Yotuwa 5 - Ala Wone Peenok Peebi Mbanak

Inagabolo mbanggo logonet, laago lareegwaarak wone

¹ At Aliku ALA nen niyo Yoraran mogonogo punuk, nggween wolooneegerak paga it aakumi Iterali wunda wogo mbareegwa, niyo obaane'me nagagerak nogo, it aap inendagembogut Amori mendek niyo Yoraran oonegen kilu yi nage menggim pa'nggwe wonogwe nogo inom, ndi, it aakumi Kanan mendek inendagembogut niyo nggwok yenggenak laut ambet paga wonogwe nogo inom, it abok aret inaruk konenggo nogogwaarik, iniki ma'na'nuk inomanggen tayok ari logonet, it Iterali ineebe paga inagabiti ogogwaarak.

² Ne ti eyom paga at Aliku ALA nen Yotuwa yoge logonet, “Kat nen yugum muuni telenogo punuk, aakumi Iterali mendek o maan inagabolo mbaninabeegerak nogo ndak-ndak yogondak ndarak yi, inagabolo mbaninabu o. ”

³ Yoge mbareegi, at Yotuwa nen yugum muuni telenogo pege nagagerik, puut endage, Inagabolo Mbanggo Logowam, taati nen aakumi Iterali inagabolo mbaninabeegerak.

^4-6 It aakumi Iterali mendek o Metit nen wundi wogo logonet, ndarak iigak, aap yigin woorak ndak-ndak negen ari nagagerak nogo abok aret Aliku ALA wone konengga'lek mbareegwa, at Aliku ALA nen ari logonet, “An nen nggween yilak amburu inom, nggiin amburu inom, niyo eneeri negen kila-kila wungge menggim, Wokkiraagin o, yinuk, kinogobamini koonogo yoragagim nogome, kit kinigen kaamunggup mondok lek o,” yinuk, wone abuk nggaruk togon kumbuk mbanogo yoragagerak me, o karume tahun 40 paga nugu logonet, tigitogon kambit nogwe iigak,

⁷ karume wogo logonet ndarak nogo perak, inagabolo mbanulik me, “Inogobamini inobaane'me inapurilogwe ti aret kola unggwi nawak o,” yinuk, Yotuwa nen inagabolo mbaninabeegerak.

⁸ It inanebunu abok aret inagabolo abu mbaninake mbareegi, inawinoban nogo lek aruwak nduk, inawooliyana lombok puk arit nogogwaarak.

⁹ Inawin nogo abu aret lek ogo mbareegwa, at Aliku ALA nen Yotuwa yoge logonet, “It aakumi nen, O Metit paga inendage lek inayeloman tebenak wonogogwaarak nogo yi aret o, yinuk, meek kinombakwi nogo, o yogondak yi kuli paga Naliku an ALA nen lek eerogo pigin o,” yinuk, yereegerak me, o ti endage Nggilagan yogwe wonogwe aret o.

¹⁰ Ndi, o Yeriko kobappaga o Nggilagan time inawooliya wuppatinuk logonet, tut aa'nduk penenak tanggal 14 o kiyoma laago Obaga Mbo Nagagerak nogo lareegwaarak.

¹¹ Laago endage Obagambo Nagagerak nogo, abu aret lappogo nogogwaarik, ko'lu nen o Kanan paga anggen yugu mbanogo oroti piiruwak nduk pugwi nogo mendek pega'lek kagak nunggwi, ndi, gandum worarogo nunggwi, eereegwaarak.

¹² O Kanan paga anggen yugu nogo mbanogo nonggo mbareegwa, ko'lu ne ti eyom paga mbi mana nogo Iterali ambinom wogoroolik ti kuli paga puk aret agagerak. Wogoraga'lek mbareegi, tahun ti paga o Kanan yarak anggen yugu nogo aret waganogo nonggo nogogwaarak.

Aap yigin unde inowe ambi Yotuwa imbirak lambuneegerak wone

¹³ Ti'nuk, at Yotuwa nogo o Yeriko panggorogon ari woraanuk, enegen ni'nage nagagerik, aap ambi wooluwak eenggime nutik at enaame mi'ndak wonage kagagerak. Kage nagagerik, owagam nanuk, aap nogo yoge logonet, “Kat ninore mendek ilik? Ninawim mendek a?”

¹⁴ Yoge mbareegi, aap nogo nen Yotuwa yoge logonet, “Lek o. At Aliku ALA awuri yigin unde inowe an aret wagi o.” Ari mbareegi, at Yotuwa nogo ena nggween paga wanduk ngginna'nuk, ayuk wuke logonet, “Nogoba o. An kayeloman yi, wone ngge yo'niriyak, mba'nuk, wagan o?”

¹⁵ Yoge mbareegi, at Aliku ALA awuri aap yigin unde inowe nogo nen Yotuwa yoge logonet, “O nggween kat mi'ndak wonage me ti, abu mage lombok me, kiyok ogut nggerenak ti, nggoorogo pu o.” Yoge mbareegi, at Yotuwa nen iyok ogut nggerenak nogo nggoorogo pereegerak.