Yotuwa 16 - Ala Wone Peenok Peebi Mbanak

It Eparayim Manate inanggween kuli mbanak wone

¹ Ti'nuk, yugum paga wakkogo nogogwaarik, aap anebunu Yutup paga wiganak mendek inanggween tumburiragagerak kuli ti, o Yeriko niyo eneeri wungge menggim oonegen lagi wage menggim pa'nggwe o kota Yeriko koorok niyo Yoraran aa'nggi paga taati panggombunuk, nok, kota Yeriko kagak, karume nen agi puut nggelok-nggobok o Mbeten ari nanuk,

² o Mbeten ti, o Lut yogo nogogwam aret me, time nen nugwa, it aakumi Ariki mendek wonogo menggam o Atarot ari nanuk,

³ time nen ogu oonegen kilu yi nage menggim pa'nggwe mugurok aap Yapelet inanggween paga ari nanuk, nugwa, o Mbet-Koron abu'me nen, o Nggetet nen, nugwa, irip niyo kole yenggenak Laut Tengah kuli aret wonagagerak.

⁴ Anebunu Yutup paga wiganak it Manate mendek inom, it Eparayim mendek inom, inanggween yate kwak kologogwaarak nogo ti aret.

Anebunu Eparayim mendek inanggween kuli mbanak wone

⁵ Anebunu Eparayim mendek ndarak ndegek lombok yate kwak inanggween kuli nogo yi aret. Yate kwak inanggween kuli oonegen lagi wage menggim pa'nggwe ti, o Atarot-Arat panggombunuk, nok, o Mbet-Koron eneerime pa'nggwe nen nok,

⁶ niyo nggwok yenggenak Laut Tengah nogo kuli aret wonagagerak. O omarip paga pa'nggwe kuli ti, niyo nggwok yenggenak Laut Tengah panggombunuk, nok, oonegen lagi wage menggim pa'nggwe mugurok o Mikemetat agi o omarip paga pa'nggwe nikkagak, yomonogo oonegen lagi wage menggim pa'nggwe o Taanat-Tilo kagak, o Yanowa oonegen kilu yi nage menggim pa'nggwe mangga wagak,

⁷ ogu o ame pa'nggwe mugurok o Atarot nen, Nakarat nen, o Yeriko irip me kagak, niyo Yoraran wambeegerak kuli ti aret.

⁸ Ti'nuk, o nggween kuli ti, o Tapuwa nen nok, oonegen kilu yi nage menggim pa'nggwe niyo Kana ndirok mugurok nugwa irip ti, niyo kole yenggenak Laut Tengah paga panggonak aret wonagagerak. Anebunu Eparayim mendek ndarak ndegek lombok yate kwak inanggween kuli mbanogo wogoragagerak ti aret.

⁹ Ndi, wogorage logonet, anebunu Manate ando mogonak mendek yate kwak inanggween nogo paga kota-kota ando inom, kota-kota ti, enaagan-ambokan yaga'lelo-yaga'lelo inom, mogonogo it Eparayim mendek wogoragagerak mban.

¹⁰ Togop kwe, aakumi Kanan mendek o Nggetet wonogogwaarak nogo mugogo wumbiyoolik me, aakumi Kanan mendek ti, it Eparayim mendek inom wonogo logonet, it inake yabu eeppiigwi o yogondak wonogwe aret o.