Dodadi 14 - O GIKIMOI AWI JAJI ma BUKU

O Abram gena o Lot wipalakoka

¹ So imadadi o kolano yaruha o tona ma somoano yahino imatekekudoti de o kolano yamotoha kagena o kota moi o Kanaan ma tonaka o Lot wogogogeka. Kanaga o kolano yaruha moi-moi ona magena manga sihino de manga ronga, ena gena: moi awi ronga o Amrafel una magena o Sinear eko o Babilonia manga kota ma kolano, moi awi ronga o Ariokh una magena o Elasar manga kota ma kolano, moili awi ronga o Kedorlaomer una magena o Elam manga kota ma kolano, de moili awi ronga o Tideal una magena o Goyim manga kota ma kolano.

² Manga dupa imatekekudoti de kanaga o kolano yamotoha ma somoa o Kanaan ma tonaka, magena lo ma kolano Kedorlaomer gena wapareta, ena gena, moi awi ronga o Bera una magena o Sodom ma nyawa manga kolano, moi awi ronga o Birsya una magena o Gomora ma nyawa manga kolano, moili awi ronga o Syinab una magena o Adma ma nyawa manga kolano, de moili awi ronga o Syemeber una magena o Zeboim ma nyawa manga kolano, de lo moili o Bela, ena gena o Zoar ma nyawa manga kolano.

^3-4 Kanaga ma deka o taungu mogiowo de sinoto o kolano yamotoha magena ma kolano Kedorlaomer wapareta de lo wakuasa. Ma ngale magegena so ma orasi yongosa o taungu mogiowo de saangeka, ma rabaka de ona imatekefakati ma ngale ma kolano Kedorlaomer de lo awi dodiao gena iwilawangi de iwikudoti. So ona magena imatekerimoi de yatolomu to ona manga prajurit yangodu o Sidim ma pidoka, kiaka o orasi manena naga gena isironga o Laut Asin.

⁵ Mutuwade o taungu moi ipasaka, de ma kolano Kedorlaomer de to una awi dodiao o bi kolano yangodu gena imatekerimoi so yahino de to ona manga prajurit ikudoti sidago yasitura o Refaim ma nyawa o Asyterot-Karnaim ma daeraka, de o Zuzim ma nyawa o Ham ma daeraka, de o Emim ma nyawa o Syawe-Kiryataim ma daeraka,

⁶ de lo o Hori ma nyawa o Edom ma bi talaka igogoge gena ona yangodu iloda de yanihi ikuruka, sidago yahika o El-Paran ma tona ibobeleu ma dateka.

⁷ Dabolo de o bi kolano de manga prajurit yanoninihi gena imakiliho de iliho kali kagena o En-Mispatka, gena orasi manena naga isironga Kadesh ma kotaka. To ona manga kudoti magena isigila-gila sidago lo o Amalek ma tona dangodu yadeheka, de o Amori ma nyawa igogoge o Hazezon-Tamarka lo yasituraka.

⁸ Kagena de o kolano yaruha o tona ma somoano ona magena isidailako to ona manga prajurit so yapolu de yatolomu o Sidim ma pidoka, de gila-gila ona imatekekudoti

⁹ imatekerisima de o kolano yamotoha gena o Kanaan ma tonaka.

¹⁰ O Sidim ma pidoka gena kanaga o aspal ma riho maro ka o bi sumu gena idala, so ma orasi o bi kolano yamotoha magena iloda o kudoti ma rabano de o kolano o Sodom de o Gomorano ona yasinoto ituraka o bi sumu ma rabaku. Ka cawali o kolano yaruwange gena yadoohawa so ona magena aku iloda o bi talaka yakahika.

¹¹ O bi kolano yaruha gena ona youtungu so o Sodom de o Gomora ma nyawa manga arata de manga haiwani dangodu yakooraka, komagena lo manga ino dangodu yadeheka, de ona asa itagi ilihoka.

¹² O Lot una magena o Abramka woaso baba ria, sababu o Abram ma nongoru o Haran awi ngopa moi, una lo kanaga wogoge o Sodomka. So orasi magena o Lot de to una awi arata moi-moi lo manga lawangi yakooraka de unasi iwitago iwingahoka.

