Yetaya 41 - Ala Wone Peenok Peebi Mbanak

Aakumi Iterali wondet eerogo piiga wone

¹ “Kit o irip-irip nggween ku'mbanak lombok monggotak yi wae. Kinoone ugun-ugun yaga'lek kinaruk mban konenggo logonip o. Kiniki aaninggin wonogwe nogo tayok yuwak nduk, Kinanebunu lombok kiniki ambit eeppunuk wone koonogo pugwi, An yo'nirubagip nduk, nowagam wogwe, Eekwi kiinok, Aakumi inowak loonggo menggam kuwak eeppunuk, ninom wone amburu mbanuwok o.”

² Yoragagerak kuwak ari wogo mbareegwa, it yorage logonet, “Oonegen lagi wage menggim nen eegin tiyak yagak mban ari logowak nduk, ta nen eeppege, At eerukwak a'me nggelok eeppiige logowak nduk, ta nen yonggo pege, Eereegerak mbakop? At nen yi aakumi ndi aakumi tebenogo piinok, unde logowak nduk eeppege, It yi aap ndi aap inendagembogut tebenogo piinet nage logowak nduk eeppege, Eeke kenok, Awooluwak paga liirubu kwak eerogo piige, At eegin-omaale paga pubu anggen wiya nen wonok nggarek ari menggi kwak eerogo piige,

³ At nen it mugogo-magago mappiinok, agabolo mbangga'lek nggare agan o ambi me yigirogo piinet nage, Eeke menggerak

⁴ Ti abok aret eeriyak koonogo punuk, eeke logowak nduk, unde wake, O aa'nduk aakumi wiganit wundi wogwe iigak, o yime arit woroorak nogo koonogo pege, Eereegerak ti, Ta mbakop? Lek o! It aa'nduk nda'nogogwaarak nogo lek iigak aa'nduk lombok wonagagerak me, It irip paga nda'narugun nogo lek aremenggaarak iigak, mondok logogin Naliku ALA nen aret eereegirak o,” yinuk, yegerak.

⁵ It aakumi inawi niyo oolo ku'mbanak paga wonogwe nogo, ti eeke inigen kogo nagaatik, inagabiti mbakwi, It aakumi o irip-irip wonogwe nogo inaganak wakwi, Eeko logonet, Kuwak eeko agaarik o.

⁶ Kuwak eeppunuk, at ambi nen ore ambi iniki kwippegak, at ambi nen ore ambi iniki kwippegak, Eeko logonet, “Kogogumbuk kiniki nu'lek logot o,” yinuk, yogwe,

⁷ At mbuti owak ogobakkigika nen mbuti emas paga nabenogo pega nogo iniki kwippege, At matelo paga mbuti aan lebengga nen mbuti omanggen paga yiluk-yiluk eerogo pega nogo iniki kwippege logonet, “Ti abu op aret eekendak o,” yoge, Eeko logomenggaarik, Kugi ogut ogobakkigirogo pugwi nogo ngginnage kero, paku omaawi warogo pogo agaarik o.

Iterali Ala ayeloman kenok, yoragagerak wone

⁸ “Togop eerugun kwe, kat nayeloman Iterali yi wae. Kat an leenogo pagareegirak Yakup yi wae. At niniki kunik Abarakam paga wiganak yi wae.

⁹ An nen mbo pinagulik leenogo pinagareegirak nayeloman mini kit aret me, Kit nggween irip-irip me nen wokkinake, O irip me lombok nen wiigirage, Eereegirak o.

¹⁰ An kit ninom wonage me, kinagabiti mbakwi, An kinogoba Ala aret me, kiniki piirik ogwe, Eerugup o. An nen kinomaawi eerogo pinagage, yeenggwa kirage, Aap ambi nen tebenogo pinagukwak, neenggi omaawi abe'nggan paga pikkinake, Eerigin o.

¹¹ It aakumi abok aret nen inanini kinombakwi nogo inenggali a'nuk inendage maluk age, Kit tebenogo pinagarak mbakwi nogo, it ambi eeriyak lek aret inenggaawak lek ogwe, Eerugun o.

¹² It aakumi kit kinooriyak eekwi nogo kwaarinabumonggotak kwe, kinom abuk ogwe, It kinom wim eekwi nogo it ambi eeriyak meek aret age, Eerigin o.

¹³ An nen aret yeenggwa kiraagin me, kinagabiti mbarugup o, yinuk, Kineenggi abe paga pippinaganuk, kinogoba Naliku Ala an nen aret yokkirage agarik o.

¹⁴ Kit abu ndeyak puron kwak Yakup mendek yi wae. Kinomaawi abu lek waalo mbonoon kwak Iterali yi wae. An lombok nen yeenggwa kiraagin me, kinagabiti mbarugup o, yinuk, An Kikak Nakeelik Nalik Leenak Wondet Eerogo Pinagaga kit Iterali kinogoba Naliku ALA nen aret yokkirage agarik o.

¹⁵ Gandum ameneno wunduwak nduk, eyo engget tabenak engge'ngget ambik paga nikkenok nogo mengga kwak eerogo pinagage yi, liippatinip o. Aakumi puut-puut wonogwe nogo niik eerogo piya wa'nuk, inoorogo piinet nogwe, It puut mbuulogwe paga wonogwe nogo ameneno kwak mak eerogo piigwi, Eerumunggup o.

