Yotuwa 21 - Ala Wone Peenok Peebi Mbanak

It Lewi mendek inawi kota-kota tumburirogogwaarak wone

¹ Ti'nuk, anebunu Lewi mendek ndarak ndegek inarum menggaarak inoweewi nogo nen aap Ala unde Eleyatat inom, Nun aput Yotuwa inom, it aap Iterali ndarak ndegek inarum menggaarak inoweewi inom,

² o Kanan kota Tilo nogome wonogwe me, inowagam wogo nogogwaarik, yorogo logonet, “At Aliku ALA nen Muta yoge mbareegi, nit yo'nirage logonet, Kit Lewi mendek ti, kinawi kota-kota inom, kinaanggumi inagari'ngga nenet nugu logorak inanggween inom, wokkiraagin o, yinuk, yo'niragagerak nogo aret wo'niraabagip nduk, wogo o.”

³ Yorogo mbareegwa, at Aliku ALA nen Muta yoreegerak nogo ndak-ndak, it Iterali mendek inanggween yate kwak wogoragagerak nogo, ando mogonogo it Lewi mendek ineebe logowak nduk, kota-kota inom, inaanggumi inagari'ngga nenet nugu logorak inanggween inom, wogorogogwaarak nogo yi aret o.

⁴ Yugum iyaalok wakkaanuk, yugum nogo wo'narok it Kekat paga wiganak ndarak ndegek lombok inowagam ari nage mbareegi, at Ala unde Karun paga wiganak it Lewi mendek ti, anebunu Yekura inom, anebunu Timeyon inom, anebunu Mbeniyamin inom, inanggween mbanak paga kota-kota wonage nogo yugum wakkagak kota-kota ando mogonogo 13 wogorogwe,

⁵ ndi, it Kekat paga wiganak ando nogo anebunu Eparayim inom, anebunu Ndan inom, anebunu Manate ando mogonak inom, inanggween mbanak paga kota-kota wonage nogo yugum paga wakkagak kota-kota ando mogonogo 10 wogorogwe,

⁶ It Nggeroton paga wiganak nogo anebunu Itakat inom, anebunu Atet inom, anebunu Natali inom, anebunu Manate ando mogonak o Mbatan wonogwe nogo inom, inanggween mbanak paga kota-kota wonage nogo yugum paga wakkagak kota-kota ando mogonogo 13 wogorogwe,

⁷ It Merari paga wiganak ndarak ndegek lombok nogo anebunu Uruben inom, anebunu Nggat inom, anebunu Tebulon inom, inanggween mbanak paga kota-kota wonage nogo yugum paga wakkagak kota-kota ando mogonogo 12 wogorogwe, eereegwaarak.

⁸ At Aliku ALA nen wone lengganogo Muta yoreegerak ndak-ndak, it Iterali nen yugum paga wakkagak it Lewi mendek inawi kota-kota inom, inaanggumi inagari'ngga nenet nugu logorak inanggween inom, wogorogogwaarak ti aret.

^9-10 Yugum iyaalok wakkogo mbareegwa, yugum nogo wo'narok anebunu Lewi mendek Karun apuri at Kekat paga wiganak ndarak ndegek lombok inowagam ari nagagerak me, anebunu Yekura inom, anebunu Timeyon inom, inanggween mbanak paga yugum wakkagak kota-kota wogorogogwaarak endage ti,

^11-12 kota Kiriyat-Araba ti, Keboron aret me, wogorogwe, ndi, kota Keboron enaagan-ambokan korok-korok inaanggumi inagari'ngga nenet nogo logorak nggween inom, yaga'lelo-yaga'lelo inom, ti aap Yepune aput Kalep unde eeppatinuk, logowak nduk, muk wogoreegwaarak me, kota Keboron wukka wagak o Yekura puut nggelok-nggobok me, inaanggumi inagari'ngga nenet nogo logorak nggween wogorogwe, eereegwaarak. Aap Enak mendek inombo endage ti, Araba aret.

¹³ Aap Ala unde Karun paga wiganak kota-kota wogorogogwaarak ti, aap ambi wappunuk, wakwi iyo, agap ndakko'nok unggwage logowam kota Keboron inom, kota Libana inom,

¹⁴ kota Yatit inom, kota Etemowa inom,

¹⁵ kota Kolon inom, kota Ndebit inom,

¹⁶ kota Ayin inom, kota Yuta inom, kota Mbet-Temet inom, inanebunu mbere Yekura eege, Timeyon eege, inanggween paga kota 9 wonage ti, it Karun paga wiganak wogorogo logonet, kota-kota ti, enaagan-ambokan inaanggumi inagari'ngga nenet nogo logorak nggween inom wogorogwe,

¹⁷ Anebunu Mbeniyamin mendek inanggween paga kota-kota it Karun paga wiganak wogorogogwaarak ti, Nggibeyon inom, Nggeba inom,

¹⁸ Anatot inom, Alomon inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween wogorogwe, eereegwaarak.

¹⁹ At Karun paga wiganak Ala unde kota-kota wogorogogwaarak lambuk togon ti, 13 aret me, kota-kota ti, enaagan-ambokan inaanggumi inagari'ngga nenet nogo logorak nggween inom wogorogogwaarak ti aret.

