Yotuwa 10 - Ala Wone Peenok Peebi Mbanak

Wim eekwi iigak, oonegen puk agagerak wone

¹ At Yotuwa nen o Yeriko inom, aap inendagembogut inom, eeppiyareegerak nogo ndak-ndak, o Ayi kunduk, aap inendagembogut kunduk, togop mban lek eerogo piinok, tebenggolagagerak nogo inom, ndi, it aakumi Nggibeyon mendek aakumi Iterali inom wone mbambunuk, inenggela'me wonogwe nogo inom, aap endagembogut Yerutalem mendek endage Aroniterek nen aruk koneneegerak.

² Aruk konengge nagagerik, “O Ayi ti mbuuluk. Ndi, o yaga'lelo Nggibeyon ti, kota nggwok lombok aap endagembogut ambi abu'me piige menggim kwak wonogo logonet, it aakumi o Nggibeyon mendek tigitogon wim nambuka wakaa'ngget mban wonogwe o,” yinuk, aap Aroniterek inom, at apuri inom, nogo nen aakumi Nggibeyon ineebe paga inagabiti mbareegwaarak.

³ Inagabiti mbako nogogwaarik, aap endagembogut o Yerutalem mendek Aroniterek nogo nen aakumi Keboron mendek inowe aap endagembogut Kokam inom, aakumi Yarumut mendek inowe aap endagembogut Pireyam inom, aakumi Lakit mendek inowe endagembogut Yapiya inom, aakumi Egolon mendek inowe endagembogut Ndebit inom, yorage logonet,

⁴ “Aakumi Nggibeyon mendek nogo nen at Yotuwa inom, aakumi Iterali inom, inom lambunggaarak me, nit nen it aap Nggibeyon mendek inoori nawok nduk, ninom lambuni woraanip o.”

⁵ Yorage mbareegi, aap endagembogut Keboron mendek inom, Yarumut mendek inom, Lakit mendek inom, Egolon mendek inom, Yerutalem mendek inom, it Amori mendek inowe inendagembogut 5 ti, inawuri wim nambuka abok aret inom lambumbunuk, it aakumi Nggibeyon inom wim namburuwok nduk, it wonogwe me mondok panggok togon time aret inawooliya wuri wogogwaarak.

⁶ Wuri wogo mbareegwa, aakumi Nggibeyon mendek nen at Yotuwa o Nggilagan ooliya wuppunuk wonage me, yori wogo logonet, “Kayeloman mini nit yi, aakumi Amori mendek puut nggelok-nggobok wonogwe me time inoweewi inendagembogut abok aret lambumbunuk, ninooruwok nduk, korotok ninowagam panggoni wagaarak wonogwe me, nit kat keenggime wonogwe nogo eraangge mbo pinaniyak ti abu mage o. Ata, ninagap ndariyak nduk, mbet-mbet aret yeenggwa nira woraanip o.”

⁷ Yori nogo mbareegwa, at Yotuwa awuri wim nambuka aap wakaa'ngget inom abok aret it aap Nggibeyon mendek inom a'nuk, wim eeriyak o Nggilagan nen wundi nawok nduk, eeko mbareegwa,

⁸ at Aliku ALA nen Yotuwa yoge logonet, “It ineebe paga kagabiti mbarugun o. An nen muk kineenggime pinagagirak me, it nen ko wappunuk logogun lek o.”

⁹ Yoge mbareegi, at Yotuwa awuri inom o Nggilagan nen oonikiya aret wundi nogo nogogwaarik, nogwe iigak, o weege mbareegi, yini-panip aret inoba kwi'nogwe iigak,

¹⁰ at Aliku ALA nen it aakumi Amori mendek yale-pale eerogo mappiige mbareegi, it Yotuwa awuri inom nen aakumi Amori mendek abok aret, o Nggibeyon time mondok iya aret inoorogo piinok, tu Mbet-Koron lagi nogo menggam nogo paga muguren inoorit o endage Ateka inom, o Makera inom, aret ari nogogwaarak.

¹¹ Inoorit nogo mbareegwa, it aap Amori mendek nogo tu Mbet-Koron paga mbaganit o Ateka ari nogwe me, at Aliku ALA nen mayu kumulinggen nggwok lombok inoba mbo wuppit wagagerak paga kambit nogogwaarak ti, ineebe ambik lombok aret o. Ndi, aakumi Iterali inawooluwak paga inooreegwaarak nogo ti, ineebe mbereeluk aret inooreegwaarak o.

¹² At Aliku ALA nen it Amori mendek aakumi Iterali wogorage mbareegi, inoorit nogwe iigak, at Yotuwa nen Iterali apit inenggaanom paga Aliku ALA yoge logonet, “Oonegen ti, o Nggibeyon irimbaga taati aret puk age, Tut ti, alu'me o Ayalon irimbaga taati aret puk age, Eeru o.”

