Yetikiyen 6 - Ala Wone Peenok Peebi Mbanak

O Iterali puut-puut eeppuurak wone

¹ At Aliku ALA nen an yo'negerak nogo yi aret.

² “Aakumi nen ndarak yi wae. It Iterali wonogo menggam puut-puut nogo kena nagiige logonet, eeppiyoorak yorage logot o.

³ Yorage logonet, Kit puut-puut o Iterali wonogwe yi wae. At Aliku Itok Menggerak ALA nen wone yokkirage yi, kinaruk logonip o. Kit puut-puut inom, puut lunik-lunik inom, egwak-egwak inom, o kobak-kobak inom, kit yi wae. Aliku Itok Menggerak ALA nen ari logonet, It paga wonogwe ti, wooluwak paga inoorogo piige, it paga warogo wogogak wurit laganeegwaarak nogo lek eerogo pege, eerikit nduk, eeke me,

⁴ it paga kugi ake warogo wogogo menggam wurik nogo minogo pege, it paga obari abe kaga kani kunggo menggam wurik nogo kalenak-pugunik eerogo pege, it paga kugi ogut eerak enaame time it inapuri inoorogo piinet nage, eerigin o.

⁵ It Iterali ineebe inoorak nogo, inagugi ogut eerak it paga wonage me taati mbo-mbo nappiinet nage, inowak nggininik wonage nogo, inagugi ake warogo wogogo menggam it paga wurik enaagan-ambokan mak eerogo pit nage, eerigin o.

⁶ Puut-puut ti paga kota-kota wurik wonage nogo yigirik-noonom eerogo pege, warogo wogogak wurit laganeegwaarak nogo minogo pege, eerigin me, inagugi inake warogo wogogo menggam it paga wurik nogo yigi'nage logonet, yi oone ndi oone lek age, it paga inagugi ogut eerak wonage nogo, kalenak-pugunik nage logonet, maluk aret age, it paga obari abe kaga kani kunggo menggam wurik nogo mi-mi wangge, it paga eerogo pit nogogwaarak nogo abok aret lek age, eerigin o.

⁷ Ndi, inapuri inoorak it paga ngginnarit nogwe iinok, Naliku ALA an aret ineenu arugun o.

⁸ Togop aret eerogo piyoorak kwe, it ando wooluwak ambeme nen nggigi-nggigi mbaganemenggaarak nogo, yi aakumi ndi aakumi inenggela'me ineenik logowak nduk, eeppiige neenok, it yi o ndi o time aret ma'narit nagun o.

⁹ It ma'narit namenggaarak yi aakumi ndi aakumi kugun wogoren piya nawam inenggela'me time wonogo logonet, kwe ogonggelo mbo punuk, aap alik wagangge menggi kwak, an mbo paninuk, aakumi inagugi ogut eerak inigen kogo logonet, Nit ti aret mugurok nawok lak, ao, mbareegwaarak paga niniki warogo paneegwaarak nogo, iniki abeppunuk, maluk eerit nogwe, ogole warak lombok eerit nogwe, eereegwaarak nogo liippunuk, Nit maluk peyak wurik kagak eekoorak kogo o, yinuk, mbarugun o.

¹⁰ It nen Naliku ALA an aret ineenu ogwe, ndi, aaninggin inoba piyareegirak yi nogo ti, we aret eeppiyoolik it eereegwaarak paga eeppiyareegerak ineenu age, eerugun o,” yinuk, yo'negerak me, yokkiragi o.

¹¹ At Aliku Itok Menggerak ALA nen yegerak nogo yi aret. “It Iterali mendek nen maluk ogole warak lombok ambik eerit nugwi paga wooluwak paga inoorak ngginnogwe, mbi noogelo paga nen kanggwi, kugilingga nen kanggwi, eerugun me, ineenggi yombak, iniyok yombak, yogo logonet, inoone nggwok paga, Ai-ao, yogo logowak o.

¹² It o nda wonogwe nogo kugilingga paga nen kanggwi, it korotok wonogwe nogo wooluwak paga inoorak nggween paga ngginnogwe, ndi, yumbunogo teppiyamenggaarak nogo mbi noogelo paga nen kambit nogwe, eerugun o. Ti eerogo piinet naminggirak paga nanini mbake nogo nini tayok yigin o.

¹³ Yi puut ndi puut tiyarogon paga inom, puut-puut nggorek kirin paga inom, yi eyo ndi eyo engga wiganak alome inom, eyo teno eno'mbak yiganak-wiganak eerak alome inom, it obari abe kaga inagugi inake kani kunggo menggam abok aret inapuri inoorak inagugi ake warogo wogogo menggam enaagan-ambokan ngginnarit namenggaarak wonogwe iinok, Naliku ALA an aret ineenu arugun o.

¹⁴ An neenggi omaawi paga it tebenogo piige, ndi, it wonogo menggam abok aret inanggween o karume panggombunuk nok, o Eribila kuli yi oone ndi oone lek eerogo pege, eerigin o. Eeke neenok, Naliku ALA an aret ineenu arugun o,” yinuk, an yo'negerak me, yokkiragi o, yoragagirak.