Yetaya 11 - Ala Wone Peenok Peebi Mbanak

Aap Itayi paga agarip ndarigin wone

¹ Eyo muurik andokon Itayi paga nen agarip ndake, Omanggen paga agarip ndappunuk, anggen yege, Eerigin o.

² Aliku ALA Aberiniki at oba wonage logonet, iniki warak lombok eeppege, Yi wone ndi wone eenu eeppege, Wone koonogo yorage logowak nduk eeppege, Iya eeriyak mendek eeke logowak nduk omaawi eeppege, Aliku ALA eenu me, agabiti mbake logowak nduk eeppege, Eeke logogin o.

³ At inikilom mbake logorak nogo ti, Aliku ALA ayuk wuke logorak ti aret. At enegen kenok mban aakumi inowak loongge, Aakumi yogwi iinok, inawone amburu mbangge, Eeke logogin lek o.

⁴ Ata, Ala yegetak ndak-ndak aap tebenak mendek inowak loongge, It aap ineenggi lek nogo eekaatak a'me nggelok inawone mbanogo piige, Eeke logogin o. Muun obate mbanak paga inooko mengga kwak, At nen wone yorage paga aakumi o nggween yi paga wonogwe nogo koonogo piige, Ndi, ambe aagi paga aap maluk mendek mondok lek eerogo piige, Eeke logogin o.

⁵ Inaa'ndok paga inagabee'le yirik mban mengga kwak, At nen eekaatak a'me nggelok eeppiige, Ala yegetak ndak-ndak at liirogon mban eeppiinet nage, Eeke logogin aret o.

⁶ Mba'ngge nen ndomba aagalogwe inom ugun wonage, Mba'ngge anini ambik nogo kambin imbirak tabonak windak wonage, Eeko logogun o. Ndi, tapi aagaluk piirigalo singa awooluk imbirak iri'ngga mbanogo nenet nugwi iigak, wulaga mbuuluk nen enegen pagaluk wogoren nege logogin o.

⁷ Tapi nggwiya yagat mbuk piyangga imbirak iri'ngga mbanogo nenet nugwi, Inaagalogwe imbirak inawi mbambunuk nogo yugwi, Tapi lembu nunggwaangga owak mbanogo nenet nugu mengga kwak singa togop aret nenet nugwi, Eeko logogun o.

⁸ Elege awo elak nengge nen waalo muuru enoona nen wundi wage menggim taati yine kungge, Elege awo mbuuluk waalo aliirumbuk anggen punuk wonage me eenggi mambege, Eeko logogun o.

⁹ Niyo laut yenggenak nggween kaga'lek nobarogo pereegi kwak, At Aliku ALA eeke menggerak nogo it nggween paga wonogwe abok aret ineenu arugun me, An nabuut abu alik leenak nogome At ambi nen at ambi maluk eeppegak eekwi, At ambi nen at ambi nibinogo pi nagak eekwi, Eeko logogun lek o.

Aakumi Iterali eegu iniyokan woraagun wone

¹⁰ Ne ti eyom paga eyo omanggen Itayi paga agarip ndaremenggerak nogo yi aakumi ndi aakumi ineenu agak aret mi'nage, aakumi inanebunu lombok nen at abu'me ari unggwogwe iinok, at logowam mondok tiyak ari, eeke logogin o.

¹¹ Ne ti eyom paga ninogoba Ala nen at apuri eegu yumbunik o Atiyut nen, o Metit agi-ogu nen, o Kuti nen, o Elam nen, o Mbaben nen, o Kamat nen, niyo laut oolo ku'mbanak paga wonogwe nen, abok aret aa'nduk eereegi kwak, ne ambi eenggi omaawi paga wondet eerogo piinok, iniyokan iname piya woraagin o.

¹² At nogo nen yi aakumi ndi aakumi abok inake ineenu agak mippege, Iterali wogoren mbo piya nogogwaarak nogo kuwak eerogo piya wage, It aakumi Yekura mendek yi o ndi o irip agi-ogu, aru-ogwe, ma'nogogwaarak nogo Kuwak eeppiinok, iniyokan piya wage, Eerigin o.

¹³ Piya woraagin me, it Eparayim mendek nen, “Nit togon eeppinanuwak lak, it mban eeppiige, ao,” yinuk, Ineebi inombakwi nogo lek age, It Yekura mendek inom wim mbanak nogo lek age, Eerigin me, Eparayim nen, “It mban eeppiige, ao,” yinuk, it Yekura ineebi inombakwi, Ndi, it Yekura nen it Eparayim mendek inom ambinom ogoorak wonogwe, Eeko logogun lek o.

¹⁴ Ata, it abok aret lambu yinuk, It aap oonegen kilu yi nage menggim pa'nggwe it Pilitin mendek puut elan-elan wonogwe nogo, ne ambit wigak togon inoba kwi'nari nogwe, Aakumi oonegen lagi wage menggim pa'nggwe wonogwe nogo Inagugun ko'nok ndi yogwe, O Erom inom, Mowap inom, tebenggologwe, It aakumi Amon mendek inabu'me tebenogo piya nogwe, Eeko logogun o.

¹⁵ At Aliku ALA nen o Metit paga niyo laut ogobak pi nagagim woloonogo pege, Niyo Eparat paga eenggi nappege kenok, o wiya kani kunik negen warit wage logonet, niyo nogo poronogo pege, Eeke kenok, Elaganggen 7 mogonogo pemenggerak paga alobok lek aremenggerak me, aap iniyogut yirik aret wunda wogo logogun o.

¹⁶ O aa'nduk togon Iterali o Metit nen wundi wogwe iigak, tu abe eerogo piyareegi kwak, At apuri eegu yumbunik o Atiyut wonogwe nogo iname woraawak nduk, Tu nggwok mbininogo piyaagin o.