Yotuwa 2 - Ala Wone Peenok Peebi Mbanak

Aap mbere o Yeriko inigen yombooni nogogwaarak wone

¹ Yogo mbareegwa, at Nun aput Yotuwa nogo o Titim logonet, aap mbere o Yeriko inigen yombooni nawak nduk, kote kumaarogo nappiige logonet, “O yaga'lelo ambik wurik Yeriko ti inom kinigen liirogon pippak yomboombunuk, woro o,” yoraanuk, nappiyareegerak. Nappiige mbareegi, nogo nogogwaarik, kwe ambi ya wukak endage Arakap ame nogo yereegwaarak.

^2-4 Nogo yogo logonet, it aap mbere nogo wogoren tilaabaga kumaappiinok, wonage kagak, it aakumi time mendek nen aap endagembogut Yeriko mendek yogo logonet, “It aap Iterali mendek nit ninanggween yime inigen yomboonuwak nduk, oonikiya wagaarak wonogwe o.” Yogo mbareegwa, aap Yeriko mendek endagembogut nogo nen ayeloman mini nappiyareegerak nogo nogogwaarik, kwe Arakap nogo yogo logonet, “It aap ninanggween abok aret inigen yomboonuwak nduk, wagaarak kame wonogwe ti, wumbiya mok o.” Yogo mbareegwa, kwe nogo nen it aap nogo yorage, “It aap ti, abet aret neya wagaarak kwe, nggeeme nen wagaarak an neenggo'lek me,

⁵ o kiip age kenok, yaga'lelo tu naruwak nduk eekwi iigak, it aap ti wundi nagaarak me, tu nggeeme nagaarak an neenggo'lek me, kit mbet-mbet aret muguren nanip o.”

⁶ At kwe nogo nen aap nogo wogoren tilaabaga nggiru tiirogo woloombereegim enggela'me kumaappiige nagagerik, yoragagerak.

⁷ Nogo yorage mbareegi, it aap nogo nen tu niyo Yoraran wunda nogo menggam nogome, aap ti ineebe kwaarinabit nawok nduk, o Yeriko wundi nogwe iigak, o nogome tu nareegwaarak.

⁸ Tu nappunuk wonogwe iigak, kwe nogo nen aap mbere nogo yugum paga ndoonogo maarak me, nogo yuwok nduk eekwi me, pegiya lagi nage nagagerik,

⁹ yorage logonet, “At Aliku ALA nen o nggween yi muk wokkiragagerak an abu neenu aret me, it aakumi yime wonogwe yi abok aret kit kiinok, inagabiti nen iniki ma'nage logonet, inaganak warit nage agaarik o.

¹⁰ At Aliku ALA o Metit nen wokkiren wundi wage logonet, niyo yenggenak Laut Merah mogombunuk, nggween woloonogo pereegerak paga wumbinagi wage, it aap inendagembogut mbere Amori mendek niyo Yoraran oonegen wundi wage menggim pa'nggwe menggaarak inendage ambi Ok, ambi Tikon imbirak mondok inenggaawak lek eerogo piigwi, eereegutak nogo nit abu ninaruk konenggoorak o.

¹¹ Konenggo nogoorik, at Aliku kinogoba Ala ti, mbogut paga inom, nggween paga inom, at Ala alik aret eebe mondok endak warak wonage logonet, eeppinagage kagak, eerit nogwe kiigo nogoorik, niniki ma'nage logonet, ninagabiti ambik mbako ogoorik o.

¹² Togop aret me, an nen kinabuwa mbake logonet, kinili ari me, kit ndak-ndak nagalomini-nogobamini ninom ninili yuurak abet mbarikit nduk, at Aliku ALA endage kumbunuk, kumbuk mbanogo yo'ninip o.

¹³ Kit nen an nagalo-nogoba inom, niruwi-noreewi inom, it inaaganapuri apit inom, ninooriyak lek abok aret we inaani ninili eerogo teppinaniyak an abet aret mbarikit nduk, neenu agak mendek ambi eeppaninip o.”

