Yetaya 55 - Ala Wone Peenok Peebi Mbanak

“Niyo abu kenok, na woraanip,” yoragagerak wone

¹ Aliku ALA nen ari logonet, “It abok aret niyo abu wonogwe ti, woraawak o! Wogo logomenggaarik, niyo yi nawak o. It inawu lek wonogwe ti, wogo logomenggaarik, inambi waganogo nunggwi, Inawu paga onggo pugwi, onggo kunogo nunggwi, eeka'lek we aret anggur amburu inom, tapi elak amburu inom, kologo logomenggaarik, nunggwi, Eeko logowak o.

² Mbi abe mendek lek kagak nonggop nduk yi mendek ndi mendek kunggo'net nugwi, Yabu liirit-laarit eeppunuk, Op togon kunggolagi, yinuk, iniki ndonggo yuurak lek kagak nonggop nduk yabu eerit nugwi, Eeko agaarik o? Inaruk logowak o! An yorage yi, inaruk konenggwi iinok, It yi mendek ndi mendek ombat abe mban nunggwi, Yi mendek ndi mendek amburu warak nenok, inale'nggen eeginaburak kogo menggaarak nogo mendek mban nunggwi, Eeko logogun o.

³ At nen wone yo'nirage liippuwok o, yinuk, an neya wogwe, Ineenik logowak nduk, noone inaruk liirogon konenggwi, Eeko logowak o. An kabuwa nen obeelom mban eeppagagak eeke logogin o, yinuk, at Ndawut koonogo yoreegirak nogo ndak-ndak, Wone lek ariyak lek mondok-mondok eeko logorak wone ninom koonogo puwok o.

⁴ It aakumi inanebunu lombok abok aret ineenu aruwak nduk, an mippereegirak ti, kaawak o. An mippereegirak aakumi inarum waka yigin unde inowe at aret o.

⁵ Aakumi nen, Wi! irogo logowak nduk, an Kikak Nakeelik Nalik Leenak Iterali inogoba Naliku Ala nen tiyappiyareegirak me, An napuri aakumi inanebunu it ineenggo'lek mendek wiirogwe iinok, Yi aakumi ndi aakumi ineebe ineenggo'lek kwe kagak mbe agan iya woraagun o,” yinuk, yegerak me, yokkiragi o.

⁶ Aliku ALA nen, “Ninom lambuniyak op aret o,” yinuk, awo mbake me, mbet-mbet kinom lambuni wogwe, At awo koorok wonage me, kinoone nggwok paga yogwi, Ee'nip o.

⁷ It aap maluk mendek nen eerit nugwi nogo mbo pugwi, It aap iniki maluk nen eeriyak koonogo pit nugwi nogo teppugwi, Eeko logomenggaarik, Yungguninuk iniyokan Aliku ALA owagam woraawak o. Owagam wogwe iinok, Aliku ALA it inabuwa nen teppiige, Yungguk togon ninogoba Ala ka wogwe iinok, Ala nen inomaluk ambi teppigin lek abok aret mondok lek eerogo piige, Eerigin o.

⁸ Aliku ALA nen ari logonet, “An eeriyak koonogo pege minggirak ti, kit eeriyak koonogo pogo monggotak ndak-ndak lek o. Ndi, kit eerit nogo monggotak ti, an eerit nage minggirak ndak-ndak lek mban o,” yinuk, ari kagarak me, yagi o.

⁹ “Nggween ogu kagak mbogut agi tiyarogon wonage menggi kwak, It eerit nugwi nogo tebenak kagak, an eerit nage perak, abu tiyanak lombok wonage, Ndi, it eeriyak koonggwi nogo meek negen kwe, an eeriyak koongge perak, mondok iya lombok wonage, Eeko monggoorak.

¹⁰ O mayu inom, ndugu-ndugu inom, mbogut paga nen wambi wage nagaatik, nggween miin eerogo pit nage, Yabu yarak mili eerogo pege, Awi yarak mbilambunuk, abe lagawak nduk amburu eeppege, Eeke logonet, Aap awi yaka nogo awi peebi yariyak mbanggolaawak nduk, eeppege, It aap mbi noorak mbakwi nogo inambi ndarogo nawak nduk, eeppiige, Eeke nagaatik, Ti'nuk, iyokan yungguninuk lagangge menggi kwak,

¹¹ Wone an nambe me nen wumbege minggirak ti, togop aret menggerak o. Wone an nambe me nen wumbege minggirak nogo ti, yungguk togon we aret neya wageelik o. An eeriyak mbake nambe me nen wumbege nogo abu ndak-ndak aret arit nage, Ndogop aruwak o, yinuk, wumbege minggirak nogo a'me lik togon aret age, Eerigin o.

¹² Inale'nggen mbako logonet wundi wogwe, Wogoren wage neegak, iniki ugun tayenak aret wonogwe, Eerugun o. Wogwe iigak, puut-puut tiyarogon inom, puut-puut teberogon inom, it inaame nen Inale'nggen yogo logonet, na'ndo-wa'ndo yogwe, Yi eyo ndi eyo penaame wonage nogo nen ineenggi telak yogwe, Eerugun o.

¹³ Eyo alok mendek obaane'me eyo nggabina lagangge, Eyo nggonggoondu obaane'me eyo kilu lagangge, Eerigin o. Ti eerogo piyaagin nogo ti, Naliku ALA ineenu agak, lek ariyak lek mondok-mondok aberak logowak nduk eerogo piyaagin,” yegerak me, yokkiragi o.