Yetaya 46 - Ala Wone Peenok Peebi Mbanak

Aakumi Mbaben inagugi inomaawi lek yoragagerak wone

¹ Aakumi Mbaben inagugi Mben nogo tebek ari, Inagugi Nebo nogo ngginnage, Eekaarak o. It kugi ti, inogut ogobakkigirik nogo nggweendo paga kwippunuk, tapi nen wonok nogwe, Tapi ta'liila eerak iigak, inagugi inogut ti, inoba luurogo piigwi iinok, aaninggin kagak wonok nogwe, Eeko agaarik o.

² Kugi ti, imbirak ambugwi aret tebek yogwe, ngginnogwe, eekaarak me, Inogut aago aaninggin kagak wonok nogwe nogo, it kugi nen it inogut nogo inagap ndakkoloorak meek me, Keele maarak negen inom nogo agaarik o.

³ At Ala nen ari logonet, “Kit Yakup ombowologwe yi wae. Kit Iterali paga wiganak awo wonogwe yi wae. An wone yokkirage yi, kinaruk konenggo logonip o. Kit awo nda'naga'lek kinagalomini inikime kiigak, ndegengginake, Nda'nogo mbareegup, tawe eekkinake, Eereegirak an aret me,

⁴ An nen aret kinarum wonage neegak, aakelo ari nogwe, Kineeruwak kenen wungge, Eerigin o. Kit kinanebunu warak eerogo pinagareegirak me, Ndegenggiren nage, yeenggwa kiranet nage, kinagap ndake, Eeke logogin o.

⁵ An ti, ta wakkagak yogwe, An ta ndak-ndak me eerogo panugwi, An nimbirak ndak-ndak ta wonage me, wakkogwe, Eeriyak mbakop? Lek aret o.

⁶ Aap nen mbuti emas inayuma yonggolak nogo kilirogo wuppugwi, Mbuti perak aaninggin wakkogwe, Eeko nagaatik, Aap mbuti emas ogobakkigika nen ti paga kugi ogut ogobakkigiruwak nduk, onggo wogogwi, Ogobakkigirogo pege kenok, abu'me tebe yinuk, ayuk wukwi,

⁷ Ti'nuk, kugi ogut aago nogo inuumbaga piyaninuk, nogo nagaatik, at logorak mbareegwam nogome kwippugwi, Eekwi iinok, Taati aret mi'ndak wonage menggerak o. Time nen ya langgok nage, Inoone nggwok paga yogwi kwe, wone onggo yorage, Aap maluk inoba kwi'nage kenok, inagap ndake, Eekeelik o.

⁸ Kit aap an noone, Eeriyak nineebi, mbaka yi wae. Wone ti abekwi, liippakwi, liippatinuk kiniki koonggwi, eeko logonip o.

⁹ O aa'nduk lombok nen arit wagagerak nogo kiniki abeko logonip o. Alik ambi wonage lek an Ala nalik aret o. An kwak alik ambi wonage lek Ala nalik aret o.

¹⁰ Wone eeriyak nogo awo warengga'lek kagak, “Age yobok ndogop eeke kaamunggup o,” yinuk, yokkirage, Ee'nariyak nogo awo eeka'lek kagak aa'nduk togon abok yokkirage, Eeke minggirak o. An eeriyak koonogo pigitak ti, mbeyok arilik o. Ata, eeriyak niniki mbake ti, a'me lik togon aret eeke minggirak.

¹¹ It towe nen towe nengga kero, oonegen lagi wage menggim pa'nggwe nen woraawak nduk, wiige, An eeriyak koonggitak nogo a'me aret eeruwak nduk, aap o nda nen woraawak nduk ayonggo pege, Eeriyak yagatak nogo aret eeke, Ndi, eeriyak koonogo pigitak nogo a'me lik togon aret eeke, Eeke minggirak.

¹² Togop me, kit aap, An mban iya, mbarit nega yi wae. Kit an noone yugu eeka'lek monggotak yi wae. An yokkirage kinaruk konenggo logonip o.

¹³ Eereegwaarak onggo ndak-ndak eeppiyaakit nduk woroorak nogo ti, nda lek koorok aret panggoni wage, Kinagap ndarikit nduk, elaambirik logogin lek mbet-mbet aret wage, Eerigin me, It o Tiyon wonogwe nogo wondet eerogo piige, Ndi, an abu tiyanak me, Wi! nugwi nogo, it Iterali ndak-ndak yoraawak nduk, eeppiige, Eerigin o,” yinuk, yegerak o.