Dodadi 16 - O GIKIMOI AWI JAJI ma BUKU

Ongo Hagar de ma ngopa Ismael manga jarita

¹ O Abram ma pedeka ongo Sarai gena ami ngopa ihiwasi. Duma muna ami gilalo moleleleani moi o Mesir ma nyawa ami ronga gena ongo Hagar.

² So ongo Sarai ma rokaka motemo, “Ai roka, o Jou gena nagala o ngopa wonahikewa sidago lo topuowa. So nakoso ka nomode, ka daloha maro nanga biasa gena notagi la nomaidu de ai gilalo moleleleani nanga tahuka. La nagala muna magena aku mopuo de idadi to ngohi ai ngopa.” Muna ami dupa de ami gogolo magena ma roka wosimote daloha.

³ So o orasi magena o Abram wogoge o Kanaan ma dokuka ma deka he o taungu mogiowo dabolo, de ma pedeka ami gilalo moleleleani ongo Hagar mowihihike unaka la modadi to una awi pedeka ma sinotoka.

⁴ So kagena de una wotagi imasikiidu de muna so modami de mitilibuka. Duma ma orasi muna momanako gena mitilibuka, de muna momasihie so ongo Sarai momisiceke.

⁵ Kagena de ongo Sarai ma rokaka motemo, “Ce! Ai gilalo moleleleani gena ngohi manena tonihike ngonaka, de ma orasi momanako gena igogou muna mitilibuka de momasihie, ngohi gena moigagaka de moisiceke. Komagena so ngona gena de ani sala ngohika. So tanu asa namote o Jou Awi hakim ngoneka.”

⁶ De una wotemo, “Itero, muna magena o gilalo moleleleani moi ngonaka, so maha dede ngona kia bato nodupa naaka munaka.” Komagena so ongo Sarai ami gilalo moleleleani momisidipito de o wange isigeto gena momingamo, sidago lo ongo Hagar molodaka.

⁷ O ngeko ikahika o Syurka kagena ma soaka o ake ma jobubu moi o tona ibobeleuka, de ongo Hagar momawoma de kanaga o Jou womasimane maro o malaikat moi munaka,

⁸ de wotemo, “He, Hagar! Ngona igogou ongo Sarai ami gilalo noleleleani moi. Hika noidedemo Ngohika ngona kiano nokahino de kiaka notagi.” De muna motemo, “Ngohi toloda ai nyonya ongo Sarai ami tahu ma rabano.”

⁹ De Una magena wotemo kali munaka, “Taika noliho ani nyonyaka, la nomileleani de nomisigise foloi daloha munaka.

¹⁰ Ngohi asa taaka sidago ani ngopa de ani dano asa foloisi yadala so o nyawa moi lo akuwa yaeto to ona manga dala.

¹¹ Ngona igogou de ani roheka, o ngopa yanau moi asa nowisibuo. De bilasu una nowisironga o Ismael, sababu o Jou wanakoka ani sininga ma beleso.

¹² Duma ani ngopa gena awi sininga datogoi, o nyawa yangoduka asa wasiholu so yangodu una wiholuli komagena lo awi gianongoru.” (Nako o bahasa Ibrani ma demo “Ismael” gena ma beto he imatero de o demo moi de ma ngale gena o Gikimoi woise, so wisironga komagena sababu o Gikimoi wanakoka ongo Hagar ami beleso.)

¹³ Komagena o Jou womibicara munaka, so muna ami sininga ma rabaka motemo, “Igogou, o Gikimoi ngohi woikeleloka dabolo de ngohi manena aku towikelelo Unaka.” Mutuwade muna motemo, “Jou, Ngona magena toniaso o Gikimoi Ngohi Noikokelelo.”

¹⁴ Ma sababu komagena o sumu magenena, kiaka o bi doku Kadesh de o Bered ma risoaka, gena isironga “O Lahai-Roi” (gena ma ngale Una Woooho gena ngohi woikelelo.)

^15-16 Kagena de o orasi magena o Abram awi umuru he o taungu moritupaange de butanga, de ongo Hagar mosibuo o ngopa yanau moi de ma baba wisironga o Ismael.