Yetaya 6 - Ala Wone Peenok Peebi Mbanak

Ala nen Yetaya yoge kagak yoraga aruwak nduk, wiireegerak wone

¹ Aap endagembogut Utiya kambeegerak tahun ti paga at Ala abu tiyanak, “Wi,” ugwi iigak, wone lengganogo yorage menggim kwi'ndak wonage me, ayum nggorek irip nik aago nogo at awi wurik paga ndak warak wonage, eeke kagarak o.

² At irimbaga inetenggen kani wunuk ari negen aakumi iigulik mendek inalitak lombok ina'naabit 6 warak mban mi'ndak wonogwe iigirak. Ti iigirak nogo ti, ina'naabit mbere paga inetenggen nobakkologwe, mbere paga iniyok nobakkologwe, mbere paga wiganinuk nogwe, eekwi iigirak o.

³ Eerak wonogo logonet, it inoone nggwok paga at ambi nen at ambi yogak eeko logonet, “Kat mondok kikak nakeelik alik leenak aret o. Kat mondok kikak nakeelik alik leenak aret o. Kaliku ALA Komaawi Lombok Menggendak ti, mondok kikak nakeelik alik leenak aret o. Keebe abu tiyanak o nggween paga mondok ndak warak menggendak o,” yinuk, yogwe iigirak.

⁴ It inoone nggwok togop yogwe iigak, Ala awi wurik tungga ambe peenok-peenok langgok-panggok eeke, ambe agi-ogu nuk-nuk eeke, at awi wurik nogome ka'luk yagabit eerogo pege, eeke kagarak o.

⁵ Kage nagarik, an nen ari logonet, “Nambe paga maluk mban ari, ndi, an aakumi inambe paga maluk mban yogwe nogo inenggela'me wonage, eeke logonet, at Omaawi Lombok Menggerak endagembogut Aliku ALA nenegen abe nen kagarak paga kambigin aret me, nabuwa o!”

⁶ Yinuk, mbake me, inetenggen kani wunuk ari negen aakumi iigulik mendek nogo ambit nen warogo wogogak ogobakkigirik paga nen kani kunik paando paga nggerembunuk, eenggime wonok wiganinuk nowagam wage nagaarik,

⁷ nambe paga mbaanggage logonet, “Kani kunik kambe paga pege yi ket o. Nambe mili, yagandak nogo yi paga koorogo paganuk, komaluk lek eerogo pagagi o,” yinuk, yo'nege kagarak.

⁸ Yo'nege kage nagarik, ti'nuk, nogoba Ala nen ari konengge logonet, “An ari minggirik wone wonok nawak nduk, ta nappigin mbakop? Ndi, nit nookwak wone ti, taani nen wonok yora noorak mbako agaarik o?” Ari konengge nagarik, “Yi an aret me, an aret nappanu o.”

⁹ Yoge mbaki, at nen an yo'nege logonet, “It aakumi ti, inaruk konenggak mban eeremenggaarak kwe, liippugwi, Inigen kagak mban yemenggaarak kwe, yelok kogwe, Eerugun lek o, Yinuk, yorage,

¹⁰ Ndi, it aakumi ti, inigen kogwe, inaruk konenggwi, iniki liippatinuk yunggup-melak eekwi, Eekwi iinok, An nen obeelom eeginake neyo, inogogumbuk ogwe, Inaruk logu kwak ogwe, inigen mbuk kwak ogwe, Eeruwak nduk eeppiya nage, Eeru o.”

¹¹ Yo'nege naruk konengge nagarik, onggo yoge logonet, “Nogoba Ala wae. Wone ti yorage neegak, ne mande ari nagin o?” Yoge mbaki, at nen onggo an yo'nege logonet, “Kat nen yorage keegak O kota-kota abok aret yigirik-noonom eerogo pugwi iinok, Aakumi ambi lek aret wonogwe, Aakumi inawi wurik wuum lu agan nage kagak, ineyabu yarak alom yenak-kinak eerak wonage,

¹² Aliku ALA nen aakumi o time wonogwe abok aret mugogo wumbiyamenggerak me, o wogo aret wonage, Eerigin o.

¹³ O time aap ineebe 10 inooko logonet, ambiret teppegak eeremenggaarak nogo, Ambokan unggwogo logonet, inoorogo piinet nogo logogun kwe, Eyo win inom, eyo teno inom, muurogo pegaatak kwe, andokon wonage menggi kwak, Aakumi alik leenak yumbunik nogo paga nen inagarip wundigin o,” yinuk, yo'nege kagarak o.