Yetaya 54 - Ala Wone Peenok Peebi Mbanak

Peebi o Tiyon tiyappuurak wone

¹ At Aliku ALA nen ari logonet, “Kwe ogonggelo nen mbo pereegerak nogo, aagalogwe ambik lombok wonage, Ndi, kwe ogonggelo warak aagalogwe mbereeluk wonage, Eekwi me, At aagaluk ndaka'lek kwe wubili ti, ndawi wake, Kwe enegen paganak yagan waka'lek ti, ale'nggen inikime nggelok ari logonet ndawi wake, Ale'nggen nen kwirabik-kwirabok ari, Eeke logowak o,” yinuk, yegerak me, yokkigi o.

^2-3 “At nen nggween agi-ogu inom, iru-ogwe inom, wiganogo pit nage, Ndi, at paga ndarak nen yi aakumi ndi aakumi inanggween tebenggologo logonet, It wonogogwam kota-kota yi oone ndi oone lek nogome ye mbanggola unggwogwe, Eerugun me, Ando pegak eerugurik o. Ata, awooliya wurik ti, ambinom akom pogukkage, Awooliya wurik yum tugunik nogo mbiganogo pege, Awooliya keele pugunik ti, ambinom nggigippege, Eyak yinik nogo mondok nu'lek eerogo pege, Eeke logowak o.

⁴ It aakumi nen at enggali eerogo pugun lek me, at agabiti mbake, Endage maluk eerogo pugun lek me, iniki piirik age, Eerugurik o. Kwe tawe negen logonet eeke nagagerak paga enggali mbakak nege nagagerak nogo ami age, Kwe togwe negen kenok, enggali wappogo nogogwaarak nogo abeka'lek mbo pege, Eerigin o.

⁵ At ogobakkigireegirak ti, ore an aret me, nendage ti, Nomaawi Lombok Minggirak Naliku ALA aret. Iterali inogoba Kikak Nakeelik Nalik Leenak Minggirak ti, at onggo mbangga an aret me, It o nggween paga yime menggaarak abok aret inogoba Ala an aret o.

⁶ Kwe ogonggelo nen mbo punuk mbagangge kenok, at iniki puru aago wonage menggi kwak, Kolaga tawe awo lambunik kagak ogonggelo mbo pege menggi kwak, at togop aago wonage me, At ogoba Naliku ALA nen iyokan woraawak nduk, wiige neyaagin,” yegerak o.

⁷ “Ne ambiriluk mbo pereegirak kwe, abuwa nggwok lombok mbake kenok, waagin o.

⁸ Nanini abu alik negen ee'nake mbareegi, ne ambiriluk nenete kumaarak wonagagirak kwe, Niniki mondok-mondok kunik eeppege logokit nduk, abuwa nen waagin o,” Yinuk, at onggo mbangga Aliku ALA nen aret yegerak o.

⁹ “An yogondak eeke ti, at Nu wonage kagak eereegirak ndak-ndak aret eeke agarik o. Aap Nu wonage eyom paga niyo nen nggween taanogo pereegerak nogo pogom, Peebi ambinom eerigin lek o, Yinuk, kumbuk mbanogo Nu yoreegirak nogo ndak-ndak Yogondak an nanini ambinom at oba pege, mberege, eerigin lek o, Yinuk, kumbuk mbanogo yogi o.

¹⁰ O puut-puut na'ndo-wa'ndo eeke, Puut-puut teberogon wonage nogo ya langgok eeke, Eeke logonet kwe, Niniki kunik eeppegak mban eeke nogo perak, lek arigin lek kundugu aret wonage, At nimbirak lambunik logorak wone koonogo pereegirak nogo, mbeyok yaga'lek mondok aret wonage, Eeke logogin o,” Yinuk, at kabuwa mbake menggerak Aliku ALA nen aret yegerak me yokkigi o.

Kota Yerutalem ngget wuriyak wone

¹¹ Aliku ALA nen ari logonet, “O wiya omaawi warit wage logonet, eyo ndugunogo pit nage menggi kwak, Aaninggin-paaninggin at oba aan lebe aago wonage kwe, iniki eyak wappega'lek at Yerutalem ti, An nen yugum ninuk paga kwippegak wurogo pege logonet, yugum laturit paga at ogowa mondok nu'lek eerogo pege,

¹² At arum nggayo logorak nogo, yugum maa'ngga kunik yatipit paga wuke, Arungga ti, yugum kere'li-kere'lo aago paga mbangge, Awi kobat ti, yugum onggo nggwok mendek paga nabenit lagangge, Eerigin o.

¹³ Aagalogwe wologwe abok ti, Naliku ALA an aret mamunirage logogin. Inambi-inambiingga abe mendek mban nunggo logonet, iniki ugun tayenak aret logogun o.

¹⁴ Obeelom mban eerit namenggerak paga nu'lek eerogo patigin o. It tebenogo puurak nda wonogwe me, agabiti mbarigin lek o. Iniki a'nggan woorak nda lombok wonogwe me, ka woraagun lek mban.

¹⁵ It aakumi wari wogwe iinok, an nen eeppiyaminggirak paga woraagun lek me, It wari wogwe nogo at nen aret tebenogo piige logogin o.

¹⁶ Kani wunuk yuwak nduk puuge, Ndi paga inooriyak, mbakaatak nogo kani worappunuk koonogo pege, Eeke menggerak mbutiwak paga eeka ogobakkigirogo pereegirak nogo ti an aret o. It aap wim eeka kunduk, an nen aret ogobakkigirogo piyareegirak me,

¹⁷ At wariyak nduk yi mendek ndi mendek ogobakkigirogo pemenggaarak kwe, abe eerigin lek o. Ndi, aakumi inowak loonggo menggam it yi aap ndi aap nen, Kat ndogop eekendak o, yinuk, Inoone yoremenggaarak kwe, inoone lek eerogo piige logogin o. Aap apuri eyate wogorage menggi kwak, Naliku ALA nen nayeloman mini eeppiyareegirak nogo ti, It aakumi togop eeppiigo logowak nduk eeppiige, Ndi, It aap ti, Aap abe o, yinuk, inaana'le mbangge, Eereegirak ti aret o,” yinuk, Aliku ALA yegerak me, yokkigi o.