Yetikiyen 3 - Ala Wone Peenok Peebi Mbanak

¹ Kage mbareegi, at nen an yo'nege logonet, “Aakumi nen ndarak yi wae. Kenaame wonage ti, namen o. Mbuku pirik-perek liiru mbanak yi, waganogo nengge logomenggendik, Iterali mendek wonogwe me wone yora nak o.”

² Yo'nege nagagerik, nambe pagambunuk, mbuku pirik-perek eerak ti, naakit nduk, wo'nereegerak.

³ Wo'nege nagagerik, an yo'nege logonet, “Aakumi nen ndarak yi wae. Mbuku pirik-perek eerak an nen wokkigirak ti, kaanogum palek togon namen o.” Yo'nege mbareegi, mbuku nogo ninggigirak. Nengge nagagirik, nambe paga nggiin amburu ombat abe kwak kagagirak o.

⁴ Kage mbareegi, at nen an yo'nege logonet, “Aakumi nen ndarak yi wae. Yogondak kat Iterali mendek kinom lambuni nage logomenggendik, an nen yi wone ndi wone yokkege nogo yora nak o.

⁵ It aakumi inoone abu alik kat yuurak aaninggin nogo mendek wonogwe me nappagage lek o. Ata, it Iterali mendek aret wonogwe me nappagage agarik o.

⁶ Yi aakumi ndi aakumi alik mendek inoone abu alik yuurak aaninggin kat koneniyak meek nogo mendek wonogwe me nappagage lek o. Aakumi ti mendek wonogwe me nappagage neenok, kat koone konenggo logorak kwe,

⁷ it Iterali mendek wonogwe me, nappagage me, kat koone yorage koneniyak ineebi mbarugun o. It Iterali mendek abok aret iniki omaawi inanobak yugum pogom wonogwe me, an noone koneniyak ineebi mbakwi ndak-ndak, kat koone kunduk, koneniyak ineebi mbarugun o.

⁸ Togop me, it inanobak yugum pogom logonet, E-wa, yaga'lek kwak kat togop aret eerogo pagagin o.

⁹ Yugum omaawi kwak lek yugum tumbu lombok kwak kiniki togop aret eeppagage neenok, kenete aagi wuk togon yorage logomunggun o. It ti, an yorage eeriyak ineebi mbaka aret me, yokkugwi paga kagabiti mbake, ndi, eeppagagwi paga kiniki ma'nage, eerubok o.”

¹⁰ Yo'nege nagagerik, ambinom yo'nege logonet, “Aakumi nen ndarak yi wae. An noone yokkege yi, liirogon konengge, abok aret kinikime wagangge, eeru o.

¹¹ At Aliku Itok Menggerak ALA nen yogop yegerak o, yinuk, it kat kanebunu kowe-kawot wogoren mbo piya nagagim wonogwe me yora nak o. Yoramenggendak nogo koneniyak mbakwi kenok konenggwi, mbo puurak mbakwi kenok mbo pugwi, eerugun me, yoroorak mban o.”

¹² Yo'nege mbareegi, at Aberiniki nogo nen an tiyappanege kagagirak o. Tiyappanege mbareegi, nambokan nen inoone nggwok alik negen agan wogwe naruk konengge neegak, “Aliku ALA menggim nen endage tiyappogo logowok o,” yinuk, yogwe iyareegirak.

¹³ Yogwe iyareegirak ti, it iigulik mendek ineebe inalitik-inalitak nen ina'naabit oone lambu-lambu yogwe, wuru iyok kwak perek-parek naga nogo iniyogobit oone yogwe, eeko logonet, oone ngguurubu ari kwak aret agan wogwe naruk koneneegirak.

¹⁴ Konengge mbareegi, Aberiniki nogo nen piyanneren nage mbareegi, nage logonet, neebi lombok mbake, nanini lombok ee'nake, eeke kagak kwe, Aliku ALA eenggi omaawi lombok paga ni'neren

¹⁵ it wogoren mbo piya nagagerak niyo Kebat aa'nggi paga o Ten-Abip wonogwe me nogome pani nagagerak. Pani nage mbareegi, it wonogwe me inenggela'me logonet, “Yi nonggop ee'naki,” yinuk, niniki piirik wonage neegak, nogo 7 aret yereegirak.

