Yetaya 49 - Ala Wone Peenok Peebi Mbanak

ALIKU ALA AYELOMAN WONE (Pasal 49-55) Aakumi inenggela'me Ala ayeloman eya kwak logorak wone

¹ Kit aakumi niyo oolo ku'mbanak paga wonogwe yi wae. Kinaruk o! Kit yi aakumi ndi aakumi o ndaanda monggotak yi wae. Kinaruk logonip o. An nda'naga'lek neegak, Aliku ALA nen an wiinege, Nagalo inikime awo wonage neegak, Aliku ALA nen nendage kungge, Eereegerak.

² An nambe paloowi ngget penek maarak kwak eerogo panege, At eenggime nobappanogo wonage, Maale namburik nggaruk togon nage menggi kwak eerogo panege, At omaale ta'mbanak kwak enggela'me kumaarogo panege, Eeke logonet,

³ “Kat an nayeloman Iterali aret o. Kat eerit nage paga aakumi nen, Iya! yinuk, an nendage tiyappugun o,” yinuk, yo'negerak kwe,

⁴ An nen ari logonet, “An anggon-panggon ee'nake kagak eeke nogo aanom warogo aret eeke, An nomaawi lik-lek eekkolage nogo ti, ambi koloorak lek we aret eeke, Eekirak mbake kwe, Eeppaniyak nogo ti, Aliku ALA obaalombok aret wonage, Ndi, onggo wo'niriyak nogo ti, nogoba Ala nen aret koongge, Eeke menggerak,” kagak yagarak o.

⁵ At Aliku ALA nen an yi, Aap iya negen aret, neege, Ndi, nogoba Ala nen omaawi eeppanege, Eeke nagagerik, At ayeloman logonet at Yakup paga wiganak iniyokan at owagam piya wage, At apuri Iterali mendek wogoret at abu'me kuwak eerogo piya wage, Eerikit nduk, An nda'naga'lek nagalo inikime awo wonage neegak, neenggi-niyok warak eerogo paneegerak Aliku ALA nen yegerak yi aret.

⁶ “At Yakup paga wiganak inanebunu aa'nduk ninom kunik wonogogwa kwak eerogo piige, It aakumi Iterali ando yumbunik nogo iniyokan wogoret piya wage, Eerenok nduk, Nayeloman eerogo pagage nagarik, unde eeppagagirak nogo ti, yabu mbuuluk kagak unde eeppagagirak me, Aakumi inagap ndarogo piyoorak wone koonogo piyareegirak nogo It aakumi inanebunu lombok o irip-irip wonogwe inenggela'me eya eerogo piige logonok nduk, unde eerogo pagagin o,” yinuk, yo'negerak o.

⁷ It aakumi nen, Ogole o, yinuk, abu meek ombakwi, It aap o maluk age kero pipporogo wonogwe, Eekwi inayeloman logonet inake eeke nagagerak nogo At Kikak Nakeelik Alik Leenak Wondet Eerogo Piiga Iterali inogoba Aliku ALA nen yegerak nogo yi aret. “An li'lak eeka Naliku ALA nen, Iterali inogoba Kikak Nakeelik Nalik Leenak Minggirak nen, Kat leenogo pagareegirak me, Aap inendagembogut nen kat wage inigen keenok mi'nogwe, It nagawan-nagawan nen kat eeke inigen keenok kayuk wukwi, Eeko logogun o,” Yinuk, yo'negerak o.

Iterali aa'nduk wonogogwa kwak eerogo piyoorak yereegerak wone

^8-9 At Aliku ALA nen yegerak nogo yi aret. “An nen kabuwa mbariyak eyom paga kat yo'nege nogo onggo yokkege, Kat kagap ndariyak eyom paga yeenggwa kege, Eerigin o. Ndi, nggween aa'nduk wonagagi kwak eerogo pege, Yate kwak lek agagerak nogo obaane'me wogorage, It keele maarak wonogwe nogo, Wundi woraanip, yorage, It o yumaak me wonogwe nogo o eya kaawak nduk wumbiya wage, Eeke logonok nduk, Napuri ninom wone koonogo pereegirak nogo kat eeremenggendak paga ndak-ndak aruwak nduk, karum logogin o. Ti eeke keenok, ndomba tu ambet paga iri'ngga ndonggorogon nenet nugu mengga kwak, Puut iri'ngga wunggeelik puluk ko aago wonagagerak kwe, wungge kenok, nenet nugu mengga kwak, It togop aret logonet,

¹⁰ Inagi-inambi abu eeginake, O wiya nen aganggen eeginake, mo andi eeginake, Eeke logogin lek aret o. Inabuwa mbake minggirak an nogo nen tu nigiren nage, It wogoren yi eneeri wungge me piinet nage, Eeke logogin o.

¹¹ An nabuut paga abok aret tu yarogo pit nage, Naru nggwok yarak paga tiyak-tebek wonage kenok kagaarogo pit nage, Eerigin o.

¹² Ti eeke neenok, it aakumi o nda o omarip paga pa'nggwe nen, Oonegen kilu yi nage menggim pa'nggwe nen, o Tinim nen, Wogwe iyaamunggun o,” yinuk, yegerak o.

¹³ Aliku ALA nen at apuri iniki eyak wappiige, At apuri aaninggin inoba wonogwe nogo inabuwa mbake, Eerigin me, Kat mbogut yi wae. Kale'nggen mbake, Kat nggween yi wae. Keekok piyanggage, Ndi, kit puut-puut yi wae. Kiniki ale'nggen nen ndawi lubuk yogwe, Eeko logonip o.

