Yetaya 10 - Ala Wone Peenok Peebi Mbanak

¹ It aap eeriyak koonak nogo nomonogo mbo punuk, alik eeko logowak nduk, yiluk-yiluk wone lengganogo yorogwe, Aaninggin inoba logowak nduk, wone koonogo yorogwe, Eeko menggaarak nogo, inabuwa o!

² It aap ti nen aakumi ineenggilek nogo obeelom eeppiyoorak koonak kagak non mbanogo piigwi, An napuri tebenak nugwi nogo inawone liirogon koonogo piyoorak kagak maluk-maluk koonogo piigwi, Eeko logonet, Alom lek kagak it kumi togwe inamendek kologwe, Elege moono inageerok ndinggologwe, Eeko menggaarak me, inabuwa o!

³ Togop eekwi me, eekotak onggo aaninggin kinoba ari wage, Kineebe lek eerogo pinagarak nduk, o nda nen wogwe, Eeriyak eyom paga nano eeriyak mbakop? “Yeenggwa niret o,” yinuk, mbe agan aap ta yori nogwe, Kinamendek ambik aago nogo o nggeeme punuk mbaganggwi, Eeriyak mbakop?

⁴ Lek aret me, aakumi keele maagaren nogwe inenggela'me yipik agan nogwe, Aakumi inoorit nogo logonet, kit kinom kinookwi, Eekwi ti mban aret eekkinako logogun o. Ti abok eekkinabugun aret kwe, At anini kinombake nogo lek aga'lek ambinom kinoba pinagakit nduk, “Ndime eeri nanip o,” yinuk, eenggi titik irage agaarik o.

Atiyut mendek aaninggin inoba piyoorak wone

⁵ Ala nen ari logonet, “It aakumi Atiyut mendek inabuwa o! It aakumi Atiyut mendek ti, nanini an napuri eeppiyoorak neyawi kwak, Niniki aagi eeppiyoorak muun mbanak kwak, It aret me, inabuwa o.

⁶ It Atiyut mendek nogo it aakumi an noone liirogon eekulik mendek inowagam nappiya wage, It aakumi an nanini eeppanugwi nogo inageerok ndinggologwe, Inamendek kugun waganggwi, Tu paga purok iniyok amok mbanogo pit nogo mengga kwak ineebe iniyok aambiranogo piinet nogwe, Eeruwak nduk, nappiya wage, Eerigin kwe,

⁷ At aap Atiyut inowe endagembogut ti nen togop mbaka'lek at alik mbake, At alik eeriyak koongge, Eeke agaarik o. Yi aakumi ndi aakumi abok inenggaawak lek eerogo piyaakit o, yinuk, ari logonet,

⁸ An nawuri ineegin warak inoweewi abok ti, inendagembogut mban wonogwe nogo lek a?

⁹ Ndi, it nen kota Karekemit tebenogo pereegwa kwak kota Kalono tebenogo pugwi, Kota Arapat tebenogo pereegwa kwak, kota Kamat tebenogo pugwi, Kota Ndamitik tebenogo pereegwa kwak kota Tamariya tebenogo pugwi, Eerugun lek mbakop?

¹⁰ O Yerutalem inom, Tamariya inom, inagugiwak ambik kwak lek it aap inendagembogut inabu'me piinok menggam inagugi ogut aago ambik lombok wonage nogo, An neenggi omaawi paga tebenogo piige nagagirak me,

¹¹ It Tamariya mendek inagugi ogut aago yale-pale eerogo punuk, o tebenggolagagirak kwak, It Yerutalem inagugiwak yale-pale eerogo punuk, o ti, tebenggolaagin lek mbakop? Tebenggolaagin aret, yegerak o,” yinuk, at Ala nen yereegerak o.

¹² At Ala nen it puut Tiyon paga wonogwe inom, kota Yerutalem wonogwe inom, eeppiyoorak koonogo pemenggerak nogo worok togon eeppiige kenok, at nen, “It Atiyut mendek inowe endagembogut wogoppake, An iya, mbarit nage, eeke ti paga aaninggin oba kwippigin o.

