Yunut 2 - Ala Wone Peenok Peebi Mbanak

Yunut nen tamban eereegerak wone

¹ Yunut nogo yikwe inikime nogome yonggolak wonage logonet, Aliku ogoba Ala yoreegerak.

² Tamban eeke logonet, “An niniki aaninggin ndugu aago logonet, noone nggwok paga Kaliku ALA yokkege neenok, onggo yo'nege, Aakumi kambunuk nogo menggam kiiniki paga wonage logonet, Yeenggwa niru o, yinuk, noone nggwok paga yokkege me, noone yi, karuk konengge, Eekendak o.

³ Kat nen niyo nggwok yenggenak laut oolo kiiniki paga lombok mbo wuppanege, Niyo alelo uwe ndingge logonet, nombok-kombok eerogo panege, Niyo kilaarak-mogonik eeke logonet, neebe taanogo panege, Eeke me,

⁴ An nogo, kat wonage me nen mbo panegendak kwe, Kat kawi wurik abu alik leenak nogo an ambinom kaagin aret o, mbake neegak,

⁵ Niyo alobok nen taanogo paniyak eeke, Niyo inikime lombok nen neebe logo eerogo panege, Wore-wore nanobak paga perenogo panege,

⁶ Puut-puut iyok niyo inikime yarak me, ari wangge, Nggween o'luwam lombok wangge neegak, mondok-mondok logorak nduk, nambokan tu narogo panege, Eeke me, Kaliku nogoba Ala o. Niyo kiiniki paga lombok wonage me, pilanogo nippanu o, yinuk, yokkigirak o.

⁷ An niniki abu woroniyak ee'nake kagak Kaliku ALA koba abekkake, An tamban eeke nogo noone ndayo-ndayo karuk me unggwi nage, Kat kawi wurik alik leenak nogome ari unggwage, Eekerak o.

⁸ It inagugiwak we aanom warogo kagak, pippatinuk, eerit nugwi ti, Kat inabuwa nen obeelom eeppiyoorak nogo, it mbo pugwi kwe,

⁹ An perak, Wa! yokkege logonet, kake warogo wokkege, An ndogop eeke logogin o, yinuk, kumbuk mbanggirak nogo ndak-ndak aret eeke, Eerigin o. Ninagap ndaka nogo ti, Kaliku ALA kat aret o,” yinuk, tamban eereegerak.

¹⁰ Tamban eeke mbareegi, Yunut eebe kilirogo wumbuwak nduk, Aliku ALA nen yikwe nogo yoge mbareegi, at Yunut nogo peyak negen wurogo niyo aa'nggi paga wumbereegerak.