Yetaya 42 - Ala Wone Peenok Peebi Mbanak

Aliku ALA ayeloman leenogo pereegerak wone

¹ “An nen leenogo pateegirak niniki kunik eeke, Eerit nage kagak panggombege, Eeke minggirak nayeloman eeke logorak nogo yi aret. An Naberiniki at oba pege neenok, At nen yi aakumi ndi aakumi wone yugu nogo a'me nggelok eeko logowak nduk, yoranet nege logogin o.

² Yoranet nage logonet, at oone nggwok paga yorage, Oone panggok togon yoranet nege, Tu paga nege logonet oone omaawi paga yoranet nege, Eeke logogin lek o.

³ Nggawi owak taganak nogo at nen kalenogo mbo pege, Ndi, keele kani kuru aago kagak wunuk ari nogo at nen nogonogo mbo pege, Eerigin lek o. Wone yugu it aakumi a'me nggelok eeko logowak nduk, liirogon aret yoranet nege logogin o.

⁴ O nggween paga yime wone yugu a'me nggelok eeko logowak nduk, omaawi eerogo pega'lek logonet, At iniki pi nagak ari, eeka'lek iinok iniki wakkolage, Eerigin lek o. It aakumi inawi o irip-irip nggween ku'mbanak me wonogwe nogo abok aret at oone yugu nogo iniki lunik logogun o,” yinuk, Aliku ALA nen yegerak o.

⁵ At mbogut nenaappunuk wiganogo pege, Nggween ogobakkigirogo punuk, iri'ngga-kale'ngga mban enete kuurik lek eerogo pege, It aakumi o nggween paga yime ineenik ndelenak-welenak nugu logowak nduk, ambe aagi inikime mambege, Eereegerak Aliku Ala nen yegerak nogo yi aret.

⁶ “Wone yugu a'me nggelok eeke logonok nduk, Naliku ALA nen aret kat wiigege, Eerit nage keegak, panggonggake logonet, karum wonage, Eerigin o. It aakumi ninom wone koonogo pereegirak nogo a'me aret eeke, Yi aakumi ndi aakumi inambik eya kaawak nduk eerogo piige,

⁷ Aakumi inigen mbuk wonogwe nogo inigen paganogo piige, Keele maarak wonogwe nogo piinogo wumbiige, Ndi, it aakumi o apit me keele maarak negen wonogwe nogo keele piinogo wumbiya wage, Eeke logonok nduk, An panggonggake logonet, karum logogin o.

⁸ An ti, Naliku ALA aret! An nendage ti aret o. Nendage abu tiyanak minggirak nogo, at alik ambi endage tiyak yuwak nduk, eeppege, Ndi, eeke minggirak paga, Wi, nugwi nogo, it aakumi nen inagugi ogut aago, Wi, irogo logowak nduk, eeppiige, Eerigin lek o.

⁹ Yogop eeke kaamunggup o, yinuk, aa'nduk yereegirak nogo muk kin agaarak me, Yogondak wone ngget alik mendek eeppiyoorak yokkege, Eeriyak awo kin aga'lek kagak kat yokkege, Eeke agarik o,” yinuk, yoge kagarak o.

Ala nen inagap ndareegerak kenok, ndawi wareegwaarak wone

¹⁰ Kit aakumi nggween irip-irip wonogwe yi, wae. Ndawi ngget mendek Aliku ALA ake wakwi, At mban alut eekwi, Eeko logonip o. Kat niyo laut kinikime wonogwe kinom yi wae. At alut eekwi, Laut iniki me kit nggween ku'mbanak inom, it kit paga wonogwe inom, at alut eekwi, Eeko logonip o.

¹¹ O karu inom, karume kota-kota wonogwe inom, inoone nggwok yogwe, Aakumi Kerat wonogo menggam o yaga'lili-yaga'lelo wonogwe nogo inale'nggen mbakwi, O kota Tela wonogwe nogo inale'nggen nen ndawi wakwi, Puut-puut kirin paga lagi nanuk, kuum-keek yogwe, Eeko logowak o.

¹² It o irip-irip nggween ku'mbanak me wonogwe nogo abok aret Aliku ALA endage tiyappugwi, It wonogo menggam nogome Aliku ALA endage tiyanak me, yoranet nugwi, Eeko logowak o.

¹³ Wim eeruwok nduk aap wakaa'ngget wundi wogo mengga kwak, Aliku ALA togop aret wundi wage, It aap wim eeka nen wim eeriyak inikime lik yuwak nduk eeko mengga kwak at togop aret eekkolage, Eeke logomenggerik, “Nawim yi o,” yinuk, inom perenggolage logonet, tebenogo piinok, eegin tiyak yigin o.