¹³ It Atiyut mendek inowe endagembogut nen ari logonet, An nalik neenggi omaawi paga yi eerit nage, Niniki warak lombok yi wone ndi wone neenu me eeke, Eeke logonet, It aakumi inanebunu lombok inanggween kuli ogoorak nogo ya langgok eerogo pege, Inamindik-inamendek pipuk aago wonage nogo ndinogo wagangge, An aap wakaa'ngget me, inoweewi inendagembogut tebenogo piinet nage, Eereegirak o.

¹⁴ Aap ambi nen towe awina kagak eenggi mambege menggi kwak, aakumi inanebunu lombok inamendek kolage, Towe ako awina teppunuk wunggetak kagak aap nen ako kabulogo wagangge menggi kwak, yi aakumi ndi aakumi inanggween tebenggolage, Eeke neenok, Towe a'naabit lambu-lambu eeke menggi kwak, it ambi nen ndelenak-welenak yogwe, Towe oone nggek-nggek ari menggi kwak, inoone ya-mba yogwe, Eerulik o, Yinuk, yegerak me, aaninggin oba kwippigin o,” yinuk, yigin o.

¹⁵ Aap ambi aye paga eyo muuke kagak, ye ti nen, “At aap yi, iya lek o. An perak iya o,” yinuk, wogoppake, Ndi, aap ambi anggege paga eyo mbangge kagak, nggege nogo nen, “At yi lek o. An mban iya o,” yinuk, tiyappake, Eeko menggaarak mbakop? Aap ambi owaanggun wagangge kenok, waanggun nogo nen, “An nen kat wokkabi o,” yinuk, yoge, Ndi, yawi mbanak nen, “Yogop eeru,” yinuk, aap nogo yoge, Eekulik o.

¹⁶ Togop aret me, at Omaawi Lombok Menggerak ninogoba Aliku ALA nen aap Atiyut mendek inowe endagembogut awuri ineegin warak wakaa'ngget nogo kugi wuruurit eeginaka inoba kwippiige, Ndi, iri'ngga kani wunuk ari logonet, pup eerogo nengge menggi kwak, At endage nggwok age paga wogoppatit nage nogo, togop aret lek eerogo pege, Eerigin o.

¹⁷ It Iterali Eya Eeginaka ti, kani kunik kwak age, Inogoba at Kikak Nakeelik Alik Leenak ti, kani wunuk ari menggi kwak age, Ee'nuk wage logonet, Aap eerit nage ti, alok-palok inom, iri'ngga ku'mbanak inom, kani ne ambit liingge nengge menggi kwak togop aret lek eerogo nagin o.

¹⁸ O at unde menggim yi eyoongga ndi eyoongga inom, yi yabume ndi yabume eyo awi yarak inom, abu abe kwit agan lagit nage nogo, Aap andi nen eebe wuruurit a'nuk kangge menggi kwak at togop aret lek eerogo pigin o.

¹⁹ Yi eyo ndi eyo teppemenggerak nogo ambitak mban me, elege ambi nen eenggi lingginiyak op aret arigin o.

Iterali eegu yumbunik inili yuurak yereegerak wone

²⁰ Ne ti eyom paga it Iterali eegu yumbunik at Yakup paga wiganak inenggela'me nen kole mbaganugun nogo, At aap it tebenogo piiga oba panggonak logogun lek o. Ata, at Kikak Nakeelik Alik Leenak Iterali inogoba Aliku ALA oba mban panggonak logogun o.

²¹ Eegu yumbunik nogo iniyokan wogwe, At Omaawi Menggerak Ala owagam wogwe, Eerugun o.

²² Iterali wae. Aakumi kit mendek ineebe mbini niyo aa'nggi paga menggi kwak wonogwe kwe, Ineebe mbuuluk mban iniyokan yungguninuk Ala owagam woraagun o. It eeko logomenggaarak onggo ineebe lek eerogo piyoorak koonak nogo eeppiyamenggerak ti paga at a'me nggelok eeke menggerak mondok wigak yigin o.

