Dodadi 1 - O GIKIMOI AWI JAJI ma BUKU

O Gikimoi o dunia wosidadi

¹ Ma solano o Gikimoi wosidadi o dipa de o dunia.

² Duma o orasi magena ma jamani de ma raba ihiwasi, ka cawali o ngoloto de o bubutu. De o Gikimoi Awi Gurumi o ngoloto ma dokuka ikokiloli.

³ So kagena de o Gikimoi wotemo, “He! Nita nodadi.” So kagena de imaakaka.

⁴ De o nita magena wanano idadi daloha. So o nita de o bubutu gena wositinga.

⁵ So o orasi magena o nita wosironga o wange de o orasi magena o bubutu wosironga o putu. Kagena de daputuka so daginita kali, ena gena o wange ma nonomaka.

⁶ Kagena de o Gikimoi wotemo kali, “He! Ake nimaritinga de nidadi o ake ngai sinoto.”

⁷ Komagena imadadi maro kiaka o Gikimoi wotemo, ena gena o ake imaritinga de idadi o ake kadaku de o ake kadahu,

⁸ de ma soa magena wosironga o dipa. Kagena de daputuka so daginita kali, ena gena o wange ma sinotoka.

⁹ Kagena de o Gikimoi wotemo kali, “He! Ake o dipa ma litimiku gena nimarimoi la o tona ibao.” De o Gikimoi wosulo dabolo de o ake imarimoika de o tona ibaoka.

¹⁰ So o tona magena wosironga o dududu de o ake magena wosironga o teo. Dangodu magena idadika de wanano daloha.

¹¹ So de kagena de o Gikimoi wotemo kali, “He! Dududu nisioho o bi dumule de o bi ngangaru de o bi gota.”

¹² So komagena o dumule de o ngangaru de o gota dangodu iohoka. De o bi goho magena idadika de wanano daloha.

¹³ Kagena de daputuka so daginita kali, ena gena o wange ma saangeka.

¹⁴ So kagena de o Gikimoi wotemo kali, “He! Dipa ma nita nidadi, la o wange de o putu imaritinga so imaterowa. De ngini gena nisinonako o musung ma bati de lo ma orasi.

¹⁵ De lo nidadi o dipa ma nita la niodisiwa o duniaku.” Komagena o nita o dipaka wosidadi.

¹⁶ Komagena o Gikimoi o nita wosidadi, la o nita ilalamo ma siwa o wange yapareta, de o nita ma ceceke ma siwa o puputu yapareta, komagena lo o bi ngoma.

¹⁷ Ma ngale o duniaku yodisiwa,

¹⁸ de o wange de o putu yapareta, de lo o wange de o puputu wosiritinga. Komagena idadika de wanano daloha.

¹⁹ Kagena de daputuka so daginita kali, ena gena o wange ma ihaka.

²⁰ Kagena de o Gikimoi wotemo kali, “He! Nao o akeka nimadadi. He! Namo o ngawa-ngawaka nimadadi de niasihino nisososo.”

²¹ Komagena de Una o teoka wosidadi o nao ilalago maro ka o haiwani itatagi-tagi moi, de lo o bi nao ma somoali idala o akeka iooho yamote moi-moi de ma sihino. De lo o bi namo yamote moi-moi de ma sihino. De dangodu magena idadika de wanano daloha.

²² De o Gikimoi Awi laha wosidumu de wotemo, “Tinihike o buturu la asa nipuo la nia ngopa ifoloi idala de o teo niawedo, komagena o namo lo nidadi ifoloi idala o duniaka.”

²³ Kagena de daputuka so daginita kali, ena gena o wange ma motohaka.

²⁴ De kagena de o Gikimoi wotemo kali, “He! Haiwani moi-moi de nia sihino o dududuka nimadadi. Komagena ma sihino koloko o haiwani damomoroi, de o haiwani ifofufuru, de lo o haiwani o dududuka itatase nimadadi.” De dangodu imaakaka.

²⁵ Komagena so o Gikimoi dangodu magena wosidadika. De dangodu magena imaakaka de wanano daloha.

²⁶ Kagena de o Gikimoi wotemo, “Ngone bilasu o nyawa paaka de manga jamani positero maro Ngone. Tahike o buturu onaka la asa yapareta o bi haiwani dangodu magena o duniaka, de o bi namo dangodu o ngawa-ngawaka, de lo o bi nao dangodu o teoka.”

²⁷ Komagena o Gikimoi o nyawa waaka, o nyawa magena imatero de to Gikimoi Awi jamani. Komagena waaka o nyawa yanau de o ngopedeka.

²⁸ De o Gikimoi Awi laha wosidumu o nyawa ona magenaka wotemo, “Tinihike o buturu la o ngopa asa nisibuo la ifoloi nidala de o dunia niawedo de o dunia ma raba niapareta. Komagena niapareta o bi nao o teoka, de o bi namo isososo o ngawa-ngawaka, de lo o bi haiwani itatagi o dududuka.

²⁹ Niise! Nginika tinihike o bi ngangaru de lo o bi gota ma sopo la niaoodo.

³⁰ Komagena lo o bi haiwani o dududuka de o bi namo o ngawa-ngawaka iooho gena, tahike o bi goho magena asa yaodo.” De idadi komagenaka.

³¹ So kagena de o Gikimoi wanano Awi dodadi dangodu magena imaaka dalohaka. Magena de daputuka so daginita kali, ena gena o wange ma butangaka.