Yetaya 30 - Ala Wone Peenok Peebi Mbanak

Iniki o Metit paga panggombugwi iinok, inabuwa, yoragagerak wone

¹ At Aliku ALA nen, “It napuri inogogumbuk logonet, an eeriyak mbake nogo, Eeruwok, mbaka'lek it eeriyak mbakwi nogo mban eerit nugwi, Aberiniki nappi wagagirak nogo inom a'nuk eeka'lek aakumi inom a'nuk eekwi paga maluk eekwi nogo nggwok arit wundi nage,

² An yo'nega'lek logonet o Metit nogwe, Aap Pirawun nen yeenggwa niraawak o, yinuk, at abu'me unggwi nogwe, O Metit paga nineebe obeelom aret logowok o, yinuk, yogwe, Eekwi kwe,

³ Aap Pirawun abu'me wonogwe paga inenggali age, O Metit ineebe obeelom wonogwe paga inendage maluk age, Eeke kaagun me, inabuwa o.

⁴ It aap Yekura inoweewi o kota Yowan muk unggwi nogwe, It nappiigaarak nogo kunduk, o Kanet ari nogwe, Eekaarak kwe,

⁵ Aakumi time mendek nen it yeenggwaarogwe, ambi eeppiigwi, eerugun lek aanom warogo inom logogun me, Inenggali age, inendage maluk age, eerigin o,” yinuk, yegerak o.

^6-7 Ndiimbu-nggwiya, towe-pagi, o karu nggwok nenaarak o ame pa'nggwe wonogwe nogo eeppiyoorak abinggaanggo paga Ala nen yoreegerak yi aret. “Singa ngguunok-kooli inanini ambik inom, waalo nggitamuru inom, waalo age yombak aakumi inooka inom, Wonogo menggam tu ayilik warak lombok kagak inamendek keledai inamborowak paga kwippugwi, Inageerok onggo nggwok nogo unta inamborowak paga keele maarogo pugwi, Ee'nuk wonok It aakumi onggo lek ambi eeppiigwi, yeengwaarogwe, eeriyak inombakulik o Metit mendek ira nogo menggaarak me, An nen o Metit endage ti, Waalo Wi Yuundurak o, ari minggirak o,” yinuk, ari kagarak.

It aakumi Ala oone yugu konembunuk liirogon eekulik wone

⁸ “Togop me, it aakumi ti, peebi inigen kenok, Ndogop nduk liiru mbaneegerak o, yinuk, Mondok-mondok abeko logowak nduk, yugum tabak paga ayo wagangge, Mbuku pirik-perek aago paga liiru mbangge, Eeri nak o.

⁹ It aakumi ti, an eeriyak mbake nogo eeriyak ineebi mbakwi, Napuri aret kwe, ineenu kagak, Nineenggo'lek o, yogwe, Naliku ALA nen inaruk wake nogo, Koneniyak nineebi o, yogwe, Eeko logonet,

¹⁰ Aap inabi kaga nogo, Kinabi ambinom koorak mage o, yinuk, yorogwe, It aap an nen yorage neegak yoraga nogo, Obeelom eeko logorak kinigen kenok, ambinom yo'niroorak mage o. Ata, wone ninikilom mbakwi mendek mban yo'nirogwe, Ndogop kwak ee'ne, mbakwi nogo mban yo'nirogwe, Eeko logonip o.

¹¹ At Kikak Nakeelik Alik Leenak Iterali inogoba nogo nen togop yokkirage agaarik o, yinuk, yo'niragak eeriyak ti mage o. Nit eerit nugwi yi, eeko logogun aret me, kit eeriyak mbakotak ti, eerit nogo logonip o, yinuk, yorogwe, Eeko agaarik o,” yinuk, ari kagarak o.

¹² Togop eekwi me, at Kikak Nakeelik Alik Leenak Iterali inogoba Ala nen yegerak nogo yi aret. “It o karu nggwok wonogwe nogo nen an noone yorage yi, taganogo mbo punuk, It aakumi tebenogo piigwi, wiwi eeginakwi, eekwi nogo mendek iniki inoba panggombegaarak ti, maluk aret eekaarak me,

¹³ Yugum pak wurik tiyarogon langguk togon wambikit nduk, irip to eerogo pege nagaatik, Aberak lek me langgu-langgu wangge menggi kwak aret age kaagun o.

