1 Timotius 3 - O GIKIMOI AWI JAJI ma BUKU

O gogobu manga bobareta gena manga manara ka cawali o loha yaaka

¹ O demo ma duuruka manena, gena o nyawa inangodu bilasu padehe daloha: “Nakoso o nyawa la yodupa yoleleani maro o nyawa ipipiricaya manga bobareta moi, o manara yodudupa gena kanaga o manara moi ma faida foloisi ilamo.”

² So o bobareta moi bilasu awi moi-moi waaaka ma rabaka gena o nyawa lo yaakuwa iwikalaki. Komagena una bilasu ma pedeka ka momatengo de upa o ngopedeka ma somoa wadupali, de awi sininga de awi rohe ma nyafusu gena wapareta daloha, de awi sininga wapareta itiai so o nyawa aku iwihoromati, de wodupa waaso o nyawa ma somoa imasidodogu awi tahuka de lo una aku o nyawa wadoto itiai.

³ Komagena lo una bilasu upa witobadalu de upa witobangamo. Duma una bilasu o bi nyawa wadodara de awi sabari ilamo, de o nyawa ma somoa moi lo upa wasibicara datorou, de upa sidago o pipi wodesere.

⁴ De lo maro o baba moi awi dailako daloha awi tahu ma rabaka, komagena bilasu awi ngopa-ngopa wadoto la ona wisigise de wihoromati manga baba.

⁵ Sababu nakoso o nyawa moi de wanakowa wosidailako daloha awi tahu ma rabaka, igogou una lo waakuwa wosidailako o Gikimoi Awi gogobu.

⁶ De lo una magena idadiwa wopopareta nakoso o Jou Yesus iwipiricaya iteka waasi, sababu nako komagena done una asa womacaralamo ifoloi de wotemo dangodu ka wanako, de ma duuru o Gikimoi asa wisisala. Magena imatero de o Iblis lo idomaka asa womacaralamo so o Gikimoi iwisisala.

⁷ Ma ngale komagena o bobareta moi bilasu o moi-moi waaka daloha de itiai, la o nyawa ipipiricaya waasi aku isibicara una magena igogou awi manara daloha. Upa sidago maro o Iblis ma sabatolo wipilikuka so awi ronga ma dorou wogaka.

Ileleani la o moi-moi yaaaka gena bilasu ka qaloha de itiai

⁸ O gogobu ma leleani bilasu lo o moi-moi yaaka maro o nyawa aku yahoromati. Komagena upa manga lade isago, upa yotobadalu, de upa o pipi yodesere.

⁹ Ona bilasu yopiricaya daputuru o dodoto itotiai, kiaka o orasi manena o Gikimoi wosimaneka, de ona lo yaaka o manara o kia aku yanako magena itotiai.

¹⁰ De lo ileleani ona magena bilasu manga manara yatailako kasi, la nakoso manga dorou moi lo ihiwa, de asa aku ona magena yatide idadi o nyawa ipipiricayaka manga leleani.

¹¹ Komagena lo manga pedeka bilasu o moi-moi yaaka maro o nyawa aku yahoromati. So upa o nyawa ma somoa yasibicara datorou, duma ona bilasu manga sininga de manga rohe ma nyafusu yapareta daloha, la o nyawa lo aku ona yapiricaya.

¹² De o bi nyawa ileleleani ona magena bilasu manga pedeka ka imatengo de upa o ngopedeka ma somoa yadupali, de lo bilasu manga ngopa-ngopa de manga tahu ma raba yaaturu daloha.

¹³ Nakoso ona la o nyawa ipipiricaya yaleleani daloha, de o nyawa asa yahoromati de ona lo aku yobarani isibicara ma ngale to ona manga piricaya o Yesus Kristuska.

O nyawa o Gikimoi wipipiricaya imasigocoho daputuru o dodoto itotiaika

¹⁴ O moi-moi idomaka ngohi talefoka, ngaroko tongongano itekawa ngohi asa tahika kali ngonaka,

¹⁵ duma nako ngohi iteka so ihiwasi, ngona bilasu nanako idodooha o gogobu bilasu manga sininga de manga manara, sababu ona de o Gikimoi maro ka o tahu ma raba moi. O gogobu magena ka o Gikimoi woooho Awi nyawa yangodu wipipiricaya Unaka, de maro o tahu ma golingasu ma sosode dapoputuru moi, so komagena ona imasigocoho daputuru o dodoto itotiaika.

¹⁶ O dodoto magena o Gikimoi wonasikeleloka, de o dodoto magena lo inasidumu idodooha nanga moi-moi paaka daloha la Una wodupa. So o dodoto magena igogou foloisi ilamo. O dodoto foloisi ilamo, gena ma ngale o Yesus Kristus, Una masirete womasimane maro o nyawa moi, de o Gurumi Datetebi wosigogou Una Awi sininga itiai. De o bi malaikat lo Una wikelelo. De o habari ma ngale Una isihabari o dunia ma batika so o nyawa o dunia ma dokuka lo iwipiricayaka. De asa o Gikimoi Una magena witide o sorogaye de Awi muliaka.