Yetikiyen 1 - Ala Wone Peenok Peebi Mbanak

YETIKIYEN WONE

ITERALI EEPPIYOORAK KAGE NAGAGERIK, YORAGAGERAK WONE (Pasal 1-24) Aliku ALA tiyanak kagagerak wone

¹ Tahun 29 eeppunuk, ambi eerak tut 3 penembunuk, ambi penenak tanggal 5 tut ti paga an aakumi mbo piya nagagerak ninom niyo Kebat aa'nggi paga wonogwe me, nabinggaanggo paga mbogut tu paarak kagak Ala nonggop aago wonage nogo nenegen kagagirak.

² Aap endagembogut Yoyakin nogo keele maa'nuk wonok mbo pi nogogwaarak wonage kagak, tahun 4 eeppunuk, ambi eereegerak me, tut 4 penembunuk, ambi penenak tanggal 5 tut ti paga

³ aap Mbuti aput Ala unde an Yetikiyen nogo, aap Mbaben inanggween niyo Kebat aa'nggi paga wonage me, Aliku ALA nen nabinggaanggo paga yo'nege, Aliku ALA omaawi noba pani wage, eeke kagagirak o.

⁴ Nenegen kage neegak, o omarip paga pa'nggwe nen wiya warit wage logonet, ndugwi kole logonak enggela'me kani omoonuk eya pindan-pindan eerak wonok wage, ndugwi nogo eya wanggeppunuk wonage, kani kunik inikime ti, mbuti tembaga abinak kwindagala eerak kwak wonage, eerak nenegen kagagirak o.

⁵ Ndi, kani ti enggela'me aakumi nen iigulik mendek ineebe 4 aap inete pogom wonogwe iyareegirak kwe,

⁶ it inalitik-inalitak inete 4 mban wonogwe, it tigitogon ina'naabit 4 mban wonogwe,

⁷ inaawi abu koonak lombok me, iniyok ti, tapi inaagalogwe iniyogobit negen logonet, mbuti tembaga abu koorak pigan-pigan aago kwak wonogwe,

⁸ it ineebe peenok-peenok inaagan-inambokan ina'naabit 4 abu'me aakumi ineenggi kwak aago wonogwe, eerak iige, it ineebe 4 ti, inete inom, ina'naabit inom, togop mban aago wonogwe iige, eereegirak.

⁹ It apit aret at ambi a'naabit at ambi a'naabit paga kunik, at ambi a'naabit at ambi a'naabit paga kunik, eerak wonogwe me, nogwe kenok, ina agi-ogu yaga'lek inaame koonak mban nogwe iyareegirak.

¹⁰ It inete ti, yogobi aret. It ineebe 4 abok aret inete ti, aakumi pogom wonogwe, ineeben peenok ti, inete singa pogom wonogwe, ineeben peenok ti, inete lembu pogom wonogwe, ndi, inambokan ti, inete towe nggindooni pogom wonogwe, eerak iyareegirak.

¹¹ It inete ti, togop aago kagak, it ina'naabit mbiganogo nippugu wonogwe iyareegirak o. Ina'naabit mbere ti, at ambi a'naabit at ambi a'naabit paga kunik, at ambi a'naabit at ambi a'naabit paga kunik, eerak logonet, it ina'naabit mbere ti paga ineebe nobappatinuk wonogwe iyareegirak.

¹² Eerak logonet, iniki nen, “Ndime noorak,” mbakwi kenok, it abok aret ina agi-ogu aga'lek koonak mban aret nogwe iyareegirak.

¹³ It iigulik mendek ineebe ti, kani kunik kwak, ndi wuninik kwak, wonogwe iyareegirak o. Inenggela'me time kani wunuk ari ti nen wunuk agan nage, wunuk agan wage, eeke logonet, abinak kerek ari nagaatik, kimbik eerogo nagabit nage kagagirak o.

¹⁴ Ndi, it iigulik mendek ineebe ti nen, o kimbik eeke menggi kwak mbet-mbet aret nanuk, wagak eekwi iyareegirak o.