Iterali kurumbi yorage logorak Yetikiyen wiireegerak wone

¹⁶ Nogo 7 abu aret yege mbareegi, Aliku ALA nen an yo'nege logonet,

¹⁷ “Aakumi nen ndarak yi wae. It Iterali mendek kenegen wogonake logonok nduk kat aret mippagagirak me, noone yokkege karuk konengge logomenggendik, Aliku ALA nen ndogop yegerak o, yinuk, kurumbi yorage logomunggun o.

¹⁸ Aap maluk eeka ti, abet aret kambigin o, yokkege neenok, omaluk mbo punuk, eenik logowak nduk, kat nen kurumbi yoge, Komaluk mbo pu o, yinuk, koone nabek togon yoge, eeka'lek kenegen mbenaarogo mbo pemenggendak paga maluk eerit nage logonet kangge kenok, amiya ti, kat kobaalombok koba aret wonage, yokkirigin o.

¹⁹ Aap maluk mendek ti, Komaluk mbo pu o, yinuk, kurumbi yoge keegak, omaluk mbo pege, maluk eerit nage nogo mbo punuk, yungguninuk wage, eeka'lek maluk mban eerit nage kenok ti paga kambigin aret kwe, kat perak, kagap ndakkolaamunggun o.

²⁰ Ndi, aap ambi iniki abe koonak nen obeelom mban eerit nage nogo mbo punuk, ti'nuk, maluk eerit nage kenok, an nen iyogobit lik togon eerak wambuwak nduk, non mbanogo piminggirak paga iyogobit lik togon aret kambigin o. Kat nen kurumbi yorulik paga kambigin aret me, at obeelom eerit nage nagagerak nogo an abeka'lek logonet, amiya ti, kat kobaalombok koba aret wonage o, yinuk, yokkirigin o.

²¹ Ti eerigin kwe, aap iniki abe koonak ti, maluk eerukwak kurumbi yoremenggendak paga maluk eeka'lek kenok, yoremenggendak paga at kangga'lek eenik wonage, ndi, kat kunduk, kagap ndakkolage, eerumunggun o,” yinuk, yo'nereegerak.

Yetikiyen oone lek agagerak wone

²² An o time wonage me, Aliku ALA eenggi omaawi paga pi'nake nagagerik, wone yo'nege logonet, “Mi'nage logomenggendik, o kobappaga time nak o. Time namenggendak me, an wone ambi yokkiri wage neyaamunggun o.”

²³ Yo'nege mbareegi, mi'na'nuk, o kobappaga time aret nagagirak. Nagagirak time wonage me, niyo Kebat aa'nggi paga Aliku ALA abu tiyanak eya abinak kagagirak nogo ndak-ndak aret aago wonage kagagirak. Kage nagagirik, nggween paga natenggen wanduk ngginnagagirak.

²⁴ Ngginnage mbareegi, Aberiniki ninikime unggunuk, mippanege nagagirik, an yo'nege logonet, “Kame time keele maarak negen eeppatinuk logonok nduk, nak o.

²⁵ Aakumi nen ndarak yi wae. Aakumi wonogwe me endekem yingge-unggwage eeke logokwak, keele paga maarogo pagagun o.

²⁶ It Iterali mendek ti, an yorage eeriyak ineebi mbaka aret me, kat nen it inaruk waka'lek koone lek logonok nduk, an nen kamili waganogo kalelaan paga nabenogo pagagin kwe,

²⁷ ti'nuk, yoraanok nduk, kambe paarogo pege neenok perak, At Aliku Itok Menggerak ALA nen ndogop yegerak o, yinuk, yorage logonu o. It aakumi ti, an yorage eeriyak ineebi mbaka aret me, koone yoramenggendak koneniyak mbakwi kenok konenggwi, koneniyak ineebi mbakwi kenok mbo pugwi, eeko logowak o,” yinuk, yo'nege kagagirak o.