¹⁶ Ameneno wambit nage kenok, o wiya nen wonok nage, Wiya omaawi nabuninuk wage logonet, ameneno wonok nggarek ari, Eeke menggi kwak Togop aret eerogo piyaamunggup kwe, kit perak, Naliku ALA eeppinagage paga kinale'nggen nggwok nombakwi, An Kikak Nakeelik Nalik Leenak kinogoba nendage tiyappanugwi, Eeko logomunggup o,” yinuk, yorage kagarak o.

¹⁷ “It aap inalik eekkoloorak meek inom, ineenggi lek inom, nen niyo kwaaremenggaarak kwe, lek aret kogwe, Niyo abu nen inamili mbuk aago wonogwe, Eeko logonet, Nggino yo'nugwi iinok, Iterali inogoba an Ala nen mbo piyaagin lek Naliku ALA nen naruk konenigin aret o.

¹⁸ Puut-puut puluk ko aago paga nen niyo kilanogo wumbi wage, O kobappaga niyo eneeri wumbit wage, Karume niyo lek nogo yilaa'nggun yenggenogo pit wage, Niyo eneeri wunggeelik nggween woloonak nogo niyo eneeri tuburubu wumbit wage, Eerigin o.

¹⁹ O karume eyo kilu inom, liibu inom, yino inom, tayitun inom, yarogo pit nage, Karume aakumi lek me eyo kilu-kilu mendek eyo nggabina inom, eyo ndiindi inom, yarit nage, Eerigin o.

²⁰ Ti eerogo piminggirak nogo aakumi abok nen inigen kogwe, ineenu ogwe, Iniki liippugwi, Alom yi nduk eekerak kagi, yinuk, abekwi, Eeko logomenggaarik, Aliku ALA nen aret eekerak kogo o, yinuk, yogwe, At Kikak Nakeelik Alik Leenak Iterali inogoba nen aret yakerak kogo o, yinuk, yogwe, Eeruwak nduk, Eerogo pigin o,” yinuk, yegerak o.

Inagugi tebenogo piyareegerak wone

²¹ Aliku ALA nen, “Kit eekotak wone nogo yinip o,” ari, At Yakup ogoba nendagembogut nen, “Alom yogop nduk eekoorak, kin paga mbinininip o,” ari, Eeke agaarik o.

²² “Peebi ee'ninaburak, wone yo'niraawak o, yinuk, kinagugiwak wonok wa'nip o.” Yoragagerak wonok wogo mbareegwa, it kugi nogo yorage logonet, “Wone eebe nit liippugwi, Ndogop eeppinanigin kagi, yinuk, nineenu ogwe, Eeruwok nduk, Aa'nduk agagerak wone nogo yo'niroorak ilik,

²³ Peebi arit woroorak wone nogo yo'niroorak a? Kit kugi aret, nineenu aruwok nduk, peebi eeppinani woroorak wone ambi yo'niraanip o. Wi! yinuk, kinayuk wuruwok nduk, ambi ee'nip nda! Maluk ilik, obeelom a, ee'nip mban!

²⁴ Kit kugi yi, abe lek mendek kagak agan nogo ogotik! Ndi, eerit nogo monggotak ti kunduk, abe ambi eeppiyoorak lek we aanom warogo eerit nugu monggotak me, It kinayuk wuko logowak nduk, miikkinakwi nogo inogole warak aret menggaarak o.

²⁵ O omarip paga pa'nggwe nen aap ambi woraawak nduk inikime eeppigirak me, at muk wage, Oonegen lagi wage menggim pa'nggwe nen nendage kunit wage, Eeke agaarik o. Aap nggabok paga togolowak ogobakkigika nen togolowak ogobakkigirikit nduk iyok paga nggabok amok mbangge menggi kwak, At aap nogo wage logonet, togop aret it inendagembogut nogo iyok paga aambirak-mbirak eerogo piige logogin o.

²⁶ Wone ti, nineenu aruwok nduk, o maan aa'nduk ta nen yo'nira wage, Abet aret yigi o, yinuk, yuwok nduk, wone ti eeka'lek kagak ta nen yo'nirage, Eereegerak mbakop? Lek o! At eerigin nogo ti, kit ambi nen nit yo'nirogwe, Kit ambi nen, Ndogop eeke kaamunggup o, yo'nirogwe, Eerulik o. Kit kinoone yo'nirogwe nogo ambit iluk ambi ninaruk konenulik mban o.

²⁷ Aa'nduk lombok aakumi Tiyon mendek konenuwak nduk, Muk kiya wagaarak wonogwe iyaanip o, yinuk, yorage, Wone obeelom wone aakumi Yerutalem yora nawak nen nappege, Eereegirak nogo ti, an aret o.

²⁸ Yendok-wandok nenegen yambonit nege logonet, Kit kinenggela'me ambi nen, Wone ti, yogop aret o, yinuk, yo'nugwi, Kin wokkiige neenok, kit ambi nen wone onggo yo'nugwi, Eeka'lek me,

²⁹ Kit ambi eeppiyoorak lek we aret wonogwe, Eerit nogo monggotak ti, abe ageelik aanom warogo aret age, Ndi, o wiya wage kwe, mayu wonok wage lek we aret warit wage menggi kwak, kineebe togop aret eerak wonogwe, Eeko ogotik kiigi o,” yinuk, yegerak o.