²⁰ Anebunu Eparayim mendek inanggween mbanak paga kota-kota wonage nogo yugum paga wakkagak ando mogonogo it Lewi mendek Kekat paga wiganak ndarak ndegek ando awo wogoraga'lek wogorogogwaarak nogo ti,

²¹ O Eparayim nggelok-nggobok me aap ambi wappunuk, wakwi iyo, agap ndakko'nok unggwage logowam kota Tikem inom, kota Nggetet inom,

²² kota Kibatayim inom, kota Mbet-Koron inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

²³ Anebunu Ndan mendek inanggween mbanak paga kota-kota wogorogogwaarak ti, kota Eleteke inom, kota Nggibeton inom,

²⁴ kota Ayalon inom, kota Nggat-Irimon inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

²⁵ Anebunu Manate ando mogonak inanggween mbanak paga kota-kota wogorogogwaarak ti, kota Taanak inom, kota Nggat-Irimon inom, kota mbere ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe, eereegwaarak.

²⁶ Kota 10 ti inom, ndi, kota ti, enaagan-ambokan inaanggumi inagari'ngga nenet nogo logorak nggween inom, at Kekat paga wiganak ndarak ndegek wogoraga'lek wogorogogwaarak ti aret.

²⁷ Anebunu Lewi mendek at Nggeroton paga wiganak wogorogogwaarak yi aret. Anebunu Manate mendek ando mogonak inanggween mbanak paga kota-kota wogorogogwaarak ti, aap wappunuk, wakwi iyo, agap ndakko'nok unggwage logowam o Mbatan kota Nggolan inom, kota Mbeteetera inom, kota mbere ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

²⁸ Anebunu Itakat mendek inanggween mbanak paga kota-kota wogorogogwaarak ti, kota Kitiyon inom, kota Ndobarat inom,

²⁹ kota Yarumut inom, kota En-Ngganim inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

³⁰ Anebunu Atet mendek inanggween mbanak paga kota-kota wogorogogwaarak ti, kota Mitan inom, kota Aboron inom,

³¹ kota Kelakat inom, kota Erekop inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

³² Anebunu Natali mendek inanggween mbanak paga kota-kota wogorogogwaarak ti, aap wappunuk, wakwi iyo, agap ndakko'nok unggwage logowam o Nggalileya kota Kereti inom, kota Kamot-Ndot inom, kota Karatan inom, kota kenagan ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe, eereegwaarak.

³³ At Nggeroton paga wiganak ndarak ndegek kota-kota wogorogogwaarak lambuk togon ti, 13 aret me, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogogwaarak ti aret.

³⁴ Anebunu Lewi mendek wogoraga'lek ti, at Merari paga wiganak aret me, at Merari paga wiganak ndarak ndegek lombok wogorogogwaarak yi aret. Anebunu Tebulon mendek inanggween mbanak paga kota Yokeneyam inom, kota Karata inom,

³⁵ kota Ndimina inom, kota Nakalan inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

³⁶ Anebunu Uruben mendek inanggween mbanak paga kota Mbetet inom, kota Yakat inom,

³⁷ kota Keremot inom, kota Mepaat inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe,

³⁸ Anebunu Nggat mendek inanggween mbanak paga aap wappunuk, wakwi iyo, agap ndakko'nok unggwage logowam o Nggileyat kota Aramot inom, kota Makanayim inom,

³⁹ kota Ketibon inom, kota Yayetet inom, kota 4 ti, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogwe, eereegwaarak.

⁴⁰ Anebunu Lewi mendek Merari paga wiganak ndarak ndegek kota-kota wogoraga'lek yugum paga wakkaanuk wogorogogwaarak lambuk togon ti, kota 12 ti aret o.

⁴¹ It Iterali inanggween mbanak paga kota-kota it Lewi mendek wogorogogwaarak abok aret ti, 48 aret me, wogorogo logonet, enaagan-ambokan inaanggumi inagari'ngga nenet nogo logorak nggween inom wogorogogwaarak.

⁴² Kota-kota enaagan-ambokan abok aret inaanggumi inagari'ngga mbanogo nenet nogo logorak nggween wonagagerak me, kota-kota ti, wogorogo logonet, nggween ti, inom aret wogorogogwaarak.

⁴³ At Aliku ALA nen aakumi Iterali inombomini, “Kinanggween wokkiraagin o,” yinuk, wone abuk nggaruk togon kumbuk mbanogo yoragagerak nogo, abok aret aakumi Iterali wogorage mbareegi, kologo nogogwaarik, time aret ye mbambatinuk, wonogogwaarak.

⁴⁴ Wonogwe iigak, at Aliku ALA nen inombomini wone abuk nggaruk togon kumbuk mbanogo yoragagerak nogo ndak-ndak, Aliku ALA nen Iterali inawim abok aret ineenggime piige mbareegi, inawim enaagan-ambokan nen ko wappunuk Iterali inom wim eeriyak meek me, ambi mbaaniiga'lek aret iigak, it Iterali iniki ugun tayenak aret wonogogwaarak.

⁴⁵ Ndi, at Aliku ALA nen aakumi Iterali mendek obeelom eeppiyoorak wone koonogo pereegerak nogo, ambi mbeyok yuulik abok aret a'me nggilik-nggelok eeppiyareegerak.