Yetikiyen 12 - Ala Wone Peenok Peebi Mbanak

Iterali wogoren mbo piya noorak in wakkagak agagerak wone

¹ Ti'nuk, Aliku ALA nen an yo'nege logonet,

² “Aakumi nen ndarak yi wae. It an noone eeriyak ineebi mbaka inenggela'me aret menggendak o. It an noone eeriyak ineebi mbakwi me, inigen wonogwe kwe, inigen kaga'lek aret wonogwe, inaruk wonage kwe, inaruk konengga'lek aret wonogwe, eeko agaarik o.

³ Togop aret me, aakumi nen ndarak yi wae. It an noone yugu eeriyak ineebi mbaka nogo liippugwi iigak eerukwak, it wogoren mbo piya noorak wakkagak kamendek pipuk eeke logomenggendik, o liingge paga it inigen iigak, kat wonage me time nen mbo punuk, o alik me nanu o.

⁴ O liingge inigen iigak, it wogoren mbo piya noorak wakkagak kamendek kame nen endekem wumbege, ndi, o kiyoma inigen iigak, it wogoren mbo piya noorak kwak wundi nage, eerumunggun o.

⁵ It inigen iigak yugum yagat wurik eno pelenogo punuk, kamendek ko'nok eno pelenak me time wundi nage logomenggendik,

⁶ oonikiya paga inigen iigak kamendek nogo kuum paga piyanggo'nok namunggun o. Ndi, it Iterali mendek ineenu agak eeppagagirak me, o ti, kenegen kookwak, kenete paga yum nobappunuk namunggun o,” yinuk, an yo'nereegerak.

⁷ Yo'nege mbareegi, at yo'nereegerak nogo ndak-ndak, it aap wogoren mbo piya noorak wakkagak o liingge namendek pipuk eerak nogo wumbege nagagirik, oonikiya aret neenggi paga yugum yagat wurik nogo eno pelenogo punuk, inigen iigak, namendek nuum paga piyanggo'nok oonikiya paga aret wundi nagagirak.

⁸ Ko'lu kubondendok Aliku ALA nen an yo'nege logonet,

⁹ “Aakumi nen ndarak yi wae. An noone eeriyak ineebi mbaka Iterali mendek nogo nen, Kat eekendak ti nonggop eekendak o? yinuk, yokkegaarak ilik, lek a?

¹⁰ An wone yokkege yi, aap endagembogut o Yerutalem wonage inom, it aakumi Iterali mendek time wonogwe abok aret inom, eeppiyoorak wone aret me, Aliku Itok Menggerak ALA nen yegerak o, yinuk, it yoroorak nogo yi aret.

¹¹ It yorage logonet, An eekirak nogo ti, kit eeppinagarak wakkagak aret eekirak, yoraamunggun o. Eeriyak yokkigirak eekendak ti kokwak, it togop aret aakumi nen keele maageren o nda yime mbo piya woraagun o.

¹² It inowe endagembogut inenggela'me wonage ti, amindik-amendek uum paga ko'nok ame nen wundi wage logonet, oonikiya paga o nggween ti, enegen kookwak yum enete nobappatinuk, yugum yagat wurik eno pelenogo pemenggaarak nogo paga wundi woraagin kwe,

¹³ nayum mbiganogo piminggirak paga yiluk yemenggerak wonage me, it aakumi Katirim mendek inanggween paga o Mbaben yime pi woraagin o. Pi woraagin kwe, o nggween yi, at enegen kaga'lek logonet, yime aret kambigin o.

¹⁴ Ndi, at awuri inom eeka inom, awuri ineegin warak inom, at enaagan-ambokan wonogwe abok aret o wiya yi mendek ndi mendek mak eerogo pege menggi kwak, it togop aret eerogo piyaminggirak mbaganggwi iigak, inambokan wooluwak nutik muguren nagin o.

¹⁵ Yi aakumi ndi aakumi inenggela'me nappiige, yi awi ndi awi abok aret mappiige, eeke neenok, Naliku ALA an aret ineenu arugun o.

