Yetaya 26 - Ala Wone Peenok Peebi Mbanak

Inagap ndarogo piige kenok, ndawi wako logogun wone

¹ Ne ti eyom paga it Yekura wonogo menggam ndawi wako logogun nogo yi aret. Nit ninawi kota mondok omaawi aret wonage agaarik o. Yugum pak wurik eyak panggonak ti paga ninagap ndarak logowok nduk, ninogoba Ala nen eerogo pinanege me,

² It aakumi iniki abe koonak mendek nen Ala mbake liirogon eeko menggaarak nogo, Unggwi woraawak nduk, tu pak ambe paarogo pinip o.

³ Aap ambi Aliku ALA oba panggonak wonage kenok, iniki nu'lek wonage nogo, Iniki ugun mondok tayenak logowak nduk, Aliku ALA nen eeppege menggerak o.

⁴ At Aliku ALA, nit ninogoba Ala nogo ti, Yugum Nu'lek mondok itok menggi kwak aret me, Kiniki at paga mondok-mondok panggonak logonip o.

⁵ It aap, “Nit wonogo monggom tiyanak me, ninomaawi ambik wonogwe,” mbako menggaarak nogo at nen tebenogo piige, Aakumi inawi kota yugum pak tiyarogon wurik nogo langgunogo pege, Langgunogo nggween paga wuppunuk, liirubu aa'ngga eerogo pege, Eeke menggerak me,

⁶ It aap tebenak inom, ineenggi lek inom, nogo nen iniyok aan lebenogo pit nogo agaarik o.

⁷ It aap iniki abe koonak nogo tu mot-mot mban nogo menggaarak me, Kat kiniki abe koonak yi wae. It aakumi iniki abe koonak nogo logorak inaru tiyak-tebek kenok ndenenogo pit nage menggendak o.

⁸ Kaliku ALA wae. Ninawone amburu mbani woraanok nduk, tokkeego ogoorik o. “Kat kendage kunggwi, koba abekwi, eeruwok lak, ao,” lombok mbako monggoorak.

⁹ Oonikiya paga, “Nimbirak lambunikit lak, ao,” mbake, Ndi, o weege paga, “Keyaakit lak, ao,” mbake, Eeke minggirak. O nggween paga yime nen aakumi inowak looni wage eyom paga Kat a'me nggelok mban eeke menggendak nogo it aakumi nggween paga wonogwe abok aret ineenu arugun o.

¹⁰ It aakumi maluk eeko menggaarak nogo inabuwa nen teppiige kwe, obeelom eeko logorak mamunggologo logolik o. Abe koonak eeko logorak eerit nogo menggam logonet kwe, maluk mban eerit nugwi, “At Aliku ALA iya o,” yinuk, ayuk wukwi, Eekulik aret o.

¹¹ Kaliku ALA wae. Maluk onggo aaninggin inoba piyoorak keenggi nippunuk wonage kwe, Inigen keega'lek aret agaarik o. Kapuri alik eekwi iyo, kiniki aganggen kerek togon panggombiinet nage nogo Inigen keego logomenggaarik, inenggali age, Ndi, kani nenet nage menggi kwak, kawim aaninggin inoba piyoorak koonogo pegendak nogo it aret inoba kwi'nage, Eeruwak o.

¹² Kaliku ALA wae. Nit eerit wogo nogogurak nogo abok aret kat nen eeppinanege keegak eerit wogo nogogurak me, Niniki ugun tayenak logowok nduk, eerogo pinanege agandik o.

¹³ Kaliku ninogoba Ala wae. Kat keegak, ninogobamini wone lengganogo yo'nirogo nogogwaarak ineebe ambik aret kwe, Kat kendage mban tiyappagago ogoorik o.

¹⁴ It aap ti, eeko nogogwaarak nogo onggo eeppiige logonet, inenggaawak lek eerogo piige, Inoba aberak logokwak inendage lek eerogo piige, Eekendak me, It muk kambeegwaarak nogo ti'nuk, ineenik ogwe, Ndi, inogoma nen ineenik a'nuk wogwe, eerugun lek o.

¹⁵ Kaliku ALA wae. It aakumi yi ineebe ambik eerogo piige, Ineebe ambik wiganogo piige, Inanggween kuli mbanak kagak ambe wiganogo pege, Eereegindak paga Kat kendage mondok tiyanak aret agaarik o.

¹⁶ Kaliku ALA wae. Nit nonggop eekkoloobok kenok, kat kowagam wogwe, Niniki koonnaruwak nduk, aaninggin ninoba pinanege mbareegin, “Ai-ao,” yogo logonet, tamban eekwi, Eekoorak o.

¹⁷ Kaliku ALA wae. Kwe ambi elege ndarikit nduk enegen paganak andi nen yagan wake logonet, kwa ari menggi kwak, Nit togop aret kat kenggaanom paga yagan wako nogoorak o.

¹⁸ Kumi inabila elege ndaruwok nduk yagan wakwi ti pogom nit yagan wako nogoorak kwe, Kebubu mban wundi wagaarak o. It aakumi nggween paga yime wonogwe nogo inagap ndarogo piigwi, Aakumi o nggween paga yime logorak wiganogo piigwi, Eerulik o.

¹⁹ It kat kapuri kambeegwaarak nogo perak, ineenik ogwe, Inowak nggininik abok aret mi'nogwe, Eerugun me, Kit aap nggween taambinagareegwaarak wonogwe yi wae. Kineenik a'nuk, kinale'nggen nen keekok yogo logonip o. O weege kagak konaananggen nen iri'ngga-kale'ngga ki eerogo pege menggi kwak, It kambeegwaarak nggween taanak wonogwe nogo ngget nda'nogwe kwak ineenik agago mippiyaamunggun o.

Inowak loonogo punuk aa'nduk wonogogwa kwak eerogo piyaagin wone

^20-21 It aakumi nggween paga maluk eeko nogogwaarak onggo eeppiyaakit nduk, Aliku ALA wonage menggim nen wundi wage kenok, It aakumi inamiya nggween paga kilirogo piigo nogogwaarak kiraarak wonage nogo Nggween ti nen, “Yi ket o,” yinuk, titik ege, Ndi, inoorogo piyareegwaarak inamiya nggween taanak wonogwe nogo kin eerogo nippiya wage, Eerigin me, Kit an napuri yi wae. At Aliku ALA anini mbake nogo lek age kagak, Kiname lombok unggwi nogo logomonggotik, kinaru nakkologwe, We luulu kumaarak wonogwe, Eeko logonip o.