¹³ Yoreegerak nogo aap Yatat nen liiru mbangge logonet, “Oonegen nogo kilu yi naga'lek puk aret wonage, Ndi, tut nogo wundi waga'lek puk aret wonage, Eeke kagak, It aakumi Iterali nen inawim eeppiyoorak inanini wu aago wonogwe nogo Nini tayok togon inoorit nogogwaarak o,” yinuk, ambuku paga liiru mbaneegerak ndak-ndak aret o ne ambit weege kwak oonegen nogo kilu yi naga'lek mbogut paga time puk aret wonagagerak.

¹⁴ At Aliku ALA nen aap ambi oone ari aruk konembunuk, Iterali inom a'nuk, wim eeruwok nduk, eereegerak ti kokwak, eeka'lek kagak inom, eereegerak kagak inom, togop ambi eeka'lek aret wonage o.

¹⁵ Abu aret eeko nogogwaarik, at Yotuwa nogo aakumi Iterali apit inom inawooliyana o Nggilagan nogome aret wogogwaarak.

Yotuwa awuri inom nen aap inendagembogut 5 inooreegwaarak wone

¹⁶ Wogwe iigak, aap inendagembogut 5 nogo, mbaganit ndo endage Makera nogome aret kumaa'nari nogogwaarak.

¹⁷ Kumaa'nari nogogwaarak nogo it aakumi nen, “Aap inendagembogut 5 nogo ndo endage Makera kumaarak wonogwe iigoorak o,” Yotuwa yogo mbareegwa,

¹⁸ at Yotuwa nen ari logonet, “Yugum yele-kole waganogo ndo ambe paga time mulunogo punuk, wundi wogwe iyo, kit ando inarum wonogwe kiigak,

¹⁹ kit ando perak, kinawim yi, at Aliku kinogoba Ala nen muk kineenggime wokkiragaarak me, it iname kota-kota unggwit nogwe iyo, tat yonggonggolaga'lek inambokan time mondok muguret inoorogo piya nanip o.”

²⁰ Yorage nagagerik, at Yotuwa inom, it aakumi Iterali nogo inom, nen aap ambi teppiyoolik, it abok inenggaawak abu lek eerogo inoorogo piyareegwaarak kwe, it ambitak iname kota pak wurik me mbaganit unggwit nogogwaarak nogo mbo piinok,

²¹ it Yotuwa awuri nogo abok ineebe obeelom aret o Makera paga inawooliya oore'nggam nogome Yotuwa wonage me, ka wogo mbareegwa, aap ambi nen, “Togop eeriyak mendek eekotak o,” yinuk, yoraga'lek inayuk wuppunuk, puk aret wonogogwaarak.

²² Ti'nuk, Yotuwa nen ari logonet, “Ndo tu narak ti, paarogo pogo logomonggotik, aap inendagembogut 5 ti, wogoren an nowagam piya woraanip o.”

²³ Yorage mbareegi, aap inendagembogut nogo ambi Yerutalem mendek, ambi Keboron mendek, ambi Yarumut mendek, ambi Lakit mendek, ndi, ambi Egolon mendek, ineebe 5 nogo ti aret ndoome nen wogoren wundi wogo nogogwaarik,

²⁴ at Yotuwa owagam piya wogo mbareegwa, Yotuwa nen aap Iterali apit aret kuwak ari woraawak nduk, yoragagerak kuwak ari wogogwaarak wonogwe iigak, aap yigin unde inoweewi Yotuwa inom wim nambuko nogogwaarak nogo yorage logonet, “Korotok ya'i wogo logomonggotik, aap inendagembogut yi, inali'luk paga kiniyok aan lebembiirogo logonip o.” Yorage mbareegi, wogo nogogwaarik, iniyok konden inali'luk paga tebembiirogo iigak,

²⁵ Yotuwa nen at awuri nogo yorage logonet, “Kinagabiti mbakwi, kiniki yungguppegak eekwi, eerugup o. It aakumi kinom wim mbanak wonogwe nogo, at Aliku ALA nen yogop eeppiyaagin me, kinogogumbuk kiniki mondok nu'lek eeppatinuk logomunggup o.” Ari nagagerik,

²⁶ aap inendagembogut nogo inoorogo piinok, eyo 5 paga ineebe ndanunogo piigo nogogwaarik, mippiyareegwaarak wonogwe iigak, oonegen aret kilu yi nagagerak.

²⁷ Oonegen nogo abu aret kilu yi nage mbareegi, aap inoorak eyo paga ndanunik wonogwe nogo waganogo wuppiya woraawak nduk, at Yotuwa nen wone lengganogo yorage mbareegi, wuppiya wogo nogogwaarik, ndoome kumaarak wonogogwam nogome inuut ngguluk mambiigo nogogwaarik, yugum yele-kole waganogo tu narogo piyareegwaarak me, o yogondak wonage aret o.

