Yotuwa 9 - Ala Wone Peenok Peebi Mbanak

Aap Nggibeyon mendek nen Yotuwa ambokan laganeegerak wone

¹ It aap inendagembogut niyo Yoraran oonegen kilu yi nage menggim pa'nggwe puut-puut paga wonogwe inom, puut nggelok-nggobok wonogwe inom, niyo nggwok yenggenak laut ambet paga nen, agi puut Libanon kuli aap inendagembogut Ket mendek inom, Amori mendek inom, Kanan mendek inom, Perit mendek inom, Kewi mendek inom, Yebut mendek inom, abok aret at Yotuwa eeke nogo inaruk konenggo nogogwaarik,

² apit aret lambumbunuk, at Yotuwa Iterali inom wim namburuwok nduk, wone mbaneegwaarak.

³ Ndi, it aap Nggibeyon mendek perak, Yotuwa nen aakumi o Yeriko mendek inom, o Ayi mendek inom, eeppiyareegerak inaruk konenggo nogogwaarik,

^4-5 we pilit aret, “Wone yogobi yuwok,” koonggo nogogwaarik, karun nibinik-ndelenak aago maan mendek paga inambi oroti ndeyak ku'lu aago nogo yonggologo keledai amborowak paga kwippugwi, anggur amburu tooko menggaarak ndomba agabolo paga ogobakkigirik maluk nibinik mendek yiluk-yiluk penggaarogo waganggwi, ndi, iniyok ogut nibinik-ndelenak yuwok-tuwok eerak yirikkologwe, inambogoyum abu maluk mili lombok kagak yirikkologwe, eeko nogogwaarik,

⁶ at Yotuwa aakumi Iterali inom o Nggilagan paga ooliya wuppatinuk wonogwe me nogome iniya wogogwaarak. Iniya wogo nogogwaarik, at Yotuwa kunduk, it aap Iterali mendek kunduk, yorogo logonet, “Nit ninawi o nda lombok time nen kit ninom lambumbunuk, wone abuk nggaruk togon mbanuwok nduk, kiniya wogo o.”

⁷ Yorogogwaarak kwe, it aap Iterali mendek nen it Kewi mendek nogo yorogo logonet, “Kit kinawi we korok-korok ninom wonogwe ya'i nen wogotak kiigak, wone abuk nggaruk togon mbanukwak nonggoti o.”

⁸ Yorogo mbareegwa, it nen Yotuwa yogo logonet, “Nit yi ti, kit kinayeloman aret wogo o.” Yogo mbareegwa, at Yotuwa nen it yorage logonet, “Kit taani o? Ndi, nggeeme nen wogo nogotik, yo'nugwi o?”

⁹ Yorage mbareegi, it nen at yogo logonet, “Kit kinayeloman nit yi, ninawi mondok nda lombok nen at Aliku kinogoba Ala endage nggwok agaarak kenok wogo o. At nen o Metit paga eerit nage,

¹⁰ ndi, niyo Yoraran oonegen wundi wage menggim pa'nggwe enebaga aap mbere inendagembogut Amori mendek ambi endage Tikon o Ketibon unde wonage, ndi, ambi endage Ok awi Atitarot logonet, o Mbatan unde wonage, eekwi iigak, eeppiyareegerak nogo ninaruk koneneegurak me,

¹¹ nit ninoweewi inom, it niname ninom monggoorak inom, it abok nen nit yo'nirogo logonet, Tu paga nogo logonet, noorak kinambi kambu ko'nok, it wonogwe me time nogo logomonggotik, yorogo logonet, Nit kit kinayeloman mini aret me, kit ninom lambumbunuk wone abuk nggaruk togon mbanuwok nduk wogo, yoraanu o, yinuk, nappinani wagaarak me,

¹² ninambi oroti yi pekkaanip o. Niname nen ninambi oroti awo worarogo wonok wogoorak yi kwe, abu ndeyak age nagaarik, ku'lu agaarak wonage yi kaanip o.

¹³ Ndi, anggur amburu tookkolagak ndomba agabolo ngget mendek ogobakkigirik paga toologo yonggo'nuk wogoorak kwe, nibi-nibi nage, tu o nda lombok me, wogo logonet, ninayum inom, niniyok ogut nggerenak inom, abu nibinik-ndelenak arit nage, eekerak yi kaanip o.”

