1 Korintus 8 - O GIKIMOI AWI JAJI ma BUKU

Ona manga sano-sano ma ngale o ino isisuba o serika

¹ De nako ngini nia sano-sano ma ngale o ino la kanaga isisuba o serika gena, ngohi tosango komanena. Igogou, ka idadi ngone potemo panakoka o Gikimoi Una magena ka womatengo de o bi giki ma somoa moili gena ihiwa. Ngaroko komagena, nakoso potemo ngone o kia naga moi ka panako daloha, de magena ngone aku pomasihieka. Duma nakoso padodara, de nanga sininga ma meta cawali de o dodara ma ngale o nyawa manga sininga aku posiputuru.

² O nyawa nagoona la kanaga itemo o kia naga moi lo ka yanako daloha, ona magena igogou itotiai yanako waasi.

³ Duma o nyawa nagoona la kanaga igogou o Gikimoi iwidodaraka, ona magena manga sininga ma raba gena o Gikimoi lo wanako.

⁴ Mutuwade, nako o ino la kanaga isisuba o serika gena, ngone potemo igogou aku o ino magena ka poodo, sababu panakoka o Gikimoi Una gena ka womatengo de o dunia ma rabaka o bi giki ma somoa gena ihiwa.

⁵ O nyawa yasusuba gena kanaga o bi moi-moi ka idala, gena itemo bai o bi giki de lo o bi gurumi, kiaka o dipaka eko lo o tonaka.

⁶ Duma ngone popipiricaya gena ka panako igogou o Gikimoi gena ka womatengo. Una magegena nanga Baba o bi moi-moi o duniaka gena dangodu wosidadadika, de to Una Awi giliri gena kanaga ngone nanga oho ma gaalu. De igogou lo o Jou ka womatengo, ena gena o Yesus Kristus. Una magena o Gikimoi asa wisulo la Una waaka so o bi moi-moi dangodu aku idadi, de lo sababu Una magena, so ngone aku o oho ka sidutu ikakali pamake.

⁷ Ngaroko komagena, duma o nyawa ipipiricaya kiaka magena lo yanako itotiai, ona magena yangoduwa. Ma binuka gena ma orasi ma Kristus wipiricaya waasi, de kanaga ona magena yodupa o bi serika yosuba. La sidago o orasi manena naga gena nakoso o ino o gaso isusuba o bi serika la yamake, ma ngale o ino magena ona manga sininga ma rabaka itemo, “Magena o seri ma ino bai!” So nakoso ona la o ino magena yaodo, ona yamalo manga sininga ma rabaka igogou o dorou yaakaka, sababu manga siningaka gena manga piricaya he daceke.

⁸ Igogou, o ino o kia bato la nako poodo gena, idadiwa yaaka ngone dede o Gikimoi pomakadame eko pomakitinga. Nakoso o ino la kanaga poodo eko paholu, magena o Gikimoi wanano maro ma faida ingaliwa so ka imaketero.

⁹ Ngaroko komagena, ngini lo bilasu nimasidodiahi. Upa sidago o nyawa ona magena manga piricaya daceke so o dorouku yotura, ma sababu ngini gena kanaga nia siningaka nianako igogou ka daloha so o ino magena paodo.

¹⁰ Nako nimasidodiahi gena, hika tosiade-ade. Nakoso o odo ilalamo o seri ma tahuka, de ngini nianako igogou ka daloha la o seri ma ino magena paodo, so kagena nitagi la niodo. Kagena done o nyawa moi, awi piricaya daceke, una magena kanaga winikelelo so una lo wobarani o ino magena waodo.

¹¹ Ma duuruka, de ma ngale o kia naga nianakoka so asa to una awi piricaya yasisaka, sababu o kia naga wamalo datorou la ngini niaaaka magena una wamote, duma una magenaka lo ma Kristus wosoneka.

¹² Nakoso de nanga manara komagena so nanga dodiao manga piricaya daceceke gena manga sininga paaka so dasirika, de ngone lo o dorou paaka ma Kristuska.

¹³ So nakoso o ino ngohi taodo de komagena ngohi ai dodiao ipipiricaya kanaga o dorouku tasitura, de upa sidago o ino magegena ngohi toodoli. So tasitura gena ngohi toholu bai!