Yetaya 60 - Ala Wone Peenok Peebi Mbanak

“O Yerutalem eya eerogo pi woraagin,” yereegerak wone

¹ “O Yerutalem ti, eya eeppuurak nogo muk koorok panggoni wage, Naliku ALA nabinak kwindagala aago nogo eebe paga pindanogo pi wage, Eeke me, Mi'na'nuk, aakumi in wakkagak eya aago logowak o.

² O apit nen nggween nobappunuk wonage, Yi aakumi ndi aakumi o yumaak lombok eeppiinok wonage, Eerak ti kaawak o. Togop aret aago kwe, Naliku ALA eya oba pindanogo pege, An nabinak kwindagala aago wonage nogo, at irimbaga eya eeppege, Eerak wonage kenok,

³ Yi aakumi ndi aakumi abok aret pelen-pelen ka wogwe, At eya abinak lan agan lagangge kenok, yi aap ndi aap inendagembogut owagam wogwe, Eeko logogun o.

⁴ At aagalogwe wologwe o nda nen wogwe, Aagalogwe komologwe inaagalogwe yarugu-yonggolak aago wogwe, It abok aret at owagam kuwak ari wogwe, Eekwi ti, Enggaawak pila yinuk, enegen yendok-wandok pegiyaawak o.

⁵ Enegen pegiinet nage logomenggerik, enete paga i'ndok nggi ari, Iniki ponok-ponok eeke logonet, ale'nggen nggwok inikime nggelok ari, Eerigin o. Yiiro paga yi mendek ndi mendek wonok nogwe-wogwe eekwi paga ineenggi warak eekkologwe nogo ando iri wogwe, Yi aakumi ndi aakumi ineenggi warak inamendek nogo at wogori wogwe, Eeko logonet,

⁶ It o Miriyan nen, o Epa nen, unta awologwe apit aret wonok iri woraagun me, Anggween enete lek eerogo unta mban nugwi, Aakumi Tiyeba nen abok aret mbuti emas inom, obari abe kaga inom, wonok wogo logonet, Naliku ALA nendage tiyappit wogwe, Eeko logogun o.

⁷ Kambin-ndomba Kerat mendek abok aret wonok at wonage me kuwak eerogo pi wogwe, Naliku ALA nalut eeke logonet, nake wariyak mbakerak nogo ndomba ngguunok Nebayot mendek iri wogwe, Eeko logogun o. Eekwi iinok, warogo nake kani kunggo menggam nogo paga pege kenok, Naliku ALA nale'nggen mbake, Ndi, nawi wurik ayuk warak menggim nogo ambinom ayuk warak eerogo pege, Eerigin o.

⁸ O wiya nen ndugwi wonok nggarek ari, Towe puume wiga agan awina unggwi nage, Eeke menggi kwak, It aap togop eerit nugwi ti, taani o?

⁹ It aakumi niyo oolo ku'mbanak paga wonogwe nogo, an ari neyo mban abet aret to'neego agaarik o. An ari neenok, yi yiiro ndi yiiro Taritit mendek nen mbuti perak mbuti emas wonok wogo menggaarak me, wonok wogo logonet, At aagalogwe o nda nen inaa'nduk wogoren wogwe, At mondok tiyanak ayuk warak eerogo pereegirak me, An Kikak Nakeelik Nalik Leenak Iterali inogoba Naliku Ala nayuk wuko logonet, iri wogwe, Eeko logogun o.

¹⁰ It aap inambik nen at eyagat pak wurik wonagagi kwak wurogo pugwi, It inoweewi inendagembogut nen ayeloman a'nuk ake eekwi, Eeko logogun o. Aa'nduk nanini nen wake nagagirak kwe, yogondak perak, abuwa nen niniki kunik eeke logogin o.

¹¹ It aakumi inanebunu lombok nen inamindik-inamendek iri wogwe, Nit nineegin tiyak yigi o, yinuk, it aap inendagembogut keele maageren unggwi wogwe, Eeko logowak nduk, At arungga kuurik mban wonage, Liingge-oonikiya aru narak lek mondok paarak mban wonage, Eerak logowak o.

¹² It aakumi inanebunu lombok inom, it aap aakumi inabu'me piinok menggaarak inom, Ayeloman a'nuk ake eeriyak ineebi mbakwi iinok, mondok maluk aret age, lek age, eerigin o.

