Yunut 1 - Ala Wone Peenok Peebi Mbanak

YUNUT WONE

Ala nen kwaakkage kero, mbaganeegerak wone

¹ Aliku ALA nen aap Amitayi aput Yunut wone yoreegerak nogo yi aret.

² Aliku ALA nen ari logonet, “O kota nggwok Niniwe time inomaluk mondok iya lombok eekwi iigirak me, inomaluk mbo puwak nduk wone yora nak o,” yinuk, yoreegerak.

³ Yoreegerak kwe, at Yunut nogo, “Aliku ALA nen ambinom, Nak, yo'nirukwak,” mba'nuk, kole mbaganit o Taritit naakit nduk, o Yope wambi nage nagagerik, o time nen yiiro ambi o Taritit noorak nduk eeke kwaakkage nagagerik, “Aliku ALA kwaa'neege kero,” yinuk, o Taritit noorak onggo pege nagagerik, yiiro nogo paga lagi nanuk, it o Taritit nogwe nogo, inom aret nggarek yereegerak.

⁴ Inom nogwe me, Aliku ALA nen o wiya nggwok wuppi wagagerak oone pu warit yiiro nogo punggagak eeke logonet, yigirik-noonom eerogo pikit nduk eeke kagak,

⁵ it aap yiiro wonok nega abok aret inagabiti aganake mbareegi, inalitak lombok inoone nggwok paga inagugi yeenggwaaraawak nduk yogwi, yiiro aaninggin teeluk aruwak nduk, yi mendek ndi mendek yonggolak nogo abok waganogo niyo laut inikime mbo wuppugwi, eereegwaarak. Ti eekwi iigak, at Yunut nogo yiiro akombaga lombok wambi nage nagagerik, time winna'nuk nogo nggaruk togon yereegerak wonage me,

⁶ aap yiiro unde nogo kwaakkage nagagerik, yoge logonet, “Yogop ee'ninake kagak nonggoti nogo mban yege agandik? At liippinaninuk, nit lek eerogo pinaniyak lek ninagap ndariyak kagak eerukwak, mi'na'nuk, kagugi yoru o.”

⁷ Yoge nagagerik, it nen at ambi yogak, at ambi yogak eeko logonet, “Aap ta nen eekerak paga maluk ee'ninake nineenu aruwok nduk, yugum paga wakkaawok o,” yinuk, wakkogo nogogwaarik, yugum nogo wa'nanok aap Yunut owagam ari nagagerak.

⁸ Ari nage mbareegi, it nen Yunut nogo yogo logonet, “Aap ta nen eekerak paga nit maluk eeppinanege nogo, yo'niret o. Ndi, keyabu ngge eeke menggendak? Ngga nen wagandak? Kawi ngga o? Kanebunu kunduk, aap ngge mendek? Yo'niret o.”

⁹ Yogo mbareegwa, it yorage logonet, “An aap Iberani mendek aret me, niyo nggwok yenggenak laut inom, nggween inom, wakkagagerak mbogut unde menggerak Aliku Ala ayuk wuke minggirak an aret o,” yinuk, yoragagerak.

¹⁰ Yoragagerak nogo konembunuk, inagabiti ambik aganake mbareegi, “Aliku ALA nen kwaa'neege kero, mbaganit wagi o,” yinuk, muk yoragagerak ineenu me, at yogo logonet, “Kat nonggop eekendak o?” yinuk, yoreegwaarak.

¹¹ Yogwi iigak, niyo kole yenggenak laut nogo kilaarak-mogonik eerit lagangge me, at yogo logonet, “Nit lebenninabukwak niyo nggwok yenggenak laut yi, tebe agan wambuwak nduk, kat nonggop eeppagagwi o?”

¹² Yogo mbareegwa, it yorage logonet, “O wiya nggwok warit wage logonet, kit niyo lebengginaburak eeke ti, alom an eekirak paga eeke an neenu aret me, an neebe waganogo niyo kole yenggenak laut inikime mbo wuppanugwi kiinok, niyo kilaarak-mogonik eeke yi, lek aret arigin o.”

¹³ Yorage mbareegi, eyo paga alelo mbaniyak eereegwaarak kwe, o wiya nen niyo abunuk kilaarak-mogonik eeke kenok, meek agagerak me,

¹⁴ inoone nggwok paga Aliku ALA yogo logonet, “Kaliku ALA o. Aap yi, ane'me nineebe lek eerogo pinanugun o. Kaliku ALA wae. Kat eeriyak mbakendak nogo aret eekendak me, aap maluk eeka'lek kagak wakwi niinok, nit ninoba pinaniyak mage o.”

¹⁵ Yo'nuk, Yunut nogo waganogo niyo kole yenggenak laut inikime mbo wuppereegwaarak. Mbo wuppogo mbareegwa, niyo kilaarak-mogonik eeke nogo, abolok lek agagerak.

¹⁶ Lek age mbareegi, it aap ti nen Aliku ALA inagabiti ambik mbako nogogwaarik, Aliku ALA ake warogo wogogo logonet, “Nit kat mban kayuk wuko logonet, Yogop aret eerit nogo logogun o,” yinuk, kumbuk mbaneegwaarak.

¹⁷ Ti eekwi iigak, Aliku ALA nen Yunut nogo ambeme yonggoluwak nduk, yikwe nggwok ambi nappi wagagerak yonggoleegerak inikime wonage kagak nogo kenagan aret yereegerak o.