¹⁴ Yorogo mbareegwa, at Aliku ALA yoga'lek kagak, it iniki mba'nuk nen inambi kambu ndinik nogo ando waganogo nonggo nogogwaarik,

¹⁵ at Yotuwa nen, “Ninom mondok kunik logowok nduk, kineenik teppinagago o,” yinuk, inom wone abuk nggaruk togon mbangge mbareegi, it aap inoweewi wone koongga nogo nen, “Ala owak o,” yinuk, kumbuk mbanogo pereegwaarak.

¹⁶ Abu aret aap Nggibeyon inom lambunggo nogogwaarik, nogo kenagan yippunuk, “Aap yi, inawi korotok iigak, kinom lambunggotak o,” yinuk, yogwe it Iterali inaruk konenggo nogogwaarik,

¹⁷ ti eyom paga aret nogo mbere yegak ko'lu aakumi ti, iname kota-kota Nggibeyon inom, Kepira inom, Mbeerot inom, Kiriyat-Yeyarim inom, aret pegiya nogogwaarak.

¹⁸ Pegiya nogo nogogwaarik, it Iterali lambunik inoweewi wone koongga nogo nen at Aliku Iterali inogoba Ala owak mbanogo inili eerogo piyareegwaarak me, “Inooriyak lek o,” yinuk, teppiyareegwaarak. Teppiigo mbareegwa, Iterali lambunik abok nen inoweewi nogo ineebi-ineeba inombako mbareegwa,

¹⁹ it inoweewi wone koongga nogo nen it Iterali apit yorogo logonet, “At Aliku Iterali ninogoba Ala owak mbanogo inili eerogo piigoorak me, maluk eerogo piyoorak ti meek o.

²⁰ Nit Ala owak mbanogo ineenik logowak nduk, inili eerogo piigoorak kagak, maluk eeppiigwi niinok, Ala anini ninoba pinanukwak teppiyaawok o. Ndi, teppiyamonggoorak wonogo logonet, eeko logorak perak yi o.

²¹ It ineenik teppiyamonggoorak me, nit abok lambunik ninake ninayeloman logonet, niyo too'nira nagak, ninaga'ni wu'nira nagak, eekak ake aret logowak o,” yinuk, it Iterali inoweewi nen wone koonogo pereegwaarak ti paga aap Nggibeyon inom wone mbaneegwaarak nogo piyok yuulik omaawi aret wonagagerak.

²² Wone nogo koonogo pogo mbareegwa, at Yotuwa nen it aakumi Nggibeyon mendek nogo woraawak nduk, wiiragagerak wogo mbareegwa, yorage logonet, “Kit kinawi korotok yime aret wonogo logonet kwe, Ninawi o nda lombok wonage o, yinuk, wone pilit aret nano nduk yo'nirogotak?

²³ Wone pilit togop yo'nirogotak me, o yogondak nen mondok-mondok ninayeloman logonet, ninogoba Ala awi wurik ake niyo tooli nagak, kani wuri nagak, eeko logomunggup nduk, pulunogo pinagago o.”

²⁴ Yorage mbareegi, it nen wone onggo at Yotuwa yogo logonet, “Nit kayeloman mini yi, aakumi o yime menggaarak abok aret inenggaawak lek eerogo piinok, o nggween yi apit aret, Kit wokkiraagin o, yinuk, at Aliku kinogoba Ala nen eeriyak wone lengganogo ayeloman Muta yoreegerak nogo, liirogon aret ninaruk konenggo nogoorik, kit kineebe paga niniki ma'nage logonet, Nit togop aret ninoorukwak ninagabiti o, yinuk, pilit aret togop eekoorak o, ninogoba.

²⁵ Togop aret me, o yogondak yi paga nit nineebe kit kineenggi paga wonogwe me, nit eekoorak paga eeppinaniyak mbakotak nogo ndak-ndak eeppinaniyak op aret o,” yinuk, yoreegwaarak.

²⁶ Ndi, it Iterali nen inookwi iyo, at Yotuwa nen it inili eerogo teppiyareegerak nogo ti aret.

²⁷ Teppiige nagagerik, ti eyom paga aret Iterali wonogwe abok aret inake eekwi, ndi, at Aliku ALA ake warogo wogogo logowam Aliku ALA nen leenogo patemenggim nogome eekwi, eeko logonet, niyo toogira nogwe, inagani wugira nogwe, eeko logowak nduk, unde eeppiyareegerak me, yogondak kunduk eekwi aret wonogwe o.