1 Korintus 10 - O GIKIMOI AWI JAJI ma BUKU

Upa o bi seri yosuba

¹ Ai dodiao nipipiricaya, hika ngini nisosininga idodomaka gena nanga ete de nanga topora ona magena o Musa wimote, de o kia naga asa idadi de imaaka. Ona yangodu kanaga o lobi-lobi igogolingasu ma bolu o ngawa-ngawa magena maro yataru gena, isinonako o Gikimoi kanaga lo wajaga, de lo asa yakahika o Laut Merah yatola lo ona isalamati.

² O lobi-lobi ona yataru de ona o Laut Merah yatola, gena ma rabaka ona yangodu o Musa wimote-mote. Magena imatero maro ngone lo nakoso inaosika gena, isinonako igogou ngone o Jou Yesus Awi nyawa wimomote.

^3-4 Ona yangodu lo kanaga manga ino de manga ake ka imaketero gena, kiaka o Gikimoi de Awi kuasa wahike onaka. Manga ake gena o Gikimoi wosiuhi o tetono, de o teto magena o ade-ade imatero bato ma Kristus Una masirete lo kanaga dede onaka.

⁵ Duma ngaroko o Gikimoi Awi laha ona wasidumu komagena, ona nanga ete de nanga topora yadala ma ngale to ona manga gogoho gena o Gikimoi wosanangiwa. Mutuwade ona magena asa isone kagena o tona ibobeleuka manga ngeko ikilolika.

⁶ Magena dangodu imadadi de imaakaka ma ngale o sitiari moi ngoneka, la ngone gena asa upa he o bi moi-moi datotorou magena ponyafusu, imatero maro idomaka ona yaaka.

⁷ Upa sidago ngone lo o bi serika podupa posuba, maro idomaka o nyawa ma binuka lo yaaka. Gena imatero de o kia kanaga o seri moi o sapi ma ngopa o guracino isilelefo o Gikimoi Awi Jaji ma Buku ma rabaka itemo, “O nyawa ona magena irarame gena yaaka kasi o odo ilalamo, dabolo de asa o kia naga datotorou magena yaaka.”

⁸ Upa sidago ngone lo o nyafusu ma dorou magena paaka, imatero maro idomaka o nyawa ma binuka lo yaaka. Nimasitiari bai! Ma ngale manga manara magegena ka o wange moi ma raba de kanaga ona ya-23,000 gena isoneka.

⁹ De lo upa sidago ngone o Jou gena powidahake, imatero maro idomaka ona ma binuka lo yaaka, de kanaga o bi ngihia ona yagolika.

¹⁰ Komagena lo upa ngone pomaridemo, imatero maro idomaka ona ma binuka lo yaaka, de kanaga o malaikat moi wototooma una magena ona watoomaka.

¹¹ O bi moi-moi magena idadi de imaaka onaka gena, dangodu isilelefo o Gikimoi Awi Jaji ma Buku ma rabaka ma ngale o sitiari moi ngoneka. Sababu ngone gena o dunia ma dodogu ma orasika gena, o orasi manena naga ngone pooho.

¹² So nakoso ngini la kanaga nitemo nia piricaya gena daputuruka, de ngini magena bilasu nimasidodiahi bai! Upa sidago done ngini gena o dorouku nitura.

¹³ O babaja moi-moi inidahe nginika gena, dangodu ka imaketero de o kia naga yadadahe o dunia ma nyawa yangoduka. Duma o Gikimoi Una gena aku ngini igogou niwipiricaya, sababu Una asa wosimahawa la ngini inibaja ifoloi de nia piricaya ma buturu, so aku niamoku. So ma orasi kanaga o bi babaja ngini inidahe, de Una magena asa o ngeko moi waaka la o babaja magena aku niamoku daputuru de lo ma rabano aku nisupu.

Ona bilasu yoholu yamote o odo ilalamo kiaka o nyawa o bi seri gena yasusuba

¹⁴ So, ai dodiao tinidododara, bilasu o adati o bi seri yasusuba gena ngini nimasirese bai!

¹⁵ Ngini gena o nyawa nicocawaro, so hika ngini masirete to ngohi ai demo manena niatuga idodooha itiai, eko hiwa.

¹⁶ Nakoso ngone o anggur poudo ma ngale ma Kristus Awi au ikokopolaka gena pososininga, ngone gena nanga sukuru patide o Gikimoiye. Magena o nonako moi ngone manena ma Kristus Awi nyawaka, la kanaga de Awi au gena nanga dorou watupuka. De ma orasi ngone o roti patepi-tepi ma ngale ma Kristus Awi rohe wahihikeka gena lo pososininga, magena o nonako moili ngone manena ma Kristus Awi nyawaka, la kanaga de Awi rohe wositagali ma ngale nanga dorou watupuka.

