1 Timotius 4 - O GIKIMOI AWI JAJI ma BUKU

O nyawa isigise o toka ma dodoto so o dodoto itotiai asa yopiricaya kawa

¹ O Gurumi Datetebi wotemoka igogou done kanaga o orasi ma simaka o dodoto itotiai ngone papipiricaya gena o nyawa asa he yopiricaya kawa, de ona isigise o gurumi datotodamato. Komagena so o toka ma dodoto o nyawaka yadoto.

² O dodoto ikokulai magena o nyawa yodoto so asa yatodamatoko de manga lade isago, de ona manga sininga ma rabaka itemo manga sala ihiwa. De manga demo komagena ona imatero maro o nyawa moi de awi siri datubuso, duma una he wamalo kawa.

³ So komagena ona manga dodotoka itemo o nyawa upa he ikawi, de ona yasulo o ino ma binuka upa yaodo. Duma o bi dodoto magena isala, sababu o bi ino dangodu gena o Gikimoi wosidadi ma ngale o nyawa nagoona ma Kristus iwipipiricaya de o dodoto itotiai yamomote. La bilasu o ino magena yaodo de manga sukuru yatide ka o Gikimoika.

⁴ Ngone panakoka o ino moi-moi daloha, sababu o bi moi-moi dangodu o Gikimoi wosidadadika gena daloha. So nakoso o nyawa yaodo de manga sukuru yatide dabolo Unaka, o ino magena upa he ona yaholu.

⁵ Komagena ona yosumbayangka de o Gikimoi lo wotemo daboloka, so o bi ino dangodu gena daloha so aku yaodo.

O Timotius bilasu wodoto o dodoto itotiai de o moi-moi waaka daloha

⁶ O bi moi-moi dangodu idomaka ngohi talefoka gena, ngona bilasu nadoto nanga dodiao o Yesus wipipiricayaka. La ma ngale o dodoto itotiai, maro ngone papipiricayaka de ngona namomoteka gena, ngona ani sininga ma rabaka asa foloisi daputuru, so ngona maro o Yesus Kristus Awi roriwo moi asa ona magena aku naleleani daloha.

⁷ Ngona bilasu nomasirese o dodoto ma jarita ifufuma, gena imaketerowa de o dodoto o Gikimoi wodudupa. Duma maro o nyawa moi awi roheka wosiputuru, so komagena ngona lo bilasu ani siningaka nosiputuru. La ani moi-moi naaaka gena maro kia o Gikimoi wodudupa.

^8-9 Sababu o demo ma duuruka manena, gena igogou so bilasu o nyawa inangodu padehe daloha, ena gena, “O nyawa la cawali manga rohe isiputuru gena ma faida ka ma cunu, duma o nyawa la yaaka daloha maro o Gikimoi wodudupa gena, ma faida foloisi ilamo. Magena ma faida ilamo, sababu o orasi manena o Gikimoi asa Awi laha wosidumu onaka de o orasi ma simaka ona asa yamake o oho ka sidutu ikakali.”

¹⁰ Komagena ngone pongongano o Gikimoi Awi jaji o oho ka sidutu ikakali pamake gena asa wosiganapuka, sababu Una magena ka sidutu ikakali de o nyawa nagoona ma Kristus wipiricayaka igogou ona yangodu wasisalamati. Magena ngone pongongano, so ngona de ngohi bilasu paleleani pokaeli o nyawa o Jou Yesus wipipiricayaka.

¹¹ So o bi moi-moi dangodu magena ngona nadoto onaka bilasu ona yamote.

¹² Sababu ngona ka nogohiduurusi, upa sidago o nyawa nisiceke. So ngona bilasu nomaaka daloha la nibicara lo daloha, de ani dodara o nyawaka, de ani piricaya ma Kristuska daputuru de lo ani sininga ibolowo. Ngona naaka komagena, la o nyawa ma Kristus wipipiricayaka manga sininga ma rabaka yanako itiai la o moi-moi maro komagena bilasu ona yaaka.

¹³ O orasi manena sidago ngohi tomasidiado gena, ngona o nyawa ipipiricaya manga simaka bilasu o Gikimoi Awi Jaji ma Buku nabaca, so ma ngale nasinako de nadoto onaka.

¹⁴ Ma orasi ipapasaka, o nyawa ipipiricaya manga bobareta lo manga gia yahado dabolo ngonaku la inisikelelo ngonaka ma ngale o Gikimoi Awi manara naaka, maro o bi nabi lo isingangasu dabolo ngonaka. So magena upa nomarihika, duma o Gikimoi Awi Gurumi ma buturu wonihike dabolo ngonaka, so ngona bilasu Awi manara naaka nokaeli.

¹⁵ O manara moi-moi dangodu bilasu ngona naaka nokaeli, la o nyawa yangodu nikelelo gena igogou ngona ani manara moi-moi magena aku naaka foloisi ilamo de daloha.

¹⁶ Nomajaga igogou la ngona ani sininga de ani moi-moi naaka gena daloha de igogou ngona nadoto o dodoto itotiai. Nako komagena naaka nokaeli, ngona masirete aku o Gikimoi wonisalamati, de lo o nyawa nagoona inisigogigise ngonaka so yopiricaya, ona lo aku wasisalamati.