²³ It aakumi o nggween paga yime wonogwe lek eerogo piyoorak koonogo pugu nogo, At Omaawi Lombok Menggerak Aliku nogoba Ala nen aret eerigin o.

Atiyut mendek aaninggin inoba piyoorak wone

²⁴ Togop me, at Omaawi Lombok Menggerak Aliku nogoba Ala nen yegerak nogo yi aret. “It an napuri o Tiyon menggaarak ti, It aap Atiyut mendek nen yawi paga inookwi, Aa'nduk it o Metit mendek nen eeginabeegwaarak ndak-ndak it ti nen muun mbanak paga inookwi, Eekwi iinok, Inagabiti mbarugwaarik o.

²⁵ An ne mbuuluk logonuk nanini it paga wonage nogo tayo ari logominggirik, Nanini it Atiyut mendek inoba piige logonet, ineebe lek eerogo piyaagin,” yegerak me, yokkiragi o.

²⁶ At Omaawi Lombok Menggerak Aliku ALA nen aap o Miriyan mendek puut yugum lunik Orep paga eeginabeegerak ndak-ndak it keele ya'mbiran paga inooke, Ndi, o Metit paga waanggun nippunuk wonage kagak eeppiyareegerak nogo ndak-ndak it Atiyut mendek aaninggin inoba kwi'naruwak nduk, owaanggun titik irage, Eerigin o.

²⁷ Ne ti eyom paga it Atiyut mendek nen aaninggin iya lombok kinuumbaga pinagamenggaarak nogo at nen piyanogo nappege, Eyo aaninggin kinuut paga pugu nogo waganogo mbo pege, Eerigin o. Kineebe ela kologwe me, eyo aaninggin kinuut paga pinagagun nogo lek aret arigin o.

It Atiyut mendek wim eereegwaarak wone

²⁸ It aap Atiyut mendek ineegin warak nen aakumi o Ayat inawi tebeni unggwogwe, Ti'nuk, o Migoron kagak nok, o Mikamat wogo nagaarik, wim eekak inom, mbi kambu inom, time punuk,

²⁹ Niyo ayo mbanggo menggam wunda woraanuk, “O Nggeba nogo yuwok o,” yinuk, keekok piyanggogo mbaka, It aakumi inawi kota Aramat wonogwe nogo inaganak wakwi, It aakumi o Nggibeya aap Tawun wonagagim wonogwe nogo kole ma'nogwe, Eeko agaarik o.

³⁰ O Nggalim Aagalukwe kwak kit o Nggalim monggotak yi wae. Ya-kwa yinip o! Kit Layitiya monggotak yi wae. Kinaruk logonip o. Kit Anatot wonogwe yi wae. Wone onggo ambi yinip o.

³¹ It o Maremena wonogwe nogo kole mbaganit nogwe, It Nggebim wonogwe nogo muk aago mbaganggwi, Eeko agaarik o.

³² Ne yogondak aret ninawim nogo o Nop puk ari wagaarak wonogo logonet, O Tiyon Aagalukwe puut paga kota Yerutalem nogo, “Ko'lu koori wogo o,” yinuk, Ineenggi titik irogo agaarik o.

³³ Togop eekwi iigirak me, Aakumi nen eyo eno'mbak konaarogo nappogo mengga kwak, At Omaawi Lombok Menggerak ninogoba Aliku ALA nen omaawi ambik paga it aap ineebe tebenogo piige, Inanggup tiyanak nogo eyo muurogo pogo mengga kwak, ineebe lek eerogo piige, Ndi, inendage tiyanak nogo inendage lek eerogo piige, Eerigin o.

³⁴ Eyonggaame yembuti paga eyo muurogo nappit nogo mengga kwak togop aret eerogo piinet nage logonet, Yi eyo ndi eyo o Libanon mendek at Omaawi Lombok Menggerak nen muurogo nappiyaagin o.