Yetikiyen 10 - Ala Wone Peenok Peebi Mbanak

Ala abinak at awi wurik paga wonage nogo lek agagerak wone

¹ Ti'nuk, it malayikat negen kerub inirimbaga o oolo taati wone lengganogo yorage menggim negen yugum permata laturit kwak wonage kagagirak.

² Kage neegak, Aliku ALA nen aap ayum abu yawenak yirik nogo yoge logonet, “It malayikat negen kerub iniyok pugume wuru iyok kwak perek-parek naga wonogwe inenggela'me time unggunuk, it kerub wonogwe me time kani anggen kere ari keenggime kabelogo wagangge logomenggendik, o kota ti paga yumbunogo wuppit nak o.” Yoge mbareegi, nenegen neegak, yogim time unggwi nage kagagirak.

³ Unggwi nage kagak, it kerub ti, Ala awi wurik me o ame pa'nggwe time mi'ndak wonogwe iige, ndi, ndugwi oore'nggam akem time lenggenogo pugu wonage kage, eereegirak.

⁴ Kage neegak, it kerub inirimbaga Aliku ALA abinak wonage nogo lagangge nagagerik, Ala awi wurik tu unggwogo menggam irimbaga ari nage mbareegi, at awi wurik inikime time ndugwi nogo, yagabit eerogo pege, oore'nggam nogome Aliku ALA abinak lombok pindanogo pege,

⁵ eeke mbareegi, at Omaawi Lombok Menggerak Ala oone ari kenok konenggo mengga kwak, it kerub ina'naabit oone ari nogo oore'nggam endekem time konenggwi iyareegirak o.

⁶ At Aliku ALA nen aap ayum abu yawenak yirik nogo wone lengganogo yoge logonet, “It kerub iniyok pugume it perek-parek naga wonogwe inenggela'me kani komo wamen o,” yoreegerak nogo, wa unggwi nage nagagerik, perek-parek naga ambi eraanu mi'nari nagagerak.

⁷ Mi'nage mbareegi, kerub ambi nen eenggi nderogon it inenggela'me kani komo wonage nogo, ando wagangge nagagerik, aap ayum abu yawenak yirik nogo eenggime pege mbareegi, aap nogo nen wonok wundi nage kagagirak.

⁸ It kerub ina'naabit abu'na ti, aap ineenggi pogom wonogwe iyareegirak.

⁹ It kerub ineraanu wuru iyok kwak perek-parek naga 4 wonogwe ti, perek-parek naga ambi kerub imbirak kunik, ambi imbirak kunik, eerak lombok me, perek-parek naga ti, yugum permata pirus abinak kere'li-kere'lo aago pogom wonogwe iyareegirak o.

¹⁰ It perek-parek naga ineebe 4 ti, inetenggen ambit mban eerak me, at ambi perek-parek naga karo-karo logonet, at ambi perek-parek naga inikime mippugu wonage kagagirak.

¹¹ Togop eerak wonogwe me, it nogo logonet kenok, agi-ogu, aru-ogwe, ugun aga'lek it kerub iniki noorak mbakam nogome mban nogwe, agi-ogu aru-ogwe aga'lek it kerub, Ndime noorak, ina koonak nogome mban mugurok nogwe, eekwi iyareegirak o.

¹² It inambokan paga, ineenggi paga, ina'naabit paga, ineebe inaagan-ambokan abok aret inigen warak mban wonogwe, ndi, perek-parek naga 4 inom kunik ti kunduk, inigen togop mban warak wonogwe, eerak iyareegirak.

¹³ Wuru iyok kwak perek-parek naga inendage ti, “Perek-Parek Eeka o,” yinuk, yogwe naruk koneneegirak.

¹⁴ It kerub ti, inalitik-inalitak inete 4 mban me, inete ambi ti, malayikat kerub pogom, inete ambi ti, aakumi pogom, inete ambi ti, singa pogom, ndi, inete ambi ti, towe nggindooni pogom, wonogwe iyareegirak.

¹⁵ Ti'nuk, it kerub ti, agi laganggwi iyareegirak o. An aa'nduk niyo Kebat aa'nggi paga logonet, it iigulik mendek iyareegirak nogo ti, it ti aret.

¹⁶ It kerub ti, nogwe iinok, it perek-parek naga ineraanu wonogwe nogo kunduk nogwe, ndi, it kerub ina'naabit paga aret wiga agan nggween irimbaga nogwe iinok, it perek-parek naga ti, ineraanu nabenak me inom aret nogwe,

¹⁷ ndi, it kerub puk ogwe iinok, perek-parek naga kunduk, puk ogwe, it kerub agi laganggwi iinok, perek-parek naga kunduk, inom aret laganggwi, eekwi iyareegirak. Ti eekwi iyareegirak nogo ti, it iigulik mendek iniki ti, it perek-parek naga inikime wonogwe me, inom aret nogwe iyareegirak o.

¹⁸ Ti'nuk, Aliku ALA abinak at awi wurik me tu unggwogo menggam ari nagagerak nogo, time nen lagi nanuk, it kerub wonogwe inirimbaga time ari lagangge kagagirak.

¹⁹ Kage nagagirik, nenegen neegak, it kerub nogo ina'naabit wigambunuk nggween paga nen agi laganggwi iigak, it perek-parek naga nogo inom aret laganggo nogogwaarik, Aliku ALA awi wurik me tu unggwogo menggam oonegen lagi wage menggim pa'nggwe wonage nogo, time puk ari laganggwi iigak, it Iterali inogoba Ala abinak nogo it inirimbaga taati aret wonage kagagirak.

²⁰ Ti eekwi iyareegirak nogo ti, an aa'nduk niyo Kebat aa'nggi paga logonet, iigulik mendek Iterali inogoba Ala abu'me wonogwe iyareegirak nogo it ti aret. It ti, malayikat negen kerub aret iyareegirak kagi, yinuk, liippereegirak.

²¹ It kerub ti, inalitik-inalitak inete 4 mban wonogwe, ina'naabit kunduk, 4 mban wonogwe, eerak me, ina'naabit abu'me time aap ineenggi pogom wonage,

²² inetenggen ti, an niyo Kebat aa'nggi paga inetenggen iyareegirak nogo ndak-ndak aret wonogwe, ndi, it inalitak lombok tu koonak inaame paga mban nogwe, eekwi iyareegirak o.