¹³ Duma kanaga manga sidongirabano moi aku woloda de widahewa, so una magena wosingangasu o Abramka o kia dangodu idadadika. O orasi magena o Abram, o Ibrani ma nyawa una magena, awi goge imatekedalate de o Amori ma nyawa moi awi ronga o Mamre to una awi seri ma riho moi o bi gota yomomodoka. O Mamre de awi gianongoru ena gena o Eskol de o Aner, ona magena imakangaho daloha de o Abram.

¹⁴ Ma dongoho o Abram wogiise o habari magena de igogou ma nongoru awi ngopa o Lot lo iwingahoka, de gila-gila awi nyawa wasulo la ona yahino imatolomuno. De asa una wahiri awi nyawa ikokudoti yangodu manga dala ya-318 de itagi so o kolano yaruha de to ona manga prajurit magena yanihi sidago lo yaado o Dan ma kotaka.

¹⁵ Kagena de asa o Abram waregu awi nyawa magena idadi o bolu muruo nagaka, so asa ona yalawangi de yakudoti o putu itotongirabaka, sidago lo yautungu de asa yaginihi ona magena sidago yahika o Hoba ma dokuka, ena gena kudahu o Damsyik ma doku o koremiaku.

¹⁶ Idadi komagena, so o bi arata dangodu yakokoora o Abram aku wadehe kali, komagena lo ma nongoru ma ngopa o Lot de to una awi arata dangodu, de lo kanaga o bi ngopedeka de o bi nyawa ma somoa yapopiliku yangodu lo wasigilihoka.

¹⁷ So ma bobasaku de o Abram, ngaroko awi nyawa manga dala gena ikurangi, duma ma kolano Kedorlaomer de to una awi dodiao gena una wasituraka de wautungu daboloku, de o Abram womabulutu so woliho kali.

O Melkisedek wogolo o Gikimoi Awi laha wisidumu o Abramka

¹⁸ Kanaga o Salem (de isironga lo o Yerusalem) ma kolano moi awi ronga o Melkisedek de gila-gila una de lo o Sodom manga kolano yotagi o Abram wisibubusu o Syawe ma pidoka, gena ma ngale lo o Lembah Raja. O Melkisedek una magena lo o Gikimoi Wilalamo Awi imam moi so o roti de o anggur wigaho o Abramka, ma ngale to una awi ino de awi udo.

¹⁹ La ma ngale o Abram gena o Melkisedek wisigolo o Gikimoika, de wotemo, “O Gikimoi Nilalamo o dipa de o tona nosidadika, tanu Ngona Ani laha nowisidumu o Abramka.

²⁰ O Gikimoi Nilalamo Ani ronga posilamo, sababu una nowisiputuru awi lawangi lo wautungu.” Dabolo de o Abram awi arata wakokooraka o regu mogiowo gena o regu moi wahike o Melkisedekka.

²¹ Duma o Sodom ma kolano o Abramka wotemo, “Hika nomageseka mia arata dangodu niakokooraka hitilahi ai nyawa de ai kawasa gena, kodo, tanu daloha ilaku de nasigiliho ngohino.”

²² Kagena de o Abram wosango wotemo, “Ngohi igogou-gogou tosasi o Jou Awi simaka, Una o Gikimoi Wilalamo o bi moi-moi dangodu wosidadadi o dunia ma dokuka, gena Unaka totemo,

²³ done kanaga ma kolano ani lawe ma depi eko ani baro ma leta lo tadehewa, so tagogou ma loha maro o kia bato to ngona ani arata gena toholu tadehe. La ma ngale komagena ngona upa lo notemo, ‘Sababu ngohi so o Abram gena asa wokaya.’

²⁴ So ma ngale ngohi gena toholu o bi moi-moi to ngona de tadehe la tomasitongohi. Cawali ngohi ai dupa gena kiaka kanaga ai nyawa eko ai kawasa yadehe de yaoodo gena dohaka. Duma tanu dohaka de nasimaha to ngohi ai dodiao kanaga o Mamre, de awi gianongoru o Aner, de lo o Eskol gena ona lo o gimina imagese. Komagenaka.”