Yetikiyen 41 - Ala Wone Peenok Peebi Mbanak

¹ Ti'nuk, aap nogo nen an wo'neren Ala awi wurik ko nggwok ogoorak endekenggwe nogome pani unggunuk, tu nggambe nigabak yugum paga wurik peenok-peenok nogo wakkage logonet, ambin wiganak ti, metet kenagan paga mban wakkage,

² tu unggwogo logowam ambe mbanak ti, metet 5 kuli wakkage, ndi, yugum paga wurit laganeegerak peenok-peenok ambin wiganak ti, metet mbere eeppunuk, ambi oolo inom wakkage, eeke nagagerik, Ala awi wurik ko nggwok ogoorak endekenggwe nogo kunduk, wakkage logonet, irip nggorek nogo ti, metet 20 wakkage, ndi, ambe wiganak nogo ti, metet 10 wakkage, eeke kagagirak.

³ Kage mbareegi, at nogo ko ogoorak akem lombok unggwage nagagerik, tu unggwogo logowam tu nggambe yugum paga wurik nigabak peenok-peenok nogo wakkage logonet, ambin wiganak ti, metet ambit mban wakkage, tu unggwogo logowam ambe wiganak ti, metet kenagan paga wakkage, ndi, yugum paga wurit laganeegerak tu unggwogo logowam ambe peenok paga nen aanunggut kuli ti, metet kenagan eeppunuk, ambi oolo inom wakkage, ndi, peenok togop mban wakkage, eeke nagagerik,

⁴ o ko ogoorak akem lombok wakkage logonet, irip nggorek nogo ti, metet 10 kuli wakkage, ndi, ambe wiganak ti, o ko nggwok ogoorak endekenggwe ambe wiganak ndak-ndak metet 10 paga wakkage, eeke nagagerik, “O mage lombok menggim nogo yi aret o,” yinuk, an yo'nereegerak.

Ala awi yugum paga wurit laganeegerak nogo paga ko ogoorik-ogoorak aago kagagerak wone

⁵ Yo'nege nagagerik, Ala awi yugum paga wurit laganeegerak nogo wakkage logonet, ambin wiganak ti, metet kenagan kuli wakkage, Ala awi yugum paga wurit laganeegerak yendok-wandok aago nogo paga oba kuni unggwagak ko ogoorogo pit nagagerak alitik-alitak ambe wiganak nogo ti, metet mbere paga wakkage, eeke kagagirak o.

⁶ Ko ogoorogo pit nagagerak nogo ti, kenagan paga ta'mban-mban wurit laganeegerak me, ambi ta'mbanak paga ko 30 kuli mban ogoorogo pit nage, ambi ta'mbanak paga ko 30 kuli mban ogoorogo pit nage, ndi, ambi ta'mbanak paga ko 30 kuli mban ogoorogo pit nage, eerak kagagirak. Ta'mban-mban wurit lagangge logonet, muundu nagaberak nogo ti, Ala awi yugum paga wurit laganeegerak nogo paga polonogo manabulik, ata, muundu limbi ungguurak ake eerak nogo paga linogo pit nagagerak kagagirak.

⁷ Ala awi wurik me yendok-wandok yugum paga wurit lagangge logonet, at paga muundu limbegak eeriyak ake wurik me, ko ogoorik-ogoorak aago weenom ndoonak ti, yugum paga wurit laganeegerak ku'mbin lombok eerogo pugu nogo paga, eyo abo nogo limbi unggwage, oolo ta'mbanak nogo togop aret eerogo pi unggwage, oolo irimbaga ta'mbanak nogo togop aret eerogo pi unggwage, eerogo pit lagi nagagerak nogo paga, ko ogoorik-ogoorak aago weenom lombok ambe wiganak mbuuluk negen eerogo pege, oolo ta'mbanak ko ogoorik-ogoorak aago ambe wiganak nggwok negen eerogo pege, ndi, oolo irimbaga ta'mbanak ogoorik-ogoorak aago ambe wiganak abu nggwok lombok eerogo pege, eereegerak kagagirak. Nda'nggi alom weenom ndooneegerak paga nen oolo ta'mbanak kagak nok, agi ta'mbanak paga pi laganeegerak kagagirak.

⁸ Ala awi wurik ogowa yendok-wandok pit nagagerak ti, tiyarogon aret kagagirak me, nogo paga ko ogoorik-ogoorak eerogo pit nagagerak. Ko ogoorik-ogoorak eerogo pit nagagerak irip agi nggorek ti, waanggun ambit paga metet kenagan kuli wakkage,

⁹ ko ogoorogo pit nagagerak yugum paga wurit laganeegerak endekenggwe ambin wiganak ti, metet mbere eeppunuk, ambi oolo inom wakkage, ndi, ko ogoorik-ogoorak Ala awi yugum paga wurit laganeegerak endekenggwe ti inom,

¹⁰ it aap Ala unde inago ogoorak peenok inom, kagak Ala awi wurik yendok-wandok oolo we teppereegerak ambe wiganak nogo ti, metet 10 paga wakkage, eeke kagagirak.

¹¹ We teppereegerak paga nen ko ogoorik-ogoorak aago me ungguwak nduk, tungga mbere mbanogo pereegerak me, ambi mbanak o omarip paga pa'nggwe wonage, ndi, ambi o ame pa'nggwe wonage, eerak kage, ogowa pit nagagim inom, we teppereegim inom, imbirak tabonak me, Ala awi wurik yendok-wandok ambe metet mbere eeppunuk, ambi oolo paga wakkage, eeke kagagirak.