¹⁴ Aap ambi niyoowak inikilom lek kenok, yigirogo nappegetak yigirik-noonom nagaatak telenak paga kani anggen ndoonogo wonok nogwe, Ka'mbena niyo yenggenak tomaarogo wumbugwi, Eeriyak meek menggi kwak, It paga iniki panggombunuk wonogwe nogo togop aret arigin o,” yinuk, yegerak me yokkiragi o.

¹⁵ At Kikak Nakeelik Aliku Itok Menggerak Iterali inogoba ALA nen yegerak nogo yi aret. “Iniyokan an nowagam wa'nuk, Yeenggwa niraawak o, yinuk, to'neegwi iinok, an nen inagap ndake, It ugun nu'lek wonogo logonet, iniki noba panggombugwi iinok, an nen inomaawi eeppiige, Eerikit lak, Ineebi mbako menggaarak o.

¹⁶ It nen yogo logonet, Lek o! Nit kuda paga kwi'na'nuk kole mbaganugun o, yagaarak paga Aakumi nen mugogo mappiyaagun me, aret kole mbaganggwi, It nen, Nit kuda inogowa ambik paga kwi'na'nuk kole mbaganugun o, yagaarak kwe, It muguren wogwe inaguda perak, inogowa ambik aret me, it awo mbaganggwi iigak, inoba kwi'nogwe, Eekwi iyaagun o.

¹⁷ At ambit nen inooriyak wage inigen kogo logomenggaarik, ineebe seribu aret mbaganggwi, Ineebe 5 nen inooriyak wogwe iinok, ineebe abok aret kole mbaganggwi, Eeko logonet, Aap abu inooko o, yinuk, puut kirin paga aap inoorak inabetagi nggoorak eyo paga tugumbugwi, Wooluwak inariwa puut paga yindumbugwi, Eeppunuk mbaganggo mengga kwak, Ineebe ambitak mban ko wappunuk logogun o,” yinuk, yegerak me, yokkiragi o.

¹⁸ Togop kwe, at Aliku ALA nogo nen, “Obeelom eeppiyaakit lak, ao,” yinuk, tokkiige, Kinabuwa nen eeppinagakit nduk, pipuk aago wonage, Eeke agaarik o. At Aliku Ala a'me nggelok eeppiige menggerak me, “Eeppinanuwak o,” yinuk, It abok aret at tokkogwe nogo inale'nggen mbako logogun o.

Ala nen at apuri obeelom eeppiyoorak yoragagerak wone

¹⁹ Kit aakumi o Tiyon mendek kota Yerutalem monggotak yi wae. “Yeenggwa niret o,” yogwi kiinok, at abet aret kinabuwa nen yeenggwa kirage logogin me, kit le ambinom yogo logomunggup lek o. Kinoone nggwok paga at nggino yogwi ti eyom paga aret at konembunuk, onggo yokkiraagin o.

²⁰ At kinogoba Ala nen kinambi kwak aaninggin kinoba kwippinagage, kinaniyo kwak andi-pandi eekkinake, eeremenggerak kwe, at mamunggiraga ti, ambinom kumaarak logogin lek o. Kinigen abe nen aret kogo logomunggup o.

²¹ Tu agigan paga nogwe, ogugan paga nogwe, eekwi kiinok, kinambokan nen wone ambi ari logonet, “Tu ti aret me, ti paga nanip o,” yinuk, yokkirage kinaruk konenggo logomunggup o.

²² Kinagugiwak mbuti perak paga nabenak inom, kugi ogut ogobakkigirik mbuti emas paga nabenak inom, “Yi maluk ogole warak aret,” mbakwi, ndi, kumi tut kagaatak inayum paga lenggenak mbo pogo mengga kwak, “Kugiwak inom, kugi inogut inom, yi, yayi logorak lek o,” yinuk, mbo wumbugwi, eeko logomunggup o.