¹³ Eyo o Libanon abe kenok, Wi! ugwi nogo wonok iri wogwe, Eyo nggabina inom, kilu-kilu inom, ndiindi inom, an nawi wurik abe amini mbanogo pit nawak nduk, wonok wogwe, Eekwi iinok, Niyok punuk minggim tiyanak wonage kaawak nduk, eerogo pigin o.

¹⁴ It aap tebenogo pugwi inapuri nogo abu'me tebe yi unggwogwe, Ndi, it aap meek eerogo pugwi nogo nen inendobanggun yindumbunuk, iyok paga pirik-perek yogwe, Eeko logonet, Aliku ALA agota o, yinuk, yogwi, At Kikak Nakeelik Alik Leenak Iterali inogoba o Tiyon unde o, yinuk, yogwi, Eeko logogun o.

¹⁵ It aakumi nen, Kogole o, yinuk, at mbo punuk mbaganggwi, Tu at wonage ti paga naga'lek alik paga nogwe, Eeko nogogwaarak kwe, Yogondak perak, ale'nggen mondok-mondok kage logowak nduk eerogo pege, It aa'nduk ndarak nen at paga inale'nggen mbako nogogwaarak me, yogondak nda'narit wundi nagun kenok, at paga inale'nggen ombako logowak nduk eeppiige, Eerigin o.

¹⁶ Kwe ambi aagaluk elak wogoge menggi kwak yi aakumi ndi aakumi inamindik-inamendek at wogogwi iinok kolage, It aap inendagembogut nen ndegenggo logonet, abe mendek wogogwi iinok, wagangge, Eeke logogin o. Ti eeke kenok, Agap Ndaka, Wondet Eerogo Pega, Yakup ogoba Nomaawi Lombok Minggirak ti, Naliku ALA an aret eenu arigin o.

¹⁷ An nen mbuti tembaga obaane'me mbuti emas wonok iri wage, Mbutiwak obaane'me mbuti perak wonok iri wage, Eyo obaane'me mbuti tembaga wogori wage, Ndi, yugum obaane'me mbutiwak wogori wage, Eeke logogin o. Iniki ugun tayenak logorak eeppiminggirak ti nen at arum wonage, A'me nggelok eeppiminggirak ti nen wone lengganogo yoge, Eerigin me,

¹⁸ Aap iniki worokot nen aakumi maluk eeppiinet nugu agaarik o, yinuk, at wonage me time nen yogwe, O maluk eerogo pugwi, o yigirik-noonom eerogo pugwi, eekaarak o, yinuk, anggween paga time nen yogwe, Eekwi nogo ambinom konenggo logogun lek o. At nen, Nayugum pak wurik ti, Nagap Ndaka o, ari, Ndi, Narunggambe ti, Nalut Eeka o, ari, Eeke logogin o.

¹⁹ At enggela'me eya eerak mondok-mondok logorak ti, at ogoba Naliku ALA an aret o. Ndi, endage tiyanak kenok, Wi! yogo logorak ti, at ogoba Ala an mban aret me, Oonegen o liingge eya eeke nogo ambinom eya eerogo pege, Tut oonikiya eya eeke nogo ambinom eya eerogo pege, Eeke logogin lek o.

²⁰ Oonegen eya eerogo pege nogo ambinom kilu yi nage, Ndi, tut eya eerogo pege nogo ambinom eya eerogo pege, Eerigin lek aret o. At eya eerak mondok-mondok logorak ti, Naliku ALA an aret me, Neetik-neetak iniki puru ari menggerak nogo lek aret ari nage kaagin o.

²¹ Ti ari nage kenok, aagalogwe abok aret iniki abe koonak ogwe, Ndi, nggween ti nogo, unde eeppatinuk mondok-mondok wonogwe, Eeko logogun o. An abu tiyanak, Wi! nugwi nogo aakumi inigen neego logowak nduk, neenggi lombok paga nen agarip ambi luurogo yareegirak it aret me,

²² At aagalogwe ambi endage abu lek tebenak wonage kwe, anebunu nggwok age, Ndi, ambi eebe abu meek aret kwe, anebunu at mendek mban o ndak wa'nogwe, Eerugun o. An ti, Naliku ALA aret me, Ti eeriyak eyom panggo yi wage kenok, mbet-mbet aret eerigin o,” yinuk, Aliku ALA nen aret yegerak me, kat Yerutalem yokkigi o.