Yetaya 62 - Ala Wone Peenok Peebi Mbanak

O Tiyon endage ngget toonigin yereegerak wone

¹ O kilim nagake menggi kwak o Tiyon time obeelom mban eerit nogwe nogo wiganinuk nage, Ndi wuninik eya eerogo wunabit nage menggi kwak o Yerutalem time inagap ndarogo piinet nage, Eeka'lek logonet, O Tiyon eeppuurak nogo noone yaga'lek puk wonage, Kota Yerutalem eeppuurak nogo noone lek puk wonage, Eerigin lek yigin aret o.

² Kat Yerutalem yi, obeelom mban eerit nage it aakumi inanebunu lombok nen keegwi, Kat abu tiyanak wonage nogo, it yi aap ndi aap inendagembogut nen inigen keegwi, Aliku ALA nen kendage ngget toonemenggerak nogo aret yokkugwi, Eeko logogun o

³ Yanggwi eeruwak mendaarak yirik lan ari menggi kwak keebe Aliku ALA eenggime wonage, Aap endagembogut enggare-nggare iniki kundugu menggi kwak, keebe kogoba Ala eenggi paga wonage, Eerak logomunggun o.

⁴ “Kwe mbo pugu o,” yinuk, yokkugwi, O kat wonage menggenom ti, “Kugume o,” yogwe, Eeko logogun lek o. Aliku ALA iniki kunik eekkabigin me, kendage ti, “Ala Imbirak Kunik o,” yokkugwi, Ndi, o kat wonage menggenom ti, ogonggelo negen kolaagin me, “Ogonggelo Warak o,” yinuk, yogwe, Eeko logogun o.

⁵ Wulaga ambi nen akwe kolage menggi kwak, kaagalogwe wologwe nen kat wokkabugun o. Ndi, wulaga akwe kolage nagaatik, iniki ale'nggen mbake menggi kwak, kogoba Ala nen kat keebe paga ale'nggen mbake logogin o.

⁶ Kat Yerutalem yi wae. Kobak wurik paga aap tum logowak nduk piigirak me, It nen liingge inom, oonikiya inom, tum wako logonet, inoone lek puk logogun lek o. Aliku ALA o Tiyon eeppuurak yegerak aberogo yoga kit yi wae. Kurumbi yoraga'lek ugun puk logorak mage o.

⁷ O Yerutalem aa'nduk wonagagi kwak eerogo pege, It aakumi yi o ndi o abok aret nen Yerutalem tiyappuwak nduk, eeppege, Eeka'lek kagak, Kurumbi yoga'lek ugun puk logorak mage o.

⁸ Abet mbaruwak nduk, at Aliku ALA eenggi abe'nggan nippege, Abet aret eerigin o, yinuk, eenggi mondok omaawi tiyambege, Eeppunuk, Kumbuk mbangge logonet, eeriyak yegerak nogo yi o. “Gandum anggen mbanak waganogo kawim wogorage, Keenggi omaawi paga yabu ta'liila eekendak anggur amburu ngget toolak nogo, it aap inambik nawak nduk wogorage, Eerigin mondok lek o.

⁹ It anggen mbanemenggaarak nogo nen aret nonggo logonet, Naliku ALA nendage tiyappugwi, Anggur anggen kuwak eerogo punuk, aambiranogo amburu toolemenggaarak nogo, an nawi alik leenak wurik nawoore'nggam time logonet nunggwi, Eeko logogun,” yegerak o.

¹⁰ Togop yegerak me, wundi nogo logonip o. Tu pak ambe mbanak paga nen wundi nogo logonip o. Tu it aakumi iname woraawak nduk pipuk eekwi, Tu ogobakkigirogo yakwi, Tu nggwok ogobakkigirogo yarit nugwi, Eeko logonip o. Yugum kenok, langgunogo mbo pugwi, Yi aakumi ndi aakumi unggwi woraawak nduk, ineenu agak mippugwi, Eeko logonip o.

¹¹ Aliku ALA nen it aakumi nggween irip-irip wonogwe abok aret inaruk konenuwak nduk wone yoragaarak yi o. “At Kinagap Ndaka wage yi kaanip o. Ta'liila eerit nage nagagerak onggo kolegerak nogo inom wogwe, At peebi wage kagak inaa'nduk wogwe, Eekwi yi, Iyaanip o, yinuk, o Tiyon Aagalukwe nogo yoru,” yegerak o.

¹² Inom wogwe inendage ti, “At Kikak Naka'lek Alik Leenak Apuri o,” yorogwe, “Aliku ALA Wondet Eerogo Piiga o,” yorogwe, Eeko logonet kwe, Kat Yerutalem yi perak, kendage ti, “Kwaakkabit Waga! O Kota Kugume Lek Aakumi Menggam o,” yinuk, yokkogo logogun.