¹² Oonegen kilu yi nage menggim o wurik ena Ala awi wurik oore'nggam pa'nggwe wonage nogo, ambe wiganak ti, metet 35 paga wakkage, o yugum paga wurit laganeegerak yendok-wandok ambin wiganak ti, metet mbere eeppunuk ambi oolo inom wakkage, ndi, o wurik irip nggorek nogo ti, metet 45 paga wakkage, eeke kagagirak.

Ala awi wurik irip-irip wakkagagerak wone

¹³ Kage mbareegi, at nen Ala awi wurik irip nggorek wakkage logonet, metet 50 kuli wakkage nagagerik, ti'nuk, Ala awi wurik oore'nggam peenok-peenok wonage nogo wakkage, awi yugum paga wurit laganeegerak nogo inom wakkage, eeke logonet, aru-ogwe ambe wiganak lambuk togon ti, irip nggorek ndak-ndak metet 50 mban wakkage,

¹⁴ oonegen wundi wage menggim pa'nggwe Ala awi wurik enaame kuli nen nok, oore'nggam inom wakkage logonet, metet 50 mban wakkage, eereegerak.

¹⁵ Eeke nagagerik, Ala awi wurik ambokan o wurik enaame Ala awi wurik oore'nggam we teppereegim koonak wonage nogo wakkage logonet, eebe inom, yugum paga ku'mbin wurik irip-irip inom, wakkagagerak nogo ti, metet 50 mban wakkage kagagirak. Ala awi wurik me unggwogo logowam ko nggwok ogoorak endekenggwe nogo inom, o ko ogoorak akem time inom, unggunuk wone mbanggo logowam enaame oore'nggam pa'nggwe koonak wonage inom,

Ala awi wurik ogobakkigirik kagagerak wone

¹⁶ yugum paga wurit laganeegerak nogo, eyo poorak paga nabenogo pit nage, o ko ogoorak kenagan ti, yendok-wandok tu unggwit nogo logowam inom, pugagi ambe mbuuluk logoppit unggwagagerak mbanak inom, awe aagome inom, ti kunduk abok aret eyo poorak paga nabenogo pit nage, yugum paga wurit laganeegerak akem ti, pugagi ambe mbanak kagak agi inom, ambe mbanak kagak ogu inom, abok aret eyo poorak paga nabenogo pit nage,

¹⁷ ko akem time ungguurak nduk tu unggwogo logowam endekem irimbaga ti kunduk, eyo poorak paga nabenogo pege, ko ogoorak akem time inom, ko nggwok ogoorak endekenggwe inom, yugum paga wurit laganeegerak nogo paga

¹⁸ malayikat kwak kerub ogut inom, eyo nggabu ogut inom, ya nggubuk nda nggubuk ayo waganogo pit nage, eerak kagagirak. Malayikat kwak kerub inalitik-inalitak ti, inetenggen mbere mban wonagagerak me,

¹⁹ etenggen abeenok aap etenggen kwak ti, eyo nggabu ogut ayo wogo peenok wonage nogo pekkage, ndi, etenggen peenok singa etenggen kwak ti, eyo nggabu ogut ayo wogo peenok wonage nogo pekkage, eeke kagagirak. Ala awi wurik paga abok aret togop mban ayo waganogo pit nage,

²⁰ ogu nduk ndoonak paga nen nok, tu unggwogo logowam irimbaga kuli kerub ogut inom, eyo nggabu ogut inom, yugum paga wurit laganeegerak eyo poorak nabenak nogo paga ayo waganogo pit nage, eerak kagagirak.

²¹ O ko nggwok ogoorak endekenggwe tu nggambe peenok-peenok eyo nigabak nogo ti, ambe agi-ogu, aru-ogwe ndak-ndak mbanak me, o mage lombok menggim unggwogo logorak tu nggambe eyo nigabak ti, togop aret wonage kage,

²² ake warogo wogogak eyo paga ogobakkigirik irip agi nggorek metet ambi eeppunuk ambi oolo inom wakkage kage, irip aru-ogwe inom, ambe agi-ogu inom, ti ndak-ndak metet ambit mban aret wakkage kage, ndi, aanunggut inom, iyok inom, kobat inom, ti, eyo paga mban ogobakkigirik wonage kage, eereegirak. Eeke mbareegi, at aap nogo nen an yo'nege logonet, “Eyo ndoonak Aliku ALA enggaanom paga menggerak nogo yi aret o,” yinuk, yo'nereegerak.

²³ Ko nggwok ogoorak endekenggwe unggwogo logorak tungga mbere aago wonage, ndi, Mage Lombok Menggim kunduk, unggwogo logorak tungga mbere aago wonage, eerak mban me,

²⁴ tungga aago alitik-alitak nogo nake-kuuke eeke,

²⁵ yugum paga o wurit laganeegerak eyo poorak nabenak paga malayikat negen kerub ogut inom, eyo nggabu ogut inom, ayo waganogo pit nagagi kwak, o ko nggwok ogoorak endekenggwe unggwogo logorak tungga paga ayo waganogo pit nage, Ala awi wurik me unggwogo logorak wone mbanggo logowam endekenggwe time awe aago wonage,

²⁶ ndi, wone mbanggo logowam yugum paga wurit laganeegerak eyo poorak nabenak peenok-peenok ti paga pugagi ambe logoppit unggwagagerak mbanak nogo peenok-peenok eyo nggabu ogut ayo waganogo pit nage, Ala awi wurik eraanu ko ogoorik-ogoorak endekenggwe time awe aago wonage, eerak kagagirak.