Yetaya 64 - Ala Wone Peenok Peebi Mbanak

¹ Ai, nogoba. Kat mbogut paga tu paarogo punuk, keebe aret wura wage keegak, Puut-puut na'ndo-wa'ndo ari kane!

² Kani kumbunuk omoonuk paga niyo lakaatak kila-kila eeke menggi kwak kat kinom wim mbanak nen kendage ineenu ogwe, Ndi, kat kenggaanom paga yi aakumi ndi aakumi inaganak wake, Eeruwak nduk, Wambi mok o!

³ Iya eeriyak mendek nogo nit nen eeriyak mbaka'lek niigak eeri wambi wagagindak paga Puut-puut na'ndo-wa'ndo eeke nagagerak nogo o!

⁴ Kat Ala nen eeke keyaawok nduk tokkeegwi me, eeke keego mengga kwak, O aa'nduk nen nok, yogondak kuli it aakumi inogoba alik ambi togop eeke liippugwi, Oone ari inaruk konenggwi, inigen abe nen kogwe, Eeka'lek aret wonogo menggaarak o.

⁵ It aap obeelom eeriyak inikilom mbakwi, Ndi, kat eeke menggendak nogo abeppunuk eekwi, Eekwi iinok, Yeenggwaara wage menggendak kwe, Koone taganogo mbo pugwi niinok perak, kanini ninombake nagagindak o. Togop eekwi niinok, nit nonggop togon yeenggwa niroorak? Lek aret o!

⁶ Nit abok aret aap ambi pekkoorak lalam ee'ninake menggi kwak wonogwe, Nit obeelom eeko monggoorak mbakwi nogo ti, kumi tut kogwe paga inayum mili agaatak kwak wonogwe, Iri'ngga teebat agaatak kwak wonogwe, Eerak aret ogoorik o. O wiya nen eyoongga wonok nggarek ari menggi kwak, ninomaluk nen wo'niren nage menggerak o.

⁷ Nit eekwi paga kat kenggaawak kumaappatinuk wonage, Nit maluk mban eerit nogwe paga nineebe lek eerogo patuwak nduk mbo pinanege, Eekendak me, Yeenggwa niret o, yinuk, kendage kunogo yokkugwi, Koone yo'nirage woppunuk eekwi, Eeka'lek aret ogoorik o.

⁸ Togop kwe, Kaliku ALA o. Kat ninogoba aret o. Nit yi, nggween nggabok mendek aret. Ndi, nineebe longgo warogo ogobakkigi'ninabeegindak kat aret me, Nit abok kat keenggi paga eerak aret ogoorik o.

⁹ Togop me, Kaliku ALA o. Kat kanini aakumi inoba piige menggendak kuli wonage kagak nit mondok nggwok lombok ninoba kwippinanege, Nit maluk eekwi nogo mondok-mondok aberak mban wonage, Eeriyak ti mage o. Nit abok kat kapuri aret me, liippinanege logonok nduk yokkogo o, ninogoba.

¹⁰ Kat kagota ambik abu obeelom alik leenak menggerak nogo muk o karume pogom age, O Tiyon nogo kunduk, karume kwak age, Ndi, Yerutalem nogo, o wogo aret age, Eekerak aret agaarik o.

¹¹ Kat kawi wurogo pereegwaarak ninombomini nen kendage tiyappogo nogogwam abu obeelom alik leenak kenok, Wi! yogwe nogo, Kani pegaarak paga pup eerogo nengge, Ninamendek niniki kunik lombok nogo, abok aret yigirik-noonom age, Eekerak o.

¹² Ai, Kaliku ALA o. Yi eerogo pinanegerak kagak kenegen aanggot niinok mbo pinanege, Yeenggwa niraga'lek logonet, maluk eekwi iinok onggo eeppiige menggendak kuli mbanak kagak nit mondok nggwok togon eeppinanege, Eeriyak op mbake agandik?”