Ala nen apuri yeenggwaaroorak koonogo pereegerak wone

¹⁴ At Aliku ALA nen ari logonet, “An o maan togon noone ambi yaga'lek wonage, Niniki yanggoppunuk puk mban wonage, Eerit wage minggirak kwe, Yogondak perak, kwe elege enegen paganak yagan wake logonet kwa ari, iniki apit eeke, tat wake, eeke menggi kwak, an togop aret eeke agarik o.

¹⁵ An nen puut-puut tiyarogon inom, teberogon inom, nggween mbuk eerogo pege, Iri'ngga-kale'ngga wonage nogo teebat eerogo pege, Niyo nage abok aret owak eerogo pege logonet, nggween kin eerogo pege, Yilaa'nggun yenggenak nogo poronogo pege, Eerigin o.

¹⁶ It inigen mbuk negen wonogwe nogo tu ineenggo'lek me tu nigiren nage, It tu nogolik nogo paga wogoren nage, Tu apit aago paga nogwe iyo, nambokan wogwe iigak an naa'nduk tu eya eerogo pit nage, Tu tiyak-tebek paga nogwe iyo, an kagaarogo pit nage, Eerigin o. It inake eeriyak nogo ti aret. An mbo piyaagin lek abet aret eerigin o.

¹⁷ It aap iniki inagugiwak paga panggombugwi, Ninogoba alut eekwi kit aret o, yinuk, inagugi ogut nogo yorogwe, Eekwi nogo perak, An mbo piyaagin me, mondok inenggali arugun o,” yinuk, yegerak.

Iterali nen wone woorak ineebi mbakwi iinok yoragagerak wone

¹⁸ Aliku ALA nen ari logonet, “It aap inaruk logu ti, inaruk liirogon konenggwi, It aap inigen mbuk ti, inigen kaawak nduk pekkogwe, Eeruwak o.

¹⁹ Aap enegen mbuk ta agaarik mbakop? Lek o! Nayeloman aret! Ndi, aap an nappigirak aruk logu kwak ta wonage, Aap an noone wonok naga enegen mbuk kwak ta wonage, Naliku ALA nayeloman enegen mbuk kwak ta wonage, Eeko agaarik mbakop?

²⁰ Yi eekak ndi eekak arit wage ambik aret inigen kogo menggaarak kwe, liippega'lek wonogwe, Yi wone ndi wone inaruk ambik konenit wogo menggaarak kwe, inaruk logu negen eeppunuk wonogwe, Eeko agaarik o,” yinuk, yegerak me, yokkiragi o.

²¹ At Aliku ALA iniki abe koonak menggerak me, “An noone yugu ti, iya, yinuk, tiyappogo logowak nduk, Ao,” mbake menggerak kwe,

²² Aakumi alik nen it aakumi yi, inooppiinok inagugun waganggwi, Iname unggwi nanuk, inamendek kologwe, Mbuun ambena mbo wuppiigwi, o keele maarogo mambiigo menggam kumaarogo piya unggwogwe, Eeko menggaarak o. Ineebe tebenogo piinok, inagugun waganggwi iigak, it ambi nen yeenggwaara wogwe, Iname unggwi nanuk inamendek waganggwi iigak, it ambi nen munogo nappiiga'lek wonogwe, Eeko agaarik o.

²³ It aap kit kinenggela'me wonogwe nogo, ta nen wone ti aruk liirogon konengge, Ndi, wone ti liippege kenok, “Peebi ndogop aret eerigin o,” yinuk, ta nen yelok kage, Eerigin mbakop?

²⁴ At Yakup mendek iname unggwi nanuk inamendek kologwe, At Iterali mendek ineebe tebenogo piinok inagugun waganggwi, Eeruwak nduk, Ta nen eeppiyareegerak mbakop? At maluk eeppogo nogogurak Aliku ALA nen aret eereegerak nogo lek a? At eeriyak mbake nogo mugurok nogwe, At oone yugu nogo, “Konenuwok o,” yogwe, Eeka'lek wonogwe niinok eereegerak me,

²⁵ At anini kani kunik negen ninoba pinanege, Wim nen abu iya lombok ninoorit wagak yuwak nduk, eeppiige, Eereegerak o. Ti eerogo pinaneegerak nogo ti, kani omoonuk enggela'me negen wonogogurak kwe, niniki liippugwi, Kani nen nineebe nengge negen eeke nagagerak kwe, “Ndogop eekoorak paga ee'ninake,” mbakwi, Eeka'lek aret wonogogurak o.