Yetaya 35 - Ala Wone Peenok Peebi Mbanak

Inagap ndarak nen inale'nggen mbako logorak yoragagerak wone

¹ O karume inom, nggween mbuk ka'let-ndi'nduk eerak inom, nen inale'nggen mbakwi, O karu ale'nggen nen anggen mbilanogo wumbege kenok, ambit-mbit warit nage, Eerugun o.

² O karume waambi anggen tuk mbilenggen eerit nage kenok, ale'nggen nen ndawi wake, keekok ari, eerigin o. O Libanon iri'ngga kwit agan lagit nage kenok, “Wi!” irogo mengga kwak, Puut Karemen inom, o Taron inom, iri'ngga-kale'ngga abe lombok menggi kwak, O karume togop aret eerogo pemenggerak paga at Aliku ALA abu tiyanak wonage, Ninogoba Ala abinak pindan-pindan eeke, Eeke nogo Aakumi inigen kaagun o.

³ Kineenggi ndeyak aago wonogwe, kinendop yilugu wonogwe, eerak wonogwe yi, kinomaawi eekkologo logonip o.

⁴ It iniki waanggo mban-mban wonogwe nogo yorage logonet, “It nen aaninggin kinoba pinagagwi nogo, kinogoba Ala nen anini wuk togon onggo eeppiige logonet, Kinagap ndari woraagin me, Kinagabiti mbaka'lek kinogogumbuk logonip o,” yinuk, yorogo logomunggup o.

⁵ Ne ti eyom paga it aap inigen mbuk wonogwe nogo inigen kogwe, It inaruk logu nogo inaruk konenggwi, Eerugun o.

⁶ Ne ti eyom paga it aap inendop maluk nogo, rusa ku'mbonggak nege menggi kwak, ku'mbonggak nugwi, Inoone yogolik iniki apit nogo inoone warak a'nuk, inale'nggen nen keekok yogwe, Eeko logogun o. Ne ti eyom paga o karume niyo eneeri nggwok aret kilanogo wumbit wage, Karume kwe, niyo nggwok nage,

⁷ Mbini aganggen wonage nogo niyo nen yenggenogo pege, Niyo yawengga'lek nggween mbuk aago wonage nogo niyo tuburubu lagit wage, Ndi, o aa'nduk mba'ngge inawi miippatinuk wonogogwam nogome piinde inom, mbereewak inom, lagangge, Eeke logogin o.

⁸ O time tu nggwok wonage logogin me, tu endage, “Aap Iniki Kikak Naka'lek Nogo Menggam,” yogo logogun o. It aakumi inabin koorak lek maluk eeko menggaarak kenok, tu ti paga nogo logogun lek o. Ata, it tu ti paga noorak uugwe mbakwi kenok mban nogwe, It aap iniki yuundurak kwe, tu kin aret me, kobak aga'lek nogwe, Eeko logogun o.

⁹ Tu ti paga singa inooriyak nduk nage, Wam nggwiya anini nen nibininabikit nduk nage, Eeko logogun lek me, It ti mendek ti, ambi iigo logogun lek o. It aap Ala nen inagap ndaremenggerak nogo mban tu ti paga wogwe,

¹⁰ It aap Aliku ALA nen wondet eerogo piyamenggerak nogo iname o Tiyon tu ti paga unggwi wogwe, Eeko logogun o. Unggwi wogo logonet, inale'nggen nen keekok piyanggogwe, Iniki ale'nggen mondok logorak mendek inikime nggelok ari logonet, inete yanggu aago wonogwe, Eeko logogun o. Iniki puru yogwe, iniki wakkologwe, eekwi nogo mondok lek age kagak Obaane'me inale'nggen alik negen aganake, Iniki kani moonuk negen nggelok ari, Eeke logogin o.