Yetaya 66 - Ala Wone Peenok Peebi Mbanak

Yi aakumi ndi aakumi inowak looniyak wone

¹ Aliku ALA nen yegerak nogo yi aret. “Mbogut paga ti, noone lengganogo yorage minggim aret. Ndi, nggween paga ti, nabu'me piige minggim aret. An nawi nonggop negen wuriyak nduk yogo ogotik? Ndi, an namborowak koongge logorak nggeeme o?

² Yi mendek ndi mendek ogobakkigirik yi, an nen mban ogobakkigireegirak me, Aret wonage menggerak nogo lek a?” yinuk, Aliku ALA nen yegerak o. “It aap iniki tebenak wonogwe, Maluk eekirak, ao, mbakwi, noone ari neenok inaganak wake, Eekwi iinok, An liippiige minggirak kwe,

³ It aap tapi ngguunok warogo nake kani kunggwi ti, aap wakwi kwak aret eekwi, Ndomba aagaluk warogo wo'nugwi ti, nggeewo enggaanok koguk wakwi kwak aret eekwi, Gandum anggen yigirik an wo'nugwi ti, wam amiya kilirogo an wo'nugwi kwak aret eekwi, Obari abe kaga kani kunggwi ti, kugi ogut alut eekwi kwak aret eekwi, Eeko menggaarak o. It aap ti, inalik iniki mba'nuk eeriyak miippunuk eerit nugwi, Ogole warak mendek mban eerit nugu logorak inikilom mbakwi, Eeko menggaarak me,

⁴ An kunduk it eekwi onggo mondok alik negen eeppiyoorak koonogo pege, Inamineeri ne agan noorak mendek inoba kwippege, Eerigin o. An nen wiirage neenok, inoone onggo ambi yo'nugwi, An nen wone yorage neegak, inaruk konenggwi, Eeka'lek logonet, An nenggaanom paga maluk mban eekwi, An eeriyak neebi mbake nogo aret miippunuk mugurok nogwe, Eereegwaarak kenok yagi o,” yinuk, yegerak.

⁵ Aliku ALA nen ari kenok kinaganak waka kit yi wae. At yegerak yi, kinaruk liirogon konenggo logonip o. It kinoreewi nen ineebi kinombakwi, An nayuk wukwi kiinok mbo pinagagwi, Eekwi nogo nen yogo logonet, Kit ale'nggen mbako monggotak kiyaawok nduk, Aliku ALA eeke paga endage tiyak ari nogo, Nit ambi eeke kaawok o, yinuk, Yagaarak kwe, eeka'lek kenok, inenggali kaagun o.

⁶ O kota time nen noone-koone agan nogwe, Ala awi wurik me nen oone agan wage, Eekwi ti, kinaruk logonip o! Aliku ALA inom ogoorak nogo eekaarak onggo ndak-ndak eeppiige logonet, oone ari ti aret o.

⁷ Aliku ALA nen ari logonet, “O kota ti, kwe kwak enegen paganak yagan waka'lek kagak aagaluk muk ndake, Ndi, ndariyak awo yagan waka'lek kagak aagaluk muk aap aret ndake, Eekerak o.

⁸ Ti eekerak nogo ti, ta nen aruk konengge, Ta nen togop ariyak nogo enegen kage, Eekerak mbakop? Lek aret o! Kwe ambi aagaluk ne ambit ndake menggi kwak, o ambi ne ambit aret mi'nage, Ndi, aakumi ambi mendek nen ne ambit liingge pilak yogwe, Eeriyak op mbakop? Lek aret kwe, O Tiyon perak, yagan awo wake kagak aagalogwe ndarogo piige agaarik o,” yinuk, yegerak o.

⁹ Aliku ALA nen ari logonet, “An nonggop togon elege logombunuk kole aruwak nduk koonogo punuk, Ti'nuk, nda'naruwak nduk tu paarogo pega'lek mbo puurak mbakop? An togop eekeelik o,” yinuk, ari, Kinogoba Ala nen, “Nda'naruwak nduk tu paarogo pege, ndi, nda'nage kenok, tu narogo pege, Eekeelik mbakop? Eeke minggirak aret o,” yinuk, ari, Eeke menggerak.

¹⁰ Togop me, kit o Yerutalem kiniki kunik eeko monggotak yi wae. O Yerutalem ti, agalo kwak logonet ale'nggen mbake me, kinom kinale'nggen mbakwi, Aagalogwe ambik ndarogo piigerak paga keekok yogwe, Yagan wake kagak kinom le yogo nogotak kit yi wae. At yogondak ale'nggen mbake me, kinom kiniki ale'nggen mondok alik negen mbakwi, Eeko logonip o.

¹¹ At elak amburu abe nenok kiniki yamu ari, Elagalom nggwok me, ndonggorogon nenok, kinale'nggen eekkinake, Eerigin o.

¹² At Aliku ALA nen yegerak yi aret o. “Niyo nggwok porok ari lek nage mban menggi kwak, eebe obeelom nu'lek logowak nduk, eeppi wage, Niyo wuketak ilin-unggut ee'nuk wage menggi kwak, aakumi inanebunu lombok inamindik-inamendek wonok iri woraawak nduk nappi wage, Eerigin me, At elak kuninake, ayum paga yonggorinake, kilirogo piinok leeninake, Eerigin o.

¹³ Kwe ambi aagaluk yonggongge menggi kwak an nen it iniki yonggoninake, Ndi, it o Yerutalem wonogwe me, iniki kwippiige, Eeke logogin o,” yinuk, yegerak me, yokkiragi o.

¹⁴ Ti eekkinake nogo kogo logomonggotik, kiniki ale'nggen nggwok lombok mbakwi, Iri'ngga awo lagangge logonet, mondok kwit agan lagangge menggi kwak kit kineebe togop aret ogwe, Eerumunggup o. At Aliku ALA eenggi omaawi ayeloman mini kaawak nduk, eeppiige logogin kwe, At inom ogoorak nogo perak, anini inoba kwippiige logogin o.

¹⁵ Aliku ALA kani wunuk ari enggela'me wage, O wiya nabuninuk wage menggi kwak at anggweendo paga wage, Eerigin, mbako logonip o. Anini inoba piinet nage logonet, mondok wuk togon aret inoba piinet nage, Ndi, mberirenet nage logonet, kani wunuk agan nage menggi kwak agan nage, Eeke logogin o.

¹⁶ Aliku ALA nen yi aap ndi aap maluk eeko nogogwaarak onggo eeppiige logonet, kani nen nenet nage logowak nduk nappege, Awooluwak paga inoorit nage, Eerigin me, Aliku ALA nen it aap ineebe apit aret inoorigin o.

¹⁷ Aliku ALA nen ari logonet, “It aap kelonggon awi wurik me unggwi nawok nduk eeko logonet, inoba mbeenggologwe, inabin kookkologwe, eeppunuk, at kugi aanggo warak enggaanggum inom, ambeya inom, yi mendek ndi mendek ogole warak mendek inom, nengge menggerak inenggela'me wonage inom unggwogo menggaarak nogo ambugwi aret inenggaawak lek arugun,” yegerak o.

¹⁸ “Aakumi inanebunu lombok abok aret inom, inoone alitak abok aret inom, eeriyak iniki koonogo pugwi, eerit nugwi, eeko menggaarak abok aret an neenu me, wage logominggirik, Kuwak ee'nip o, yoraminggirak kuwak eekwi iinok, an tiyanak logonet iya tit eeppiinet nage nogo inigen kaagun o.

¹⁹ Eeppiinet naminggirak ineebe yumbunik inenggela'me ineenu agak ambi eerigin o. It aakumi inanebunu lombok o Taritit, Pun, Lut inom, o Metek, Iroti inom, Tuban, Yawan inom, nggween ku'mbanak o nda irip-irip time an eeke minggirak wone awo inaruk konengga'lek wonogwe, an tiyanak lombok minggirak nogo inigen kaga'lek wonogwe, eekwi nogo inom, it yumbunogo piyaminggirak nogo nappiyaminggirak aakumi inanebunu lombok inenggela'me time an tiyanak lombok logonet, iya tit eeppiige minggirak nogo yoranet nugu logogun o.

²⁰ It yumbunik nappiyaminggirak ti nen kit kinoreewi abok aret aakumi inanebunu lombok inenggela'me wonogwe nogo kuda paga, nggweendo wim eeka paga, nggweendo paga, keledai paga, unta paga, wogoren iniyokan Naliku ALA nake warogo wo'nogo mengga kwak, nabuut abu alik leenak o Yerutalem nabu'me piya woraagun o,” yinuk, Aliku ALA nen aret yegerak o. “It aakumi Iterali nen tenggap abu leenak nogo paga gandum yigirik nake puurak ndoonogo punuk, wonok Naliku ALA nawi wurik me pi wogo mengga kwak, it togop aret wogoren piya woraagun me,

²¹ it inenggela'me nen ando an neebe unde logowak nduk leenogo piige, ando inanebunu Lewi mendek logowak nduk leenogo piige, eerigin o,” yinuk, Aliku ALA nen aret yegerak o.

²² Aliku ALA nen ari logonet, “Mbogut ngget mendek eerogo pege, nggween ngget mendek eerogo pege, eerigin nogo ti, lek arigin lek mondok-mondok nenggaanom paga logogin ti kwak, kit paga wiganak mondok-mondok wonogwe, ndi, kit kinendage mondok-mondok ki aret wonage, eerak logogin,” yegerak o.

²³ Aliku ALA nen, “Tut ngget ambi penenggak eeke, nogo 6 yippunuk, ko'lu yonggonggologwe nogo ari wagak eeke, eeke kagak, it aakumi abok aret nabu'me tebe yi wa'nuk, nayuk wuko logogun o.

²⁴ It ti nen wundi nogo logomenggaarik, it aap an noone eeriyak ineebi mbaka nogo inoorak inowak nggininik inigen kogo logogun o. O time ineebe inoorak waalo ninggippunuk nunggwi nogo kangga'lek ineenik mban wonogwe, ndi, ineebe kani nengge nogo noguk yaga'lek wunuk mban ari, eeke kenok, it aakumi abok aret inigen kogo logonet, inamineeri ne agan nage logogin o,” yinuk, yegerak me, abu aret yagi o.