Yetaya 20 - Ala Wone Peenok Peebi Mbanak

O Metit inom, Kuti inom, eeppuurak wone

¹ Aap Atiyut endagembogut Taragon nen at awot ineegin warak inowe lombok o Atorot unggwi nanuk tebenggolaawak nduk, nappiige mbareegi, tebenggologogwaarak

² tahun ti paga, aap Amot aput Yetaya nen aakumi yorage logowak nduk, Aliku ALA nen at yoge logonet, “Kayum maluk mendek keebe paga yirik ti inom, kiyok ogut inom, nggoorogo pu o.” Yoge mbareegi, at yoreegerak nogo ndak-ndak aret ayum inom, iyogogut inom, nggoorogo punuk, we aret nege nagagerak.

³ Nege kagak Aliku ALA nen ari logonet, “O Metit kunduk, o Kuti kunduk, ineenu agak logowak nduk, an nayeloman Yetaya nogo tahun kenagan paga ayum inom, iyogogut inom, yirik lek kin nege nogo ndak-ndak

⁴ at aap endagembogut Atiyut mendek nogo nen aakumi o Metit mendek keele maagiren noorak inom, it o Kuti mendek o nda mbo piya noorak inom, it o Metit mendek inenggali mbaruwak nduk, aap inanggok kunduk, aap tawe kunduk, inayum-iniyogogut yirik lek inakom kin aret wogoren nagin o.

⁵ It aakumi o Kuti iniki panggombunuk wonogwe nogo inom, O Metit ti iya o, yinuk, wogoppiigwi nogo inom, nen iniki ma'nogwe, inenggali ogwe, eerugun o.

⁶ Ne ti eyom paga it aakumi inawi niyo laut aa'nggi paga menggaarak nogo nen yogo logonet, Aap endagembogut Atiyut mendek nen nit ninooke kero, niniki panggonak wonogwe, yeenggwa niraawak nduk, mbe agan yora nogwe, ninagap ndaruwak nduk wiirogwe, eekoorak nogo yi eeppiigaarak iyaanip o. Togop me, nit ninagap ndakko'nok mbaganiyak abu meek aret kogo o, yinuk, yogo logogun o,” yinuk, yereegerak o.