Yotuwa 4 - Ala Wone Peenok Peebi Mbanak

Aberak logowak nduk, yugum 12 logonogo pereegwaarak wone

¹ It aakumi Iterali mendek abok aret niyo Yoraran wunda wogo logonet, eereegwaarak nogo yi o. It aakumi Iterali mendek abok aret yi Yoraran wunda woraawok nduk eekwi iigak, at Aliku ALA nen Yotuwa yoge logonet,

^2-3 “It aakumi Iterali inanebunu lombok ambitak nggigik eerogo aap 12 leenogo piigendak nogo nen yi Yoraran inikime aap an neebe unde iniyok punuk wonogwe me, yugum 12 waganggak niyo Yoraran enebaga kit yogondak nogo yuwam time pi wundawak nduk yoret o.”

⁴ Yoge mbareegi, at Yotuwa nen it aakumi Iterali inanebunu lombok ambitak nggigik eerogo aap 12 leenak nogo, “Woraanip o,” yoragagerak wogo mbareegwa,

^5-6 yorage logonet, “At Aliku ALA nen eeppinagamenggerak abeko logomunggup nduk, at Aliku kinogoba Ala aloobut mbanak nogo, it aap Ala unde nen awo niyo Yoraran inikime porogo wonogwe me unggwi nogo logomonggotik, kinanebunu ndak-ndak kinalitik-kinalitak yugum kinuumbaga waganggak wunda nanip o. Ndi, yugum pi namonggotak nogo peebi kinapuri nen, Yugum yi nanonduk pugu wonage o? yokkirogwe iinok,

⁷ kit nen it yorogo logonet, Lek o. It aap Ala unde nen wone yugu Aliku ALA aloobut mbanak me yonggolak wonok inaa'nduk yi Yoraran wunda wogo mbareegwa, niyo mogonnagagerak paga nit aakumi Iterali apit aret wunda wogogurak kenok, mondok-mondok abeko logowok nduk, yugum logonak wonage, yorogo logomunggup o,” yinuk, yoragagerak.

^8-18 Yorage mbareegi, Muta nen Yotuwa yoreegerak ndak-ndak Aliku ALA nen it Iterali nogo, “Ndogop eeruwak o,” yinuk, Yotuwa yoreegerak nogo mondok ndak-ndak age worok togon eeruwak nduk, it Ala unde nen Ala aloobut mbanak nogo niyo inikime awo porogo wonogwe me, it aap 12 nogo nen, Aliku ALA nen Yotuwa yoge mbareegi, yoragagerak nogo, ndak-ndak aret inanebunu lombok nen yugum 12 inalitik-inalitak niyo oolo inikime nogome nen waganggak it nogo yi woraawam yi paga aret pi wunda wogogwaarak. Pi wunda wogo mbareegwa, niyo Yoraran oolo inikime it aap Ala unde Ala aloobut mbanak porogo mi'ndak wonogwe me nen yugum 12 pi wundeegwaarak nogo, at Yotuwa nen it nogo yi woraawam nogome logonogo pereegerak yogondak kuli wonage aret o. Ndi, yugum 12 nogo logonogo pege kagak, it Uruben mendek inom, Nggat mendek inom, ndi, anebunu Manate abeenok mogonak nogo inom, at Muta nen yoragagerak nogo ndak-ndak ineebe empat puluh ribu negen aret ineegin li'luk eekko'nok wim namburuwak nduk, Ala enegen kagak inaa'nduk o Yeriko kobappaga yibaga wunda wogwe, ti'nuk, it aakumi Iterali abok aret inambokan mbet-mbet aret wunda wogwe, eereegwaarak. Abu aret age wobok togon wunda wogo mbareegwa, at Aliku ALA nen Yotuwa yoge logonet, “It aap an neebe unde nawone yugu naloobut mbanak me yonggolak piyaninuk nogo menggaarak nogo, niyo Yoraran inikime nen wundi woraawak nduk, yoret o.” Yoge mbareegi, at Yotuwa nen it aap Ala unde nogo yorage logonet, “Yi Yoraran inikime nen wundi woraanip o,” yinuk, yorage mbareegi, aakumi Iterali wunda wogogwaarak nogo abok aret inigen iigak, wundi wogogwaarak. It Ala unde nogo nen wone yugu Ala aloobut mbanak me yonggolak wonok iniyok nggween paga pi wundi wogwe iigak, niyo Yoraran mogongga'lek kagak nggwok wurik wage nagagerak togo'nogo aret nage nagagerak. Ti eeke mbareegi, it aakumi Iterali abok aret kogo nogogwaarik, “At Aliku ALA nen aap Yotuwa iya tit eeppege kogo o,” yinuk, Muta ayuk wuko nogogwaarak nogo kwak, at aap Yotuwa ndak-ndak awo kangga'lek eenik wonage kagak mondok ayuk wuko nogogwaarak.

¹⁹ Aakumi Iterali nogo niyo Yoraran inikime nen wundi wogo nogogwaarik, o Yeriko oonegen wundi wage menggim kuli paga o endage Nggilagan inawooliya wuppatinuk wonogogwaarak ti, tut aa'nduk peneneegerak tanggal 10 ti paga aret eereegwaarak.

²⁰ Ndi, niyo Yoraran inikime nen yugum 12 wonok wundi wogogwaarak o Nggilagan paga logonogo pereegerak nogo

²¹ at Yotuwa nen it Iterali apit kin paga yorage logonet, “O peebi kinapuri nen, Yugum logonogo pugu wonage yi, alom nano nduk eerak wonage? yinuk, yokkirogwe iinok, kit nen kinapuri wone yogop yorogo logomunggup o.

^22-24 Kit nen at Aliku kinogoba Ala mondok kinagabiti mbakwi, ndi, it aakumi o nggween paga yime menggaarak abok aret at Aliku ALA eenggi omaawi lombok menggerak nogo ineenu ogwe, eeruwak nduk, o maan kinombomini Iterali nogo at Aliku kinogoba Ala nen niyo yenggenak Laut Merah mogonogo pereegerak nggween woloonak paga wunda wogo mbareegwa, niyo obaane'me lambungge kogogwaarak nogo kokwak, nit togon, niyo Yoraran mogonogo pereegerak nggween woloonak paga wunda wogo mbareegu, niyo obaane'me nage kogogurak kenok, eerak wonage, yorogo logomunggup o,” yinuk, yoragagerak.