¹⁴ Togop eekwi iigak kwe, o Tiyon nen ari logonet, “Aliku ALA nen an mbo panege, nogoba Ala nen kobak eerogo panege, Eekerak kagi,” Yinuk, ari agaarik o.

¹⁵ Ari kenok, at Ala nen ari logonet, “Kwe ambi aagaluk awo elak nengge kagak ami age, Ndi, at lombok nen ndareegerak nogo abuwa mbaka'lek mbo pege, Eeriyak op mbaken? At aagaluk mari eerogo pemenggerak kwe, an perak, kat o Tiyon nogo koba mari eerogo pagagin lek o.

¹⁶ An neenggi ogut paga kenete wakkagak eerogo pigirak yi ket o! Kowa'nagat wurik ti, an aberit nage minggirak o.

¹⁷ O wurogo pigirak kaagalogwe mbet-mbet wogwe iigak, It aap kat maluk eerogo pagareegwaarak nogo mbo paganuk mbaganit nogo agaarik o.

¹⁸ Kat kaagalogwe wologwe kuwak ari wogwe, kat kowagam wogwe, eekwi yi, kuut pilak yinuk, kenegen pegiyet o. Kwe aap lambumbuurak nduk, obaanggi-obaangge li'luk eerogo pogo mengga kwak, It kuwak a'nuk wonogwe nogo paga kat kiniki ale'nggen nggwok eerogo pagagun o, yinuk, An neenik minggirak Naliku ALA nen mondok abet aret yokkigi o.

¹⁹ Kat kame abu kaliirubu koo'nuk wundeegwaarak paga yi oone ndi oone lek agagerak wonage, Kanggween abu maluk eerogo pereegwaarak wonage, Eerak aret wonagagerak kwe, Obeelom ariyak ti eyom paga aakumi apit aret o time yagabit ari unggwogo logonet, nggween yagabit age, It aap lek eerogo pereegwaarak nogo kole o nda time ari namenggaarak wonogwe, Eerugun o.

²⁰ Naagalogwe kobak agaarak, ai, inombake nogo at owagam woraanuk, yogo logonet, O yi, nit logorak tenak lek abu yagabit aret me, nggween ambi mbet wo'niret o, yinuk, yogo logogun o.

²¹ Yogwi iinok, inikime mbake logonet, An ndegeninake logokit nduk aap ta nen apuri yi, ndarogo wo'negerak mbakop? Naagalogwe lek ogogwaarak kenok, niniki puru aago wonage, Ambinom ndaganaka'lek wubili wonage, Keele maarogo piya nogogwaarak iigak nalik aret wonage, Eeke nagagirak kwe, Elege-aabologwe yi, ta nen tawe eeginabeegerak mbakop? Mbo paneegwaarak nalik aret wonagagirak kwe, it yi, ngga nen wagaarak wonogo agaarik o? Yinuk, mbake logomunggun o,” yinuk, yoge kagarak o.

²² At Aliku Itok Menggerak ALA nen yegerak nogo yi o. “It aakumi endekem mendek neenggi walok yorage, Yi aakumi ndi aakumi ineenu agak ndiimbu walok eeke, Eeke neyaamunggun o. Eeke neenok, kaagalogwe wologwe lomooriren kiri wogwe, Kaagalogwe komologwe yarugiren kiri wogwe, Eerugun o.

²³ Wologwe-komologwe ti, ndegeninako logowak nduk, it yi aap ndi aap inendagembogut kogobamini negen ogwe, It inakuwi kumi yo'nggok nogo inaagalogwe negen eeppiinok, inelak kuninabuwak nduk, kagalomini pogom ogwe, Eeko logomenggaarik, It nen nggween paga inanep kumbunuk kayuk wukwi, Kabu'me tebe yinuk, kiyok paga pirik-perek yogwe, Eeko logogun o. Ti eekwi iinok, Naliku ALA an aret keenu arumunggun o. It aap an paga iniki lunik wonogwe nogo inenggali arugun lek o,” yinuk, yoge kagarak o.

²⁴ It aap wim eeka nen aakumi inagugun wonok nogwe me, ndinggologwe, Aap inogogun ambik aakumi keele maageren nogwe me, inagap ndakwi, Eeriyak op mbakop?

²⁵ Meek aret kwe, at Aliku ALA nen yegerak nogo yi aret. “It aap wim eeka nen aakumi keele maageren nogwe me, inagap ndake, Ndi, it aap inogogun ambik nen aakumi inagugun wonok nogwe iinok, ndinogo obaane'me pi wage, Eerigin mbake logot o. It aakumi kat tebenogo pagagwi iinok, an nen it tebenogo piige, Ndi, kat kaagalogwe inagap ndake, eeke logogin o.

²⁶ It tebenogo pagarak eekwi nogo it ineebe lombok aret nunggwi, Anggur amburu nenok kumili ogo mengga kwak it inamiya lombok nenok kumili kunggwi, Eeruwak nduk, Eeppiyaagin o. Ti eekwi iinok, At Yakup ogoba Nomaawi Lombok Minggirak, Kagap Ndaka, Wondet Eerogo Pagaga ti, Naliku ALA an aret me, Yi aap ndi aap abok ineenu arugun o,” yinuk, yoge kagarak o.