Yetaya 3 - Ala Wone Peenok Peebi Mbanak

Kota Yerutalem inom, o Yekura inom, aaninggin oba puurak wone

¹ It aap o kota Yerutalem inom, o Yekura inom, iniki panggonak wonogwe abok aret At Omaawi Lombok Menggerak Aliku ninogoba ALA nen ndinogo waagin o. Inambi-inagi pipuk aago inom,

² Aap wakaa'ngget aap wim eeka imbirak inom, Aap inowak loongga aap Ala nen yorage kagak yoraga imbirak inom, Aap mbi waka aap aakumi inowe imbirak inom,

³ Aap wim eeka ineebe 50 inowe aap obanggat tiyarogon imbirak inom, Aap inom wone koongga inom, aap tili pagangga abu eenu inom, aap iniriingget wiiraga inom, It abok aret ndiniren nawak nduk eeppiige logomenggerik,

⁴ Inapuri wologwe nen inarum logowak nduk mippiige, Elege-aabologwe nen wone lengganogo yorogo logowak nduk, eeppiige, Eerigin o.

⁵ It aakumi ti nen an iya kat iya yogo logonet, It ambi nen it ambi tebenogo piigwi, Imbirak koorok wonogwe nen at ambi tebenogo pegak eekwi, Wologwe nen inogobamini tebenogo piigwi, Inendage lek nen inendage warak tebenogo piigwi, Eeko logogun o.

⁶ Ti eyom paga aap ambi ogoba ame wonage me, ore ambi nen at eenggi pippunuk yoge logonet, “Kayum abe negen yirik wonage me, ninowe a'nuk, o yigirik-noonom eerogo pugu yi, unde logot o.”

⁷ Yoge mbaremenggi, at nen oone panggok togon yoge logonet, “An nen o yi ena koonogo puurak meek o. Yum inom, mbi inom, an name wonage abu lek me, aakumi inarum logorak yo'niriyak ti mage o,” yinuk, yorigin o.

⁸ Aliku ALA inenggela'me abu tiyanak wonage kwe, it inoone yogwe paga, it eerit nugwi paga, Endage tebenogo pogo logonet, miyuk-meya eerogo pugwi me, Kota Yerutalem muk langgok-panggok eeke, O Yekura abu aret mi-mi wangge, Eeke agaarik o.

⁹ Maluk eeriyak inete yelok iigwi iigak, eerit nugwi, Inomaluk nobarogo eeka'lek aakumi Torom mendek eeko nogogwa kwak tena'me kin-kin aret eerit nugwi, Eekwi me, inabuwa o! It ti eekwi paga inalik nen aret aaninggin inoba pakaarak o.

¹⁰ “It aap iniki abe koonak perak, obeelom eerit nugwi paga obeelom anggen mbanogo nagun me, It obeelom enaani ndegenak aret logogun, yoret o.

¹¹ Aap maluk mendek ti, maluk inoba arigin me, inabuwa o! It nen aakumi maluk eeppiigo nogogwaarak nogo ndak-ndak eeppiyaagin me, inabuwa o!

¹² Wologwe nen it an napuri tebenogo piigwi, Kumi nen wone lengganogo it yorogwe, Eekwi me, it an napuri ti, It inarum menggaarak nogo nen tu alik paga wogoren nogwe me, It noorak mbakwi nogo nogwe iyo, kobak eerogo piigo agaarik o,” yinuk, yegerak me, yokkiragi o.

Aliku ALA nen at apuri inowak looniyak wone

¹³ Aliku ALA aakumi inowak loongge menggim kwi'nari unggwage, Aakumi abok inowak loonikit nduk mi'nage, Eeke agaarik o.

¹⁴ Aliku Ala nen at apuri inoweewi inom, inarum menggaarak inom, inowak looninake logonet, “It nen aret neyabu anggur yarak anggen mbanogo nenet nugwi, Aakumi ineenggi lek inamendek ndinogo iname yagabit eerogo pati unggwogwe, Eekaarak o.

¹⁵ An napuri piyak-payak eerogo piinet nugwi, Ineenggi lek mendek ale-pale eerogo tebenogo piigwi, Eekwi ti, Nonggop nduk eeko agaarik o?” yinuk, at Omaawi Lombok Menggerak Aliku ninogoba ALA nen aret yegerak o.

It kumi Yerutalem mendek kurumbi yoragagerak wone

¹⁶ Aliku ALA nen ari logonet, “Kumi o Tiyon menggaarak inigen mbogut paga nugwi, Inenggaanok wo yagak nugwi, inigen unggut eerit nugwi, Iniyok irip paga pit nugwi, Iniyok paga pugu'ndalik-pugu'ndalek aago oone ngginu-ngginu agan nugwi, Eekwi me,

¹⁷ Inogoba an Ala nen it kumi Tiyon mendek inanobak paga yigani telek eerogo piige, Naliku ALA nen inerali mbanogo piige, Eerigin,” yegerak o.

¹⁸ Ti eyom paga it kumi Yerutalem mendek iniyok paga pugu'ndalik-pugu'ndalek aago inom, inanobak keele maarak inom, wurooli inenggaanok me yirik inom,

¹⁹ inaruk ayo inom, ineenggi paga mberaarenggen yarak inom, inayum inete paga lenggenak inom,

²⁰ nggare-nggare inanobak paga yirik inom, inandelen paga tenggen yarak inom, mbilak inomarip paga nggerenak inom, inagabolo obari abe eeka toolak inom, yi-ndi nuuka inom,

²¹ ineenggi amburu pega ineenggi paga nggelenak inom, inogobak ayo aago inom,

²² inayum-inerali laago paga yeengga inom, inayumoogi inom,

²³ inabugagi inom, inayum aken mendek yawenak inom, ineeruwak keele lambunik inom, inayum inenggaanok me wurabak inom, inobaanggi-inobaangge aago ti abok aret nggoorogo mbo nappigin o.

²⁴ Obari abe eeka inoba aago nogo lek age kagak inanggoloppari ndi wuke, Inambilak inomarip paga eerak obaane'me tali akun mbanak yirik nugwi, Ineeruwak mbinuk-mbenak eerak obaane'me inanobak puluk ko aago nugwi, Inambogoyum kigirikwe yirik nogo obaane'me inayum nibinik maluk mendek yirippunuk nugwi, Kumi inete kigirikwe obaane'me inete maluk aremenggerak inenggali mbakak nugwi, Eeko logogun o.

²⁵ Kinawuri nogo wooluwak nen nengge, Kinapuri aap wakaa'ngget wim nambuko logonet inookwi, Eerugun me,

²⁶ O Tiyon tu unggwogo menggam nen inerabun ndoongge, inale'nggup maake, Ndi, kumi inakom kin kenok, yinduk-wanduk nggween paga kwi'nogo mengga kwak, o kota ti togop aret age, Eerigin o.