¹⁷ Ma ngale o roti ka ngai moi gena ngone pomomote la de magena paodo, so ngone, ngaroko inadala, duma inangodu-ngodu gena kanaga podadi imatero maro ngone ka o rohe moika.

¹⁸ Hika niososininga lo o Yahudika ma nyawa manga adati de manga galepu. Ona kanaga imatolomu ma ngale o ino, kiaka o suba ma riho ma dokuka o Gikimoi wisusubaka, magena ma sononga yoodo. Ona moi-moi la kanaga o ino magena yoodo, ona magena yomomote lo o Gikimoi wisuba.

¹⁹ To ngohi ai demo kanaga de ma ngale gena, o bi giki ma somoa de lo o ino o bi serika isusuba gena dadoohawa.

²⁰ Igogou, ngohi ai ngale gena, o kia bato la kanaga o bi serika isusuba, magena isisuba o Gikimoi kawa, duma igogou isisuba ka o bi tokaka. So nakoso ngini gena niamote o nyawa o bi toka yasusuba gena, ngohi tadupawa.

²¹ Ngone nakoso o anggur poudo eko o roti poodo ma ngale ma Jou Awi sone gena pososininga, de lo poodo eko poudo dede o nyawa la kanaga o bi toka yasusuba, gena ka ma moi paaka lo idadiwa. So komagena lo igogou idadiwa ngone o seri ma bi tahuka powosa de poodo dede ona o serika isusuba.

²² Nako igogou paaka komagena, de ngone gena o Jou powidahake. Igogou-gogou, idadiwa ngone nanga siningaka potemo nanga buturu gena ifoloi de to Gikimoi.

O bi moi-moi dangodu ma rabaka hika yaaka la kanaga idadi o Gikimoi wigiliri

²³ Ngini nia sidongirabaka ma binuka nitemo, “Ka idadi nakoso ngone paaka o kia bato podudupa.” Magena itiai, duma o bi moi-moi ngone podudupa gena dangoduwa maro o kia naga daloloha ngoneka. Ngaroko igogou o kia bato podudupa gena ka idadi ngone paaka, duma idadiwa o bi moi-moi paaaka gena dangodu o nyawa nanga siningaka isiputuru.

²⁴ Upa sidago cawali o kia naga daloloha ka to ngone nanga rohe masireteka aku ngone paaka, duma ngone lo bilasu paaka o kia naga daloloha ma meta o nyawa ma somoaka.

²⁵ Ka idadi o bi sihode moi-moi o pasarka isiiija gena dangodu ka paodo. Upasi patuga podoma de pahiri nagala o serika isisubaka eko hiwa.

²⁶ Sababu o Gikimoi Awi Jaji ma Buku ma rabaka isilefoka itemo, “O dunia de lo ma raba dangodu gena to ma Jou.”

²⁷ Nakoso kanaga ngini inikoro niodo o nyawa yopipiricayawa manga tahuka, de ngini nimode niodo dede ona, de o kia bato ona isiaaka nginika magena hika niaodo. Upa he ngini nidoma nisano de niahiri nagala o serika isisubaka, eko hiwa.

²⁸ Duma nakoso o nyawa kanaga itemo nginika, “O ino manena o serika isisubaka,” upa o ino magena ngini niaodo. Upa sidago ma ngale ona manga siningaka itemo o ino magena datorou de ngini niaodo so to ona manga sininga asa niasirika.

²⁹ Ai ngale gena upa to ngini nia sininga itemo dadoohawa, duma to ona manga sininga nagala niasirika. Igogou, o nyawa kanaga yosano itemo, “Dadoohaso to ngone nanga dupa gena aku o nyawa yabati.

³⁰ Nakoso ngone la poodo gena nanga sukuru o Gikimoika patide kasi, de dadoohaso o nyawa gena ngone inasibicara datorou.”

³¹ Duma ngohi tosango totemo o kia bato paaaka, ngaroko poodo eko poudo gena, o bi moi-moi dangodu ma rabaka hika paaka la aku o Gikimoi wihoromati de wigiliri.

³² Upa sidago o kia naga moi lo niaaka la o nyawa o dorouku niasitura, ngaroko ona o Yahudika ma nyawa, eko o Yahudika ma nyawa yasowo, eko o Gikimoi Awi gogobu.

³³ Koloko ngohi masirete o moi-moi taaaka gena, dangodu ma rabaka maro o kia naga o nyawa yananano daloha. O loha taaaka gena cawali ma ngale ngohi masirete gena hiwa, duma ai edekati ma ngale gena o nyawa yadadala ona lo o Gikimoi aku wasisalamati.