¹⁴ Yorage mbareegi, aap mbere nogo nen kwe nogo yogo logonet, “Nit kinili yogwe me ninookwi iinok, nit kit kinake kambuurak op aret o. Ndi, nit eeruwok nduk wogoorak nogo perak, aakumi mondok yoraga'lek puk aret wonage keenok, Aliku ALA nen o yi wo'nirage nogo eyom paga kinabuwa nen yokkogoorak yi, a'me lik yuwak nduk, abet aret kinili yogo logogun o.”

¹⁵ Yogo mbareegwa, kwe nogo ame o kota yugum pak wurik wuka wagak tiyarogon wurik wukagi ambe mbanak me nen keeleluwi paga pugunogo endekem wumbiige logonet,

¹⁶ wone yorage, “It aap kwaakkinabit nogwe nogo kwaakkiyookwak, o endekem puut nggelok-nggobok time kumaarak nogo kenagan yogo logomonggotik, it aap kwaakkinabit nogwe nogo iniyokan wogwe iinok perak, aret namunggup o.”

¹⁷ Yorage mbareegi, it aap nogo nen kwe nogo yogo logonet, “Kat nen, Ninili yuurak abet mbarikit nduk, at Aliku ALA endage kumbunuk, kumbuk mbanogo yo'ninip o, ari mbaken, wone yokkogoorak nogo a'me lik yuwak nduk,

¹⁸ nit o yime tebenggola unggwi wogwe niinok, kat nen keele laambu maa'ngga kunik lombok yi, waganogo wukagi ambe mbanak me nit wumbinani wagandak yi paga pugunogo punuk, kat kagalomini-kogobamini inom, kiruwi-koreewi inom, kit ndarak linik-lenok abok aret kame kuwak eeppiinok wonage kenok, teppinagagun o. Ndi, lek kenok perak, wone yokkogoorak yi, a'me lik yigin lek o.

¹⁹ Togop aret me, nit unggwi wogwe ti eyom paga aap ambi kame yime nen ugun endekem wundi namenggerak paga amiya wungge kenok ti, amiya nit ninoba logogin lek o. At obaalombok oba aret logogin kwe, kame yime kinom wonage me wakwi niinok perak, amiya nit ninoba wonage aret mbarumunggun o.

²⁰ Togop aret kwe, nit ninabok paganogo aakumi yorage keenok perak, Aliku ALA endage kumbunuk, kumbuk mbanogo yo'ninip, ari mbaken, yokkogoorak nogo a'me lik yigin lek o.”

²¹ Yogo mbareegwa, kwe nogo nen, “Op aret o. Kit wone yo'nogotak ti, a'me aret aruwak o,” yoraanok, aap wumbiyareegerak nogo nogwe iigak, kwe nogo nen keele laambu maa'ngga kunik nogo waganogo wukagi ambe mbanak nogo paga pugunogo pereegerak.

²² Ndi, it aap mbere nogo puut nggelok-nggobok nogome nogo nogogwaarik, kumaarak nogo kenagan yugwi iigak, it aap nogo tu paga nogwe iyo, kwaarinabit nogogwaarak mendek ineebe lek mbareegwa, yungguninuk iniyok paga iname Yeriko aret nogogwaarak.

²³ Nogwe iigak, it aap mbere nogo puut nggelok-nggobok nogome nen wambi wogo nogogwaarik, niyo Yoraran mbambunuk, aap Nun aput Yotuwa owagam wogo nogogwaarik, kwe Arakap nen wone yoragagerak nogo inom, o time kogogwaarak nogo inom, mbinuk-mbenak eerogo yoreegwaarak.

²⁴ Mbininogo Yotuwa yogo logonet, “It aakumi o Kanan wonogwe nogo abok aret nit nineebe paga inagabiti nen inaganak nugiranet nogwe iigoorak me, at Aliku ALA nen abet aret o ti nineenggime wo'niragaarak kogo o,” yinuk, yoreegwaarak.