Dodadi 12 - O GIKIMOI AWI JAJI ma BUKU

O Gikimoi iwisulo o Abramka

¹ Kagena o Haranka de o Jou wotemo woririaka, “Abram, hika la notagi kasi. Ani tona, de ani baba awi tahu, de lo ani ria de ani gianongoru yangodu nadongosa de nokahika o tona ma somoa moika kanaga Ngohi asa tonisidumu ngonaka. Nako komagena naaka,

² Ngohi asa tonihike ngonaka ani ngopa de ani dano lo yadala sidago idadi o bangsa ilalamo. Ngohi lo tonisidumu Ai laha. Ma ngale ngona so o nyawa ma binuka lo o loha yamake. Ngohi lo taaka ani ronga ilamo o nyawa yadadalaka la yanako.

³ Nako o nyawa yaaka o loha ngonaka done Ngohi lo Ai laha onaka tasidumu. Nako o nyawa o dorou yaaka ngonaka done Ngohi lo onaka takutuku. Ma ngale ngona so igogou o nyawa o bi doku dangodu yamake Ai laha.”

^4-5 Mutuwade o orasi magena o Abram awi umuru o taungu moritumudingi de motohaka, de o Haran wodongosa, gena wamote o Jou Awi sulo unaka. Mutuwade o Abram womajobo de wokahika o Kanaan ma tonaka, gena de ma pedeka ongo Sarai, de ma nongoru o Haran awi ngopa moi awi ronga o Lot, de lo manga arata moi-moi, de kanaga awi gilalo ileleani o Haran ma bi nyawa gena yangodu wangahoka. So de kagena imasidiado o Kanaanka,

⁶ de ona o tona magena yodagi sidago lo yaado o gota ilalamo moi o nyawa yomomodo, ena gena o doku More ma dateka, o Sikhem manga seri ma rihoka. O orasi magena o Kanaanka ma bi nyawa gena kagena ka igogesi.

⁷ So Jou womasimane o Abramka, de wotemo kali, “O tona manena gena Ngohi asa tonihike ngonaka, de ani ngopa, de ani dano sidago lo ani galaweweku.” Dabolo de o Abram o teto watopuye, de waaka o nonako moi ma ngale o Gikimoi Una Awi dupa magena wosimaneka.

⁸ Dabolo de awi dodagi wadofa kali so una de awi nyawa yangodu gena yotagi yokahie o koresaraye o pido moi kagena de ma talaka. So kagena awi dadaru wosigokoye o Betel ma doku de o Ai ma doku ma risoaka. So igoge gena o Ai ma doku o wange ma nyonyiesa de o Betel ma doku o wange ma dumuko. Kagena lo o teto watopuye o nonako moi waaka kali ma ngale o Jou-ka wisuba de lo wigiliri.

⁹ Dabolo de awi dodagi wadofa kali o riho moika de womatuluru so o Kanaan ma tonaka, de una de awi nyawa yangodu gena yokahie kali yotatagi o koresaraye yameta o Tona Negebye, ena gena o tona ibobeleu.

O Abram wokahika o Mesirka gena ma jarita

¹⁰ Duma o Kanaan ma doku de ma bi soaka gena manga ino he damataka so o bare ikilolino, so lebelaha o Abram wotagi wokahieli o koresaraye foloisi ikuru, la bilasu o Mesir ma bi dokuka waado ma ngale kagena wagoge la sidago o bare ma orasi ipasa eko ihiwaka.

¹¹ Ma orasi ona yahika o tona ma batika so o Mesir ma bi doku he yadumuka, de o Abram wotemo ma pedeka ongo Saraika, “Ai pedeka, igogou ngona manena niloha poli.

¹² So nakoso o Mesir ma nyawa la nikelelo, de ona asa itemo, magena ngaroko lo ma pedeka de ona aku ngohi itoomaka, de ngona gena nidohaka la nooho.

¹³ Ma ngeko komagena so lebelaha notemo bato, ‘Una manena to ngohi ai hira woriria moi,’ la ma ngale ngona gena ngohi ingaho daloha. Upa sidago ngohi itooma.”

¹⁴ Dabolo so ma orasi ona o Mesir ma bi dokuka yaado, de igogou idadi maro o kia isibobicaraka, so o Mesir ma nyawa ongo Sarai mikelelo gena miloha icarawa.

¹⁵ Komagena lo ma kolano, wisiaso lo ma Firaun, awi nyawa yamuruo naga awi kadatoka imomanara lo mikelelo ongo Sarai gena miloha icarawa, de gila-gila ona itagi ma kolanoka isingangasu itemo, “Igogou, o ngopedeka moi muna magena ka miloha poli.” Sababu muna miloha so ma kolano wasulo so ona mingaho to una awi kadatoka.

¹⁶ So kanaga de ma ngale ongo Sarai gena o Mesir ma kolano womideheka, la o Abram lo wingaho de wiaaka daloha sidago lo wihike unaka o bi arata maro o bi gilalo awi tahuka ileleleani, o bi duba, o bi kabi, o bi sapi, o bi keledai de lo o bi unta.

¹⁷ Duma kanaga ma sababu gena ma kolano ongo Sarai womidehe de womasipedeka, so o Jou o panyake datotubuso de pomomodo wasitampala ma kolanoka de awi nyawa o kadato moi ma rabaka.

¹⁸ So ma ngale magegena ma kolano wosulo o Abram wiaso la asa wisano de wotemo unaka, “Ce! Kiaso ngona noiaka komanena ngohika. Dadoohaso nosingangasuwa ngohika, muna gena to ngona ani pedeka.

¹⁹ Kiaso notemo muna gena ani bira mononongoru sidago ngohi tomidehe de tomasipedeka. O orasi manena tomisigiliho ngonaka, so nomidehe ani pedeka muna manena la nitagi nisupu ai doku ma rabano.”

²⁰ Kagena de ma kolano awi nyawa imomanara wasulo, so ona o Abram de ongo Sarai yangaho la isupu o kota eko o dokuno, so itagi de yaaho lo to ona manga arata moi-moi, komagena lo ma kolano wahihike kia bato magena yamakeka gena dangodu yaahoka.