Yetaya 22 - Ala Wone Peenok Peebi Mbanak

O Yerutalem eeppuurak wone

^1-2 O endage, Abinggaanggo Kobappaga, eeppuurak abinggaanggo paga Ala nen yoreegerak nogo yi aret o. “It o kota time inawi wurik o kirin ndoonak paga lombok lagit nanuk, wonogo logonet, Inale'nggen nen noone-koone yogwe, Inale'nggen nggelok yegerak paga ugun-ugun eerit nugwi, Eekwi ti, Nonggop agaarak kenok agan nogo agaarik? Inoweewi inookaarak nogo, wooluwak paga inookwi, Wim nambuko logonet kanggwi, Eerulik o.

³ O kota ti, awuri ineegin unde inoweewi abok aret kole mbaganit nogwe, Maale mbak-mbak iraga'lek iigak ineebe piginabit wogwe, Awuri wakaa'ngget nogo kole o nda mbaganit nagaarak kwe, pippiinok ambugwi aret keele maageren nogwe, Eekaarak kagak Nonggop nduk inale'nggen agan nogo agaarik?

⁴ An perak, aakumi an napuri niniki kundugu ineebe ambik inoorak paga Niniki maluk a'nuk leenggu maake neegak, ina koonogo pe'neegwi, Niniki eyak wappanugwi, Eerugwaarik o,” yinuk, ari kagarak o.

⁵ “O Abinggaanggo Kobappaga nogome it aakumi ugun naalop-kaalop eerit nugwi, Aakumi nobogom-kobogom nogo logonet, iniyok aan leben-leben nogwe, Inagabolo nirik-kirik nage kagak pelen-pelen nogwe, Eeko logonet, Pak wurik nogo langgunogo pugwi, Yeenggwaaraawak nduk inoone eerogo puut paga nappugwi, Eeriyak eyom Nomaawi Lombok Minggirak Naliku inogoba an Ala nen koonogo pereegirak wonage agaarik o.

⁶ Ti eeriyak eyom ari wage kenok, It aap Elam mendek nen ineegin-inomaale li'luk eekwi, Inawuri wim eeka nen inanggweendo paga, inaguda paga, kwi'na'nuk wogwe, It o Kit mendek nen inanggeemu nggoorogo waganggwi, Eeppunuk,

⁷ Inanggween mili kobappaga wonage nogo paga nggweendo wim eeka mban yagabit aago wonogwe, It wim eeka kuda paga kwi'ndak wogwe nogo, o inagota tu pak mbanak paga li'luk eeppunuk wonogwe, Eekwi iinok,

⁸ It Yekura op logowak nduk inomaawi eeppunuk wonogwe nogo muk lek agaarak o. Ne ti eyom paga o nggwok abe wurik endage Eyonggaame yigin-maale pugume kwaari nogwe,

⁹ O Ndawut agota yugum pak wurik mi-mi aago inigen kogwe, Eeko nagaarik, Niyo Narak Ogunggwe wonage nogome niyo mbininogo mambugwi,

¹⁰ O kota Yerutalem o wurik nogo apit aret ineenggi lingginogo punuk, Ando mimbunuk pak wurik mi-mi aago nogo omaawi eerogo pugwi,

¹¹ Ndi, pak wurik agi-ogu kagak niyo oolo time nappunuk, niyo aa'nduk narak nogome nen mbininogo mambugwi, Eekwi iigirak kwe, Ti eeriyak eeginabeegerak nogo, “At nen aret yeenggwa nirage,” yinuk, an pe'neegwi, Eeppiyoorak koonogo pereegirak nogo liipppanugwi, Eeka'lek aret iigirak o.