²⁸ Ne ti eyom paga aret at Yotuwa nen o Makera tebenggolage logonet, aap ambit-ambi ineenik teppiyoolik tigitogon inoorogo piige, ndi, o Yeriko aap endagembogut eeppereegerak nogo kwak, aap Makera mendek endagembogut nogo togop aret warogo pege, eereegerak.

Yotuwa nen kota-kota tebenggolagagerak wone

²⁹ Ti'nuk, Yotuwa nogo Iterali abok aret inom o Makera nen o Libana nogo nogogwaarik, inom wim eekwi iigak,

³⁰ at Aliku ALA nen o kota ti inom, aap endagembogut inom, it Iterali ineenggime wogoragagerak me, o Libana tebenggologo logonet, aap endagembogut o Yeriko mendek eeppereegwaarak nogo ndak-ndak, at Yotuwa awuri inom nen aap endagembogut o Libana mendek wakwi, inawi kota time wonogwe nogo ineenik ambi teppiyoolik abok aret wooluwak paga inookwi, eereegwaarak.

³¹ Inooko nogogwaarik, at Yotuwa nogo Iterali inom abok aret o Libana nen o Lakit aret panggok togon inawooliya wuppunuk, inom wim nambukwi iigak,

³² at Aliku ALA nen aakumi Lakit mendek nogo, it Iterali ineenggime wogorage mbareegi, inom wim eekwi iigak, nogo ambi yinuk, ko'lu nen inawi paga kwi'nari unggwogo nogogwaarik, o Libana eereegwaarak nogo ndak-ndak inawi kota nogo tebenggologo logonet, ineebe abok aret wooluwak paga inoorogo piyareegwaarak.

³³ Ti eekwi iigak, o Nggetet mendek inowe endagembogut Koram nen it aap Lakit mendek yeenggwaaroorak nduk, eeri wagagerak mendek, at Yotuwa awuri inom nen aap endagembogut ti inom, awuri ineegin warak inom, ambi teppiyoolik tigitogon aret inoorogo piyareegwaarak.

³⁴ Abu aret inooppunuk, at Yotuwa aakumi Iterali inom abok aret o Lakit nen o Egolon panggoni nogo nogogwaarik, inawooliya wuppunuk, inom wim nambuko logonet,

³⁵ ne ti paga aret o Egolon tebenggologo nogogwaarik, o Lakit paga eereegwaarak nogo ndak-ndak aret, aakumi ineenik wonogwe nogo ambi teppiyoolik abok aret wooluwak paga inoorogo piyareegwaarak.

³⁶ Ti'nuk, Yotuwa aakumi Iterali inom abok aret o Egolon nen o Keboron aret nogo nogogwaarik, inom wim eeppunuk,

³⁷ o Keboron tebenggologo logonet, o Egolon eereegwaarak nogo ndak-ndak, aap endagembogut inom, inawi kota wonogwe nogo inom, o yaga'lelo koorok wonogwe inom, ambiriluk ambi teppiyoolik abok aret wooluwak paga kalirubu pup eerogo inooreegwaarak.

³⁸ Abu aret inoorogo piinok, at Yotuwa aakumi Iterali inom abok aret iniyokan yungguninuk, aakumi o Ndebit mendek inom wim eeko logonet,

³⁹ o Libana inom, o Keboron inom, it inendagembogut imbirak inom, eerogo piyareegwaarak nogo ndak-ndak, aakumi o Ndebit kota wonogwe inom, aap endagembogut inom, o yaga'lelo koorok wonogwe inom, ambit-ambi teppiyoolik abok aret wooluwak paga kalirubu pup eerogo inooppunuk, o Ndebit tebenggologogwaarak.

⁴⁰ At Aliku Iterali inogoba Ala nen wone lengganogo yoreegerak nogo ndak-ndak, at Yotuwa awuri inom nen it aakumi puut-puut wonogwe inom, o karume o ame pa'nggwe wonogwe inom, puut nggelok-nggobok me oonegen kilu yi nage menggim pa'nggwe wonogwe inom, puut elan me wonogwe inom, yi awi ndi awi aakumi ineenik wonogwe abok aret inowe endagembogut inom ambit-ambi ineenik teppiyoolik tigitogon aret kalirubu pup eerogo inoorogo piinok, inanggween tebenggologogwaarak.

⁴¹ O tebenogo piyareegwaarak nogo ti, o Kareti-Mbareneya nen nok, o Nggata kuli inom, nggween Nggotiyen taganak apit aret nen nok, o Nggibeyon kuli inom, abok aret Yotuwa awuri inom nen tebenogo piyareegwaarak.

⁴² At Aliku Iterali inogoba Ala nogo nen inom a'nuk wim eereegwaarak me, at Yotuwa awuri inom ne ambit wundeegwaarak paga aret aap inendagembogut yi abok aret inoorogo piinet nogo nogogwaarik, inanggween tebenggologogwaarak.

⁴³ Abu aret tebenggologo nogogwaarik, at Yotuwa aakumi Iterali inom abok aret iniyokan inawooliyana o Nggilagan nogome aret wogogwaarak.