Dodadi 11 - O GIKIMOI AWI JAJI ma BUKU

O nyawa imacacaralamo manga dorou o Gikimoi wafanggali

¹ Ma orasi o dunia ma bi dokuka ma nyawa ona yangodu manga bahasa gena ka imaketero de iregu waasi,

² de kanaga o nyawa ma binuka gena itagi imatuluru o wange ma dumuka, de asa ona o Sinear ma tonaka o pido moi yamake de kagena yodogoge.

^3-4 Kagena de o nyawa ona magena asa imatekebicara itemo, “Hino! La ngone o kota moi de o tahu ilalamo posigoko de ma candi ifoloisi ikuruye sidago lo o dipaye itiki. Magena ma ngale o nyawa yangodu gena to ngone nanga ronga ifoloisi yanako, de o nyawa moi lo yaakuwa ngone inasikitinga la podobiau o bi tona ma somoaka. So hika o tela upa o tetono duma o tona ikokasaino la paaka de lo paosu, de o tela ma soaka gena upa de o kalero duma de o aspal posicoho eko posigapala.”

⁵ Kagena de o Jou o sorogano wouti, Awi edekati la o kota ma bi tahu de ma candi ikukuruye o nyawa yaaaka gena wanano.

⁶ Wananoka, de Awi sininga ma rabaka wotemo, “He! O bi nyawa magena yosigoko komagena, sababu ona yangodu o bangsa moi de manga bahasa lo ka moi. So ona manga edekati ma nonoma magena nakoso isiboloka de gila-gila ona manga edekati moi-moi gena aku yaaka.

⁷ So, hino! La ngone pouti de manga bahasa patagali de pahike onaka ma ngale ona upa imakasahe moi de moika.”

⁸ So o Jou waaka komagena, so ona yangodu asa imatingaka de yodobiauka o bi tona ma somoaka. So o kota magena yaaka kawa de o candi isigogoko imatoguka.

⁹ Komagena so o riho magena isironga o Babel (ma ngale gena igamamu), sababu kagena de o Jou manga bahasa watagali ma ngale ona igamamuka.

O Abraham awi sihino o Semno

¹⁰ Manena o Sem awi ngopa de awi danoku. Gena ma orasi o taufani daboloku de o taungu sinoto ipasaka, de o Sem magena awi umuru o taungu ratu moika, de ma pedeka mosibuo o ngopa yanau moi awi ronga o Arpakhsad.

¹¹ O Arpakhsad wisibuoka, de o Sem awi umuru idogo kali o taungu ratu motohaka, de asa ma pedeka mosibuo kali o ngopa yanau de o ngopedeka ona magena inonongoruku.

¹² De o Arpakhsad una magena awi umuru o taungu moruwange de motohaka, de ma pedeka mosibuo o ngopa yanau moi awi ronga o Selah.

¹³ O Selah wisibuoka, de o Arpakhsad awi umuru idogo kali o taungu 403-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹⁴ De o Selah una magena awi umuru o taungu moruwangeka, de ma pedeka mosibuo o ngopa yanau moi awi ronga o Eber.

¹⁵ O Eber wisibuoka, de o Selah awi umuru idogo kali o taungu 403-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹⁶ De o Eber una magena awi umuru o taungu moruwange de ihaka, de ma pedeka mosibuo o ngopa yanau moi awi ronga o Peleg.

¹⁷ O Peleg wisibuoka, de o Eber awi umuru idogo kali o taungu 430-ka, de asa ma pedeka mosibuo kali o ngopa yanau de o ngopedeka ona magena inonongoruku.

¹⁸ De o Peleg una magena awi umuru o taungu moruwangeka, de ma pedeka mosibuo o ngopa yanau moi awi ronga o Rehu.

¹⁹ O Rehu wisibuoka, de o Peleg awi umuru idogo kali o taungu 209-ka, de asa wosibuo kali o ngopa yanau de o ngopedeka ona magena inonongoruku.

²⁰ De o Rehu una magena awi umuru o taungu moruwange de sinotoka, de ma pedeka mosibuo o ngopa yanau moi awi ronga o Serug.

²¹ O Serug wisibuoka, de o Rehu awi umuru idogo kali o taungu 207-ka, de asa ma pedeka mosibuo kali o ngopa yanau de o ngopedeka ona magena inonongoruku.

²² De o Serug una magena awi umuru o taungu moruwangeka, de ma pedeka mosibuo o ngopa yanau moi awi ronga o Nahor.

²³ O Nahor wisibuoka, de o Serug awi umuru idogo kali o taungu ratu sinotoka, de asa ma pedeka mosibuo kali o ngopa yanau de o ngopedeka ona magena inonongoruku.

²⁴ De o Nahor una magena awi umuru o taungu monahalo de siwoka, de ma pedeka mosibuo o ngopa yanau moi awi ronga o Terah.

²⁵ O Terah wisibuoka, de o Nahor awi umuru idogo kali o taungu 119-ka, de asa ma pedeka mosibuo kali o ngopa yanau de o ngopedeka ona magena inonongoruku.

²⁶ De o Terah magena awi umuru o taungu moritumudingika, de ma pedeka mosibuo kali o ngopa yaruwange.

²⁷ Manena o Terah awi ngopa de awi danoku. O Terah ma pedeka mosibuo o ngopa yaruwange gena manga ronga o Abram, de o Nahor, de lo o Haran. De o Haran ma pedeka mosibuo o ngopa yaruwange manga ronga o Lot, de o Yiska, de lo ongo Milka.

²⁸ Ma baba Terah ka woohosi, de o Haran una wosone kagena awi doku de awi tonaka, ena gena o kota Ur o Kasdim ma daera ma rabaka.

²⁹ O Abram de o Nahor ona yasinoto gena yomodokaka. O Abram ma pedeka gena ami ronga ongo Sarai, de o Nahor ma pedeka gena ami ronga ongo Milka. Ma pedeka ongo Milka ma baba gena ma roka awi nongoru o Haran, de ma hira gena o Yiska.

³⁰ O Abram de ongo Sarai ona manga ngopa ihiwasi o orasi magena.

³¹ Kagena de ma baba o Terah de ma ngopa woriria o Abram, de ma pedeka, de lo ma nongoru o Haran awi ngopa o Lot yotagi o Kanaanka. Kagena o kota Urka de yomajobo, duma yahika ma soaka de o kota Haranka imasidodogu.

³² Kagena de manga baba o Terah awi umuru ma deka o taungu 205-ka, de wosoneka.