadi to una awi Gikimoi.

²⁰ Nako to ngona ani gogolo ma ngale ani ngopa o Ismael gena, Ngohi tosimote daloha. So igogou una lo done Ai laha towisidumu de towihike awi ngopa de awi dano gena ka yadala. De done taaka la to una awi ngopa de awi danoku manga sidongirabano yamogiowo de sinoto asa ikolano, sidago lo ona idadi o bangsa ilalamo moi.

²¹ Duma imaterowa de to Ngohi Ai jaji ani ngopa o Ishakka, gena igogou tacoho so una magena o taungu ma simaka, de ma orasi maro komanena de done asa ongo Sara mowisibuo.” (Nako o bahasa Ibrani ma demo “Ishak” gena ma beto he imatero de o demo moi de ma ngale gena wodohe.)

²² So o bi moi-moi magena wosibicara dabolo o Abrahamka, de o Gikimoi woliho so womasisaka.

²³ Ma ngale o Abraham o Gikimoi Awi demo gena wodupa wosigise, so o wange magena dabolo de ma ngopa o Ismael gena wisunaka. Komagena lo wasuna ona yanau yangodu awi tahu ma rabaka, ena gena to una awi gilalo yanau awi tahu ma rabaka imomanara, bai ona yasibubuo awi tahuka bai lo ona waiijaka.

^24-27 So ona magena yangodu imakangaho yasuna ka o wange moi. Ma orasi magena o Abraham awi umuru he o taungu morisiwo de siwoka, de ma ngopa o Ismael gena awi umuru he o taungu mogiowo de saangeka.