²³ At nen kineyabume yi mendek ndi mendek awi yarumonggotak mbilanuwak nduk, mayu nappi woramenggerak paga kinambi ambik abe aret nunggo logomunggup o. Ne ti eyom paga kinaanggumi nggween nggwok wiganak paga inagari'ngga abe nenet nugwi,

²⁴ Yabu wagangga kinerapi inom, kinageledai inom, nogo inambi abe amok mbanak nunggo menggam koonogo piigwi iinok nunggwi, eeko logogun o.

²⁵ Aakumi mondok iya lombok inoorogo piinet nage, o nggorek wurik langgunogo wurabit wage, eeke eyom paga puut tiyarogon paga inom, puut teberogon paga inom, abok aret niyo elaganggen alitik-alitak wundi wage logogin o.

²⁶ At Aliku ALA nen at apuri inamiyayilik-inamiyayelok eerak wonogwe nogo nggerenogo piige, inawinde-inobaande aago nogo obeelom eerogo piige, eeke eyom paga tut abinak nogo oonegen abinak kwak age, ndi, oonegen nogo ti, ne ambit paga wundi wage ti eya mbuuluk kwe, nogo ambit paga ne 7 kuli lambunik wundi wage kenok, eya mondok alik negen eerogo pege menggi kwak aret age, eerigin o.

It Atiyut mendek aaninggin inoba piyoorak yoragagerak wone

²⁷ At Aliku ALA nogo o nda nen kin ari wa'nuk anini kani kunik negen eeke, Ka'luk yarugu-parugu eeke enggela'me wage, Anini lombok inikime logonet, oone ari, Kani nen iri'ngga yoguk togon eeke menggi kwak oone togop ari,

²⁸ Niyo wurik paga aap inenggaanok kuli ari lagangge kenok, ke'mbogonik yogo mengga kwak, Ala anini ke'mbogonik ari, Maluk kenok leenogo punuk, lek eerogo piyaawak nduk, at nen yi aakumi ndi aakumi piyak-piyak aganake, Yi aakumi ndi aakumi mbutigeele inogobak me pugunogo piinok, wogoren nage, Eerigin o.

²⁹ Ndi, inale'nggen eeko logorak ne leenak nogo paga oonikiya inale'nggen logonet, eeko mengga kwak, Kit perak, kinale'nggen nen ndawi wakwi, It aakumi inale'nggen nen mbuti luu'ngget oone eerit Aliku ALA abuut paga laganggwi, Yugum Lunik kwak Iterali inogoba nogo alut eerit laganggwi, Eeko mengga kwak, Kit togop aret kinale'nggen mbakwi, Eeko logomunggup o.

³⁰ At Aliku ALA oone ari kenok iya mbakwi nogo it aakumi inaruk konenggwi, Ndi, mayu lubu-lubu wangge, o wiya omaawi warit wage, mayu kumulinggen wangge, eeke kagak, at anini mondok alik negen mbake, Kani iri'ngga nenet nage menggi kwak at anini togop aret age, Eeke logonet, eenggi omaawi paga aaninggin inoba kwippiya wage nogo inigen kogwe, Eeruwak nduk, Eeppiyaagin o.

³¹ At Aliku ALA oone ari kenok, it Atiyut mendek inogut nage, Ndi, at ambim mbanak paga inoorogo piige, Eerigin o.

³² Lobale eeka inom, nggitat inom, eeko logonet, ndawi wakwi iigak, Aliku ALA ambim mbanak paga miiri nage, yombak inooke, miiri nage, yombak inooke, Eeke logogin o.

³³ At aap endagembogut Atiyut mendek nogo kani kuniyak ake aa'nduk muk pipuk eerogo pereegerak wonage o. Ti eerogo pereegim nogome inikime teberogon kabunik wonage, ambe wiganak lombok wonage, Kani wurik mban yagabit aago wonage, eerak me, kani kunik kwindagala eerogo nagake menggi kwak, Aliku ALA ambe aagi nappemenggerak paga kani logonak nogo abok aret wunuk yigin o.