Yetaya 27 - Ala Wone Peenok Peebi Mbanak

Iterali inagap ndareegerak wone

¹ Ne ti eyom paga Aliku ALA ambuti wooluwak paga maluk onggo eeppiige, Ambuti wooluwak mondok nggorek ngget penak maarak omaawi mendek nogo wonok wage logomenggerik, At waalo kole Lewiyatan tu agan nage, Waalo nggwok komaarak tuk togon nage, Eeke menggerak Niyo nggwok laut paga menggerak abu ogole warak nogo, warogo pege, eerigin o.

² Ne ti eyom paga “Anggur anggen abe mendek yaremenggerak wonage logogin me, at Ala nen ndawi paga anep pogo logonip o, yigin nogo yi aret.

³ Anggur anggen abe mendek yaremenggerak nogo ti, Naliku ALA an aret unde wake, Kulinik-kalinik niyo kilirogo pit nage, Aap ambi nen maluk eeppege kero, ko'lu-kii'me arum wonage, Eeke logogin o.

⁴ Ti eeke logonet, an nanini neyabu yaremenggerak ti paga wonage logogin lek o. Nggonggoondu tibinik-wandinik eerak kwak, eeppiigwi, Alok-palok lagangge menggi kwak, eeppiigwi, Eekwi nenegen kage kenok, Mbanogo kani pigin kwe,

⁵ Eeppiiga'lek neenok, it nen, Nineebe op logorak at abu'me ari ungguwok o, yinuk, Neya wogwe iinok perak, ninom lambungge, Abet aret ninom lambunna'nuk wonage, Eeruwak o,” yinuk, Ndawi yugun nogo ti aret.

⁶ Eyo omanggen wurake, ambit-mbit wappunuk anggen yege, Anggen yugu ka'let age, eeke menggi kwak, Ne peebi ari wage ti eyom paga it Yakup paga wiganak nen inomanggen yakwi, Iterali paga wiganak nen ambit-mbit wappunuk anggen yugwi, Ndi, anggen yugu ti, o nggween paga yime mondok ndak wa'nogwe, Eerugun o.

Ala apuri aaninggin inoba piyaagin, yoragagerak wone

⁷ Inawim mendek nen Ala apuri aaninggin inoba piigwi iinok, Aliku ALA nen aaninggin inoba piige nagagi kwak at apuri ndak-ndak eeppiyareegerak mbakop? Ndi, it aakumi nen at apuri inookwi iinok, inooke nagagi kwak, at apuri togop aret inooreegerak mbakop? Lek aret o.

⁸ Eeppiyoorak mbareegerak nogo liirogon eeppiige logonet, aap inambik wonogo menggam logowak nduk, nappiige, O wiya oonegen lagi wage menggim pa'nggwe time nen omaawi ambik warit wage kwak, Anini aagi nen it inanggween paga nen wumbiige, Eereegerak ti paga

⁹ It Yakup paga wiganak maluk eeko nogogwaarak paga Ala anini mbake nogo nini tayo ari, Ndi, inomaluk abet aret mbo pugwi iinok, anggen abe yi'nage menggi kwak yelok kogwe, Eeriyak nogo ti, Inagugi alut eeko menggam yugum paga ogobakkigirik nogo kwi yigirogo pogo mengga kwak yigirogo pugwi, Inagugigwe Atiyera ageyo arelen yinik nogo mbanogo pugwi, Obari abe kaga kani kunggo menggam ogobakkigirik nogo yigirogo pugwi, Eeriyak nogo ti aret.

¹⁰ O kota yugum pak wurik nu'lek wonage nogo o wogo aret wonage, Karume yi oone ndi oone lek menggi kwak aago wonage, Eerak wonage me, Time tapi inaagalogwe inagari'ngga mbanogo nenok winnogwe, Eyo anggup-engga konaarogo nunggwi, Eeko logogun o.

¹¹ Ndi, eyo eno'mbak ti mbuk age kenok, it kumi nen wogo logomenggaarik, Kalembunuk, wonok nanuk, kani kunggo logogun o. It aakumi yi ti, iniki lek kobak aret wonogwe me, at ogobakkigirogo piiga nen inabuwa mbake, At ogobakkigirinaka nen obeelom eeppiige, Eerigin lek aret o.

“Aa'nduk wonogogwa kwak eerogo piyaagin,” yereegerak wone

¹² Gandum ambitak mban pippunuk, mbanogo anggen menenggo mengga kwak, ne ti eyom paga Aliku ALA nen kit aakumi Iterali mendek yi, niyo Eparat nen nok Metit kuli wonogwe nogo ambit kambok waganogo kuwak eerogo pinagage logogin o.

¹³ Ndi, ne ti eyom paga mban oone nggwok eeka trompet nogo oone pu nggwok eeke kenok, it aakumi Iterali mendek o Atiyut kobak ogogwaarak nogo inom, o Metit mbo nappiya nogogwaarak nogo inom, puut alik leenak Tiyon kota Yerutalem nogome kuwak ari wogo logomenggaarik, Aliku ALA alut eeko logogun o.