¹⁶ Yi aakumi ndi aakumi mbaganit namenggaarak inenggela'me logonet, Nit maluk ogole warak mendek eekoorak paga eeppinanigi o, yinuk, inomaluk paganogo yorogo logowak nduk, wooluwak paga nen, mbi noogelo paga nen, kugilingga paga nen, inooka'lek ando mbuuluk teppiyaagin o. Ti eeke neenok, Naliku ALA an aret ineenu arugun o,” yinuk, yo'nereegerak.

Yetikiyen aganak wake logowak nduk, yoreegerak wone

¹⁷ Ti'nuk, Aliku ALA nen an yo'nege logonet,

¹⁸ “Aakumi nen ndarak yi wae. Kagabiti mbake logonet kambi nengge, kaganak nuk-nuk ari, kiniki mbiimbi warak eeke, eeke logonet kaniyo nengge, eeke logot o.

¹⁹ It o Yerutalem wonogwe inom, it Iterali inanggween paga wonogwe inom, eeppiyoorak Aliku Itok Menggerak ALA nen yegerak it o yime menggaarak yoroorak nogo yi aret. It o time wonogwe nogo nen inogogumbuk logonet, ugun-ugun eeppiinet nugwi paga inanggween paga anebunu pereegerak abok aret lek arigin me, iniki piirik logonet inambi nunggwi, Abu meek ee'ninake o, yinuk, inaniyo nunggwi, eeko logogun o.

²⁰ It aakumi time wonogo menggam o kota-kota nogo yigirogo pugwi, o ti, yi oone ndi oone lek logowak nduk, eerogo pugwi, eekwi iinok, Nalik Ku ALA an aret ineenu arugun o,” yinuk, yo'nereegerak.

Wone eegu laarogo ambi abe, ambi maluk, yoreegerak wone

²¹ Ti'nuk, Aliku ALA nen wone an yo'nege logonet,

²² “Aakumi nen ndarak yi wae. Inabinggaanggo kagaatak a'me aga'lek kagak o yalanggok ari nage menggerak o, yinuk, it o Iterali wonogo menggam wone yogwe nogo ti, nonggop o?

²³ Aliku Itok Menggerak ALA nen yegerak yoroorak nogo yi aret. It yogwe ti, an nen lek eerogo pigin me, it Iterali wonogwe me time ambinom yogo logogun lek aret, yegerak yoret o. It nogo yorage logonet, Inabinggaanggo kagaatak a'me nggelok yagak eeke eyom abu koorok ari wage me,

²⁴ we piliret, Nabinggaanggo kagarak o, yinuk, yogwe, abe lek kagak op yogwe inombaruwak nduk, tili paganggwi, eekwi ti, it aakumi Iterali inenggela'me ambinom eeko logogun lek aret o.

²⁵ Naliku ALA an nen yuurak mbake nogo aret ari neenok, yalanggok arit naga'lek a'me aret age, ndi, it an yorage eeriyak ineebi mbaka awo wonogwe iigak, yoraminggirak nogo ndak-ndak aret age, eerigin o, yinuk, Naliku Nitok Minggirak an ALA nen aret yagi o,” yinuk, yo'nereegerak.

²⁶ Ti'nuk, Aliku ALA nen an yo'nege logonet,

²⁷ “Aakumi nen ndarak yi wae. It aakumi Iterali mendek nen, At abinggaanggo kegetak nogo ti, o peebi eeriyak ari, at yo'nirage nogo ti, o peebi eeppinaniyak ari, eeke agaarik o, yinuk, yogwe ti iyet o.

²⁸ It togop aret yogwe me, At Aliku Itok Menggerak ALA nen yegerak yoroorak nogo yi aret o. An nen eeriyak ari ti, ambit iluk ambi yalanggok aga'lek mbet-mbet aret age, ndi, yiminggirak nogo ti, mbeyok ariilik a'me nggelok ari, eerigin o, yinuk, Naliku Nitok Minggirak an ALA nen aret yagi o,” yinuk, yo'nereegerak.