¹² Ne ti eyom paga kit le yogwe, leenggu maakwi, Kineeruwak wiirogo nappugwi, purok yikut eekkologwe, Ee'nip o, yinuk, Nomaawi Lombok Minggirak Naliku inogoba an Ala nen yoragagirak kwe,

¹³ It nen inale'nggen nggelok yinuk, ugun-ugun eerit nogo logonet, Nit ko'lu aret kambuurak me, amele o, yinuk, Tapi inom, ndomba inom, warogo lappunuk, Enggaanggum larak nenet nugwi, anggur amburu nenet nugwi, Eekwi iigirak o,” yinuk, yegerak me, yokkiragi o.

¹⁴ Ndi, naruk konengge neegak at Omaawi Lombok Menggerak Aliku ALA nen an yo'nege kagarak nogo yi o. “It inomaluk ti, an nen lek eerogo piyaagin lek itok kunik kagak aret kambugun o,” yinuk, at Omaawi Lombok Menggerak Aliku nogoba Ala nen aret ari kagarak me, yokkiragi o.

Aap Tebana Eliyakim imbirak eeriyak yoragagerak wone

¹⁵ At Omaawi Lombok Menggerak Aliku nogoba Ala nen an yo'negerak nogo yi aret. “Aap endagembogut awi o nggwok abe wurik unde wonogwe inowe Tebana wonage me, Nage logomenggendik, Wone yori nu o, yo'negerak nogo yokkiri o.

¹⁶ Kat yime nonggop eeke agandik o? Ndi, keebe nggween taambagarak puut lunik yime nenaakko'net unggwi nage, Yonggonggolage logowam mbuti tege paga yugum yanggunit unggwi nage, Eeke yi, Ta nen yokkegerak paga eeke agandik?

¹⁷ Kat aap yi wae. At Aliku ALA nen keebe waganogo o nda time nappagarak nduk, eeke me, liippake logot o.

¹⁸ Lawi agabolo abu omaawi perenogo punuk, O nda nggween nggwok aagome nogome mbo nappogo mengga kwak, kat togop aret nappagamenggerak me, Time aret kangge, ndi, time aret kanggweendo abu abe nogo mbo pege, Eeremenggendak paga Kowe endagembogut endage maluk aret eerogo pumunggun o.

¹⁹ Kat yabu ambinom eeriyak lek o, yinuk, keebe tebeppagage logonet, Yabu eeke menggenom nen wumbagagin aret o,” yinuk, yo'negerak me yokkigi o.

²⁰ “Ne ti eyom paga an nayeloman Kilikiya aput Eliyakim nogo wiirigin o.

²¹ Wiiriminggirak wage kenok, kat kayum nggorek waganogo at yippege, kagabee'le yike menggendak nogo waganogo at yippege, kat kamunggat nggoorogo at oba pege, eerigin o. Ti eeke neenok, it aakumi o Yerutalem wonogwe inom, it Yekura paga wiganak inom, inogoba aret arigin o.

²² At nen Ndawut paga wiganak abu'me logowam tu kunci nogo at aret eenggime pigin me, at nen tu pake kenok, aap ambi nen nake, ndi, tu nake kenok, aap ambi nen kuuke, eeriyak meek aret o.

²³ Eyo paga paku mondok omaawi warak menggi kwak, an nen aap ti, unde logowam mondok omaawi nu'lek eerogo pigin me, at eerit nage paga owe-awot inom, at paga wiganak inom, inayuk wuko logogun o.

²⁴ Togolowak mbuulogwe ndeyak mendek kwak, togolowak kole omaawi mendek kwak, it at paga wiganak inom, at paga awi mbilanak inom, abok aret at paga mban panggonak wonogwe nogo paga inendage tiyanak logogun o,” yinuk, yegerak o.

²⁵ At Omaawi Lombok Menggerak Aliku ALA nen ambinom ari logonet, “Ne ti eyom eyo paga paku mondok omaawi warak nogo eyo pili age kagak paku kinok togon wambigin me, yi mendek ndi mendek paku ti paga tugunik nogo a'nggan yumbunik-telenak wambigin o,” yinuk, at Aliku ALA nen aret yegerak o.