Yotuwa 23 - Ala Wone Peenok Peebi Mbanak

Yotuwa awoneninu Iterali inoweewi kiligiragagerak wone

¹ It Iterali inawim enaagan-ambokan nen mbaaniigwi iyo, at Aliku ALA nen aakumi Iterali iniki ugun tayenak logowak nduk, eeppiyareegerak wonogwe iigak, o ambik me aret ari nagagerak. O ambik me aret ari nage kagak, at Yotuwa nogo abu anggok aret age mbareegi,

² at Yotuwa nen it aap Iterali inoweewi inom, aap wone koongga inom, wone owak loongga nogo inom, wim lenggangga nogo inom, abok aret wiiragagerak wogo mbareegwa, yorage logonet, “An ndarak neegak tahun ambik aret eekirak me, abu aakelo aret ari wagarak o.

³ At Aliku kinogoba Ala alik nen kit kinake wim eeke logonet, yi aakumi ndi aakumi o yime wonogwe eeginake nogo kinigen kogo nogotak o.

⁴ It yi aakumi ndi aakumi an tebenogo piyareegirak inanggween inom, it mugogo wumbiiga'lek wonogwe inanggween inom, yi Yoraran nen nok, yi kole yenggenak laut oonegen kilu yi nage menggim pa'nggwe ti kuli abok aret, kit yate kwak kinanggween unde eeppatinuk logomunggup nduk, an nen muk tumbukkiragagirak nogo abeko logonip o.

⁵ At Aliku kinogoba Ala nen aret aa'nduk a'nuk kinawim tebenogo piige kenok, kit nen mugogo wumbiigo logomonggotik, at Aliku kinogoba Ala nen wone abuk nggaruk togon koonogo yokkiragagerak nogo ndak-ndak aret, inanggween ti paga ye mbambatinuk logomunggup o.

⁶ Togop aret me, kit kina agigan agak, ogugan agak, eerugup o. Ata, kiniki yungguppegak eeka'lek mondok nu'lek logonet, eeko logorak wone yugu Muta nen liiru mbaneegerak nogo abok ndak-ndak, liirogon aret eerit nogo logonip o.

⁷ It yi aakumi ndi aakumi o Kanan mendek mugogo wumbiiga'lek kinom wonogwe ti, kinom kunggologwe, Ala mugurok nogwe obaane'me inagugi mugurok nogo logonet inendage kunggwi, Abet aret o, yinuk, inowak mbanggwi, ndi, inabu'me tebe yinuk inayuk wukwi, eeriyak mage o.

⁸ Ata, aa'nduk eeko nogogutak nogo ndak-ndak aret, yogondak kunduk at Aliku kinogoba Ala mban kiniki oba panggombunuk logonip o.

⁹ Yi aakumi ndi aakumi ineebe ambik inomaawi mondok iya lombok wonogwe nogo, at Aliku ALA nen aa'nduk a'nuk, mugogo wumbiige nagagerak me, o yogondak kuli it aakumi ambi nen kit kiinok, ko wappunuk, wonogwe mondok lek o.

¹⁰ At Aliku kinogoba Ala nen wone koonogo yokkiragagerak nogo ndak-ndak, kit wim eekwi me, at Aliku ALA nen yeenggwa kirage kagak, aap ambit nen aap ineebe seribu aret mugogo wumbiyaagin o.

¹¹ Togop aret me, at Aliku kinogoba Ala kiniki kunik eeko logomunggup nduk, liippinip o.

¹² Ndi, togop eeka'lek, yungguninuk wogo logonet, yi aakumi ndi aakumi wumbiyoolik kinom wonogwe nogo, kinom kiniki ambit a'nuk, komologwe kit mendek it wogonakwi, ndi, it mendek kit wogonakwi, eeko logonet, kinom kunggologwe kiinok,

¹³ at Aliku kinogoba Ala nen aa'nduk a'nuk yi aakumi ndi aakumi ti, mugogo wumbiyaagin lek o. Ata, it aakumi ti nen kit kinenggaanok nggerenggoorak nduk, keele pugu pogom, ta'na pugu pogom, kinambokan paga ya'mbiran nggora eerogo kinooriyak pogom, kinigen paga poondo alok ngguurik pogom, eerogo pinagagwi iigak, at Aliku kinogoba Ala kinanggween obeelom wokkiragagerak yi paga nen kit kineebe lek ogo logomunggup o.

¹⁴ Ndi, an nogo, it yi aakumi ndi aakumi kambunuk, nggwogoba nogogwam nogome nage agarik o. Nogome nage me, at Aliku kinogoba Ala nen, Yogop eeppiyaakit, ndogop eeppiyaakit, yinuk, obeelom wone koonogo yokkiragagerak nogo, ambi mbeyok yuulik tigitogon a'me nggilik-nggelok eereegerak nogo abu kineenu aret o.

¹⁵ At Aliku kinogoba Ala nen, Yogop eeppiyaakit, ndogop eeppiyaakit, yinuk, obeelom eerogo pinagarak koonogo yokkiragagerak a'me aret age nagagerak nogo ndak-ndak, Maluk eekwi kiinok, aaninggin-paaninggin ndogop eeppinagagin o, yinuk, yokkiragagerak nogo eeppinagage kagak, nggween obeelom wokkiragagerak yi nogo paga nen, kinenggaawak lek eerogo pinagage logogin o.

¹⁶ At Aliku kinogoba Ala wone abuk nggaruk togon koonogo punuk, Eeko logonip o, yinuk, yokkiragagerak nogo, taganogo punuk, at mugurok nogwe obaane'me aakumi inagugi mugurok nogo logonet, inabu'me tebe yinuk, ayuk wurit nogwe kiinok, Aliku ALA anini kani kunik negen kinoba kwippinagagin o. Kwippinagage kenok, kinanggween obeelom wokkiragagerak ti paga nen mbet-mbet aret kineebe lek ogo logomunggup o,” yinuk, yoragagerak.