Yetaya 1 - Ala Wone Peenok Peebi Mbanak

YETAYA WONE

YEKURA MENDEK INOM, YERUTALEM MENDEK INOM, EEPPIYOORAK ALA NEN YETAYA YOGE KAGAK YORAGE NAGAGERAK WONE (Pasal 1-12)

¹ Aap Utiya, Yotam, Akat, Kitikiya, it nen aakumi Yekura inoweewi inendagembogut ambi agak, ambi agak, eeko logonet, wone lengganogo yoragak eekwi iigak, o Yekura inom, kota Yerutalem inom, eeppuurak at Amot aput Yetaya abinggaanggo paga kage nagaatik, yorage nagagerak nogo yi aret.

Ala mugurok noorak ineebi mbakwi iinok, yoragagerak wone

² Kat mbogut yi wae. Karuk konengge, Kat nggween yi wae. Liippege, eekwi kiigak, Aliku ALA nen yegerak nogo yi o. “Napuri an nen ndegeninake, tawe eeginake, eeke nagagirak kwe, It an noone konembunuk eeriyak ineebi nombako agaarik o.

³ Tapi nen, Ninogoba yi aret kogo, yinuk, liippugwi, Ndi, keledai kunduk, inogoba nen inambi pipuk eerogo piige menggim ineenu wonogwe, Eeko menggaarak kwe, It an napuri Iterali perak, inogoba an liippanega'lek kobak aret wonogo agaarik o,” Yinuk, yegerak o.

⁴ Kit aakumi maluk mban eeka mendek yi wae. Kit maluk mban kinoba luurik wonage, Maluk awi mbilanak kit aret porogo wonogwe, Wologwe maluk eeriyak lek mendek kagak eerit nugwi kwak eerit nugwi, Eeko logonet, At Aliku ALA mbo pugwi, At Kikak Nakeelik Alik Leenak Iterali inogoba nogo meek eerogo pugwi, Kit kinambokan munogo pugwi, Eekwi me, Kinabuwa o!

^5-6 Kinanobak paga abok aret kinawin kunik mban wonogwe, Kinooke kagak, kiniki lek-lek eekkinake, Kiniyok ogut kuli nen nok kinanobak kuli, obeelom ambi wonogwe lek piirik-kunik aago mban wonogwe, Kinawinde-kinobaande aago wonogwe, Kinoba pirikut-parakut eerak wonogwe, Eerak nogo lek aruwak nduk, tubunogo wumbakwi, Wip amburu mburunogo punuk, nggerenggologwe, Eeka'lek aret wonogwe kiigak kwe, At nen ambinom kinoorikit nduk eeke, At nen yokkirage nogo, “Eeriyak nineebi,” mban mbakwi, Eekwi ti, Nonggop nduk eeko ogotik?

⁷ O kit monggo'nom yi oone ndi oone lek logowak nduk, eerogo pugwi, Kinawi kota-kota kunduk, kani nen pup nawak nduk eerogo pit nogwe, Kinigen kiigak aap alik nen kineyabu aago it aret nunggwi, Ndi, aap inambik nen eerogo pogo mengga kwak, kineyabu aago alom kinik-kenok eerogo pugwi, Eekaarak wonage agaarik o.

⁸ Anggur yarak me, ooliya wurik kwak, Nggilu yarak me, arum logorak o wurik kwak, O kota aakumi nen tebenggola unggwogo logonet, eeko mengga kwak, O Tiyon Aagalukwe ti, togop aret aago agaarik o.

⁹ At Omaawi Lombok Menggerak Aliku ALA nen nit ambiriluk ambi yumbunogo pinaniyak mba'netak lek en O Torom inom, Nggomora inom, eerogo piