Yetaya 65 - Ala Wone Peenok Peebi Mbanak

Ala wone nineebi yaga aaninggin inoba piyareegerak wone

¹ Aliku ALA nen ari logonet, “It aap nen, Ala nonggop menggendak o, yinuk, yo'nugulik nogo, neebe nigiige, It aap an mu'neren noorak mbakulik nogo, ninom lambungge, Ndi, it aakumi nendage kunogo yo'nugulik nogo, Yi an aret o. Yi an aret o, yinuk, yorage, Eereegirak o.

^2-5 It aakumi noone eeriyak ineebi mbako logonet, tu abe kagak maluk paga nogwe, Nit ndogop kwak ee'ne, mbakwi nogo mban mugurok nogwe, Nenegen neegak kulinik-kalinik ineyabume kugi aanggo warogo wogogwi, Warogo wogogak yugum ogobakkigirik paga obari abe kaga nogo kani kunggwi, Eekwi ti paga an niniki andi eerogo panugwi, Aakumi inogoma nen wone ambi yo'niraawak o, yinuk, oonikiya aakumi inowak paga inom, kwiyona inom, kwi'nari unggunuk toriigwi, Wam enggaanggum noorak lek kagak nunggwi, Ogole warak mendek kagak inaguwali paga lappogo nagaatik, niyo amburu inom nunggwi, An neebe abu nggomoorak aret me, nowagam koorok ari wage mage o. Ata, tayo yinip o, yinuk, yogwe, Eeko menggaarak yi, Neya woraawak nduk, o kubondendok nen nok oonikiya, Wa'nip o, yinuk, neenggi walok yoragatak kwe, meek aret o. It aakumi ti mendek ti, ka'luk an nogobak me unggwage menggi kwak, Ko'lu-kii'me kani omoonuk wunuk mban ari menggi kwak aret wonogo menggaarak o.

^6-7 Liiru mbanak nenggaawak paga wonage nogo yi aret. An puk arigin lek eekaatak onggo abu ndak-ndak inoba piige, It maluk eekwi inom, inombomini maluk eeko nogogwaarak inom, maluk onggo mondok nggwik togon inoba kwippiige, Eerigin o, Yereegerak liiru mbanak nogo ti aret. Puut-puut paga inagugi aanggo warogo kani kunit nogwe, Puut-puut teberogon paga meek eerogo panugo logonet eekwi, Eereegwaarak me, Aa'nduk eerit wogo nogogwaarak abok aret onggo mondok a'me nggelok inoba kwippiyaagin o,” yinuk, Aliku ALA nen yegerak o.

⁸ Aliku ALA nen yegerak nogo yi aret. “Anggur anggen luurik-maarak yugu ambi amburu awo wonage kenok, aakumi nen, Amburu awo wonage me mbo puurak mage o, yogo mengga kwak An nayeloman mini ando abe eekwi me, an nen it abok aret lek eerogo piyaagin lek o.

⁹ An nen Yakup paga wiganit nogo logowak nduk, eeppiige, Nabuut-puut unde eeppatinuk logowak nduk, at Yekura paga nen wiganogo piige, Eerigin me, It an leenogo piyareegirak napuri nogo nen yate kwak nabuut-puut nogo unde eekkologwe, Ndi, an nayeloman mini nogo o time wonogwe, Eeko logogun o.

¹⁰ It an napuri mu'neren nugu logorak mbakwi nogo inake o Taron ti, Kambin-ndomba iri'ngga mbanogo nenet nugu logowam aret age, O Aaninggin Eeppiiga Kobappaga time tapi-lembu windak logowam aret age, Eerigin o.

¹¹ Togop eerigin kwe, it nen Naliku ALA mbo panugwi, Nabuut alik leenak nogo mari eerogo pugwi, Eeko logonet, Kugi Naa'lo Kolagi nogo ake mbi pipuk eerogo pugwi, Anggur amburu ale mendek inom nenggelak-kenggelak eerogo kugi Ariyak Punik me Aga nogo ake pipuk eerogo pugwi, Eeko menggaarak it perak,

¹² An nen wiirage neegak kwe, it nen onggo ambi yo'nugwi, Noone yorage neegak kwe, inaruk konenggwi, Eeka'lek logonet, An nenggaanom paga maluk mban eerit nugwi, An neebi mbake minggirak nogo aret inikilom mba'nuk eerit nugwi, Eeko nogogwaarak nogo paga Wooluwak nen ineebe nawak nduk koonogo pigin me, Inuut yinduk-wanduk aago iigak, inoorugun o,” yinuk, yegerak me, yokkiragi o.

¹³ Togop aret me, Aliku Itok Menggerak ALA nen wone yoragaarak nogo yi aret o. “It an nayeloman mini inambi nonggo logogun kwe, it perak, inambi nengga'lek abu aret wonogwe, Nayeloman mini inagi nonggo logogun kwe, it perak, inagi nengga'lek yi abu mban wonogwe, It an nayeloman mini inale'nggen mban mbako logogun kwe, it perak, inenggali mbakak nugwi,

¹⁴ It an nayeloman mini nogo iniki ale'nggen nen ndawi wako logonet, keekok yogo logogun kwe, It perak, iniki aaninggin ndugu aago logonet, inoone nggwok paga le yogwe, iniki wakkologo logonet, leenggu maakwi, Eeko logogun o.

¹⁵ An leenogo piyareegirak nen it inendage toonak punuk namenggaarak nogo, kumbunuk pulunogo piigo logogun o. Naliku Nitok Minggirak an ALA nogo nen it inoorigin kwe, it an nayeloman mini nogo perak, inendage alik yorage logogin o.

¹⁶ Aa'nduk aaninggin-paaninggin inoba piige nagagirak nogo mari eerogo pigin me, aberak wonage, Ndi, lek arigin me, nenegen kage, Eerigin lek me, It aap o time wonogwe nen, Ale'nggen ninoba pinanuwak, mbako logonet, Liirogon mban eeke minggirak an Ala nendage kumbunuk, yo'nugwi, Ndi, it aap o time wonogwe nen ambi eeriyak nduk, kumbuk mbaniyak mbako logonet, Liirogon mban eeke minggirak an Ala nendage kumbunuk kumbuk mbanggwi, Eeko logogun o,” yinuk, yegerak me, yokkiragi o.

Mbogut-nggween ngget mendek eeriyak wone

¹⁷ At Aliku ALA nen ari logonet, “An nen mbogut ngget mendek ogobakkigirogo pege, Nggween ngget mendek ogobakkigirogo pege, Eerigin o. Aa'nduk lombok eerit wogo nogogutak nogo ambinom niniki abe'nage, Ninikime nen ambi koonnage, Eerigin abu lek o.

¹⁸ O Yerutalem ogobakkigirogo piminggirak paga inale'nggen mbakwi, Ndi, it time wonogwe nogo, eekwi paga inale'nggen mbakwi, Eeko logogun me, An ogobakkigirogo pigin ti paga inale'nggen nen mondok keekok yogo logowak o.

¹⁹ O Yerutalem ogobakkigirogo piminggirak nogo paga nale'nggen mbake, An napuri o time wonogwe paga nale'nggen mban mbake, Eeke logogin me, O time nen, Yeenggwa niret o, yinuk, inoone nggwok paga yogwe, leenggu maakwi, Eekwi nogo inoone ambinom konenggo logogun lek o.

²⁰ It inapurilogwe awo ngget ndarak kagak kanggwi, It aap inanggok nogo nda'nogogwaarak eyom ari naga'lek kagak obate paga kanggwi, Eeko logogun lek o. It ndarak iigak tahun 100 eeppunuk kanggwi iinok, Awo tawe aret kanggerak, mbakwi, Ndi, it ndarak iigak tahun 100 ari naga'lek kagak kanggwi iinok, At pulunik aret me kanggerak, mbakwi, Eeko logogun o.

^21-22 Napuri nen o time inawi wurogo patemenggaarak nogo, aap inambik nen ye mbanggola unggwogwe, Ndi, anggur awi yaremenggaarak nogo, aap inambik nen anggen mbanogo nunggwi, Eeko logogun lek o. Ata, it nen aret inawi wurogo patinuk time aret ye mbambatinuk wonogwe, Ineyabume anggur yarogo patinuk, anggen mbanogo nunggwi, Eeko logogun o. It ineebe ti, eyo ero ki mban kagak tahun ambik eeke menggi kwak an napuri ineenik nggorek togop aret wonogwe, It an leenogo piyareegirak nogo, ineenggi paga yabu eeppunuk, inale'nggen paga nunggo logonet, ineenik obeelom mban wonogwe, Eeko logogun o.

²³ It nogo ti, Naliku ALA nale'nggen inoba piyareegirak nogo mendek awi wiganak aret me, It liirit-laarit eeremenggaarak nogo we aanom warogo aret eekwi, Ndi, inapuri nda'naremenggaarak nogo yini-panip kanggwi, Eeko logogun mondok lek aret o.

²⁴ It awo nggino yo'nega'lek iigak, yo'niriyak mbakwi nogo onggo muk yorage, Ndi, awo tamban eekwi iigak, an muk aret naruk konengge, Eeke logogin o.

²⁵ Nggeewo owo nogo ndomba aagaluk imbirak lambunna'nuk inambi nunggwi, It singa nogo tapi iri'ngga mbanogo nenet nogo mengga kwak nenet nugwi, Ndi, waalo ti, liirubu aa'ngga aret nenet nogwe, Eeko logogun o. Nabuut alik leenak nogome abok aret at ambi nen at ambi maluk eerogo pege, at ambi nen at ambi warogo pege, Eeko logogun lek o,” yinuk, Aliku ALA nen aret yegerak o.