¹⁵ Aakumi nen iigulik mendek inete 4 nogo, ti eekwi iige logonet, inalitik-inalitak ineraanu nggween paga wuru iyok kwak perek-parek naga nogo mendek wonage kagagirak.

¹⁶ Perek-parek naga ti, yogobi aret ogobakkigirik o. Inete abok ndak-ndak yugum permata pirus abinak kere'li-kere'lo eerak kwak wonage me, at ambi perek-parek naga karo-karo logonet, at ambi perek-parek naga inikime mippugu wonage kagagirak.

¹⁷ Eerak wonogwe me, it nogo logonet kenok, agi-ogu aga'lek it iigulik mendek ineebe 4 nogo, ina agi-ogu, aru-ogwe, noorak mbakam nogome mban nogwe iyareegirak.

¹⁸ Perek-parek naga ti, ambe kole aakumi inamineeri ne agan noorak mendek aago logonet, yengget-wangget abok aret inigen warak wonage kagagirak o.

¹⁹ It iigulik mendek ineebe nogwe iinok, perek-parek naga ti kunduk, it ineraanu perek-parek nogwe, ndi, o tiyarogon wiga agan nogwe iinok, perek-parek naga ti kunduk, wiga agan nogwe,

²⁰ It iigulik mendek iniki, “Ndime noorak,” mba'nuk nogwe iinok, perek-parek naga ti, it iigulik mendek inikime wonogwe me, inom wiga agan nogwe,

²¹ it iigulik mendek nogwe iinok, perek-parek naga ti kunduk nogwe, it iigulik mendek puk ogwe iinok, perek-parek naga nogo puk ogwe, ndi, it iigulik mendek nen tiyarogon wiga agan nogwe iinok, perek-parek naga nogo ti, it iigulik mendek inikime wonage me, inom wiga agan nogwe, eekwi iyareegirak.

²² Mbogut tabak ndoonak pugagi abu abe abinak pindan-pindan eeke kenok, “Wi!” yogo mengga kwak, it iigulik mendek inanobak irimbaga togop aago wonage kagagirak.

²³ Inanobak irimbaga tabak abu'me ina'naabit wiganak koonak mbere ti, at ambi a'naabit at ambi a'naabit paga kunik wonage, ndi, ina'naabit mbere ti, inalitak lombok ineebe paga nobappatinuk wonogwe, eerak iyareegirak.

²⁴ It nogwe iinok, ina'naabit oone ti, niyo taakut oone, “Wo,” wangge menggi kwak, at Omaawi Lombok Menggerak oone ari menggi kwak, ndi, aap ineegin warak ineebe apit aago wim eeriyak nogo logonet, iniyogobit oone agan nogo mengga kwak, togop aret agan nogwe iyareegirak kwe, puk ogo logonet perak, ina'naabit lingginggologwe iyareegirak o.

²⁵ Linggimbatinuk wonogwe iigak, inanobak irimbaga mbogut tabak ndoonak kwak time nen, oone ari naruk koneneegirak.

²⁶ It inanobak irimbaga tabak ndoonak nogome wone lengganogo yorage menggim yugum permata laturit paga ndoonak wonage, ndi, wone lengganogo yorage menggim ndoonak irimbaga tiyarogon aap kwak ambi kwi'ndak wonage, eeke kagagirak.

²⁷ At omarip irimbaga ti, mbuti kani worakwi me, kere eerogo pege menggi kwak wonage, ndi, at omarip abu'me ti, kani omoonuk wunuk ari enaagan-ambokan wanggerak pindan-pindan eerak kwak wonage, eeke kagagirak o.

²⁸ O mayu wage logonet, ndugwi lenggenak wonage paga mbulu nagabak menggi kwak, eya abinak at enaagan-ambokan wanggerak wonage kagagirak. Kage nagagirik, “Aliku ALA tiyanak lombok eya eerak negen aret kagi,” yinuk, ngginna'nuk, nena nggween paga wandunik wonage me, at ambi nen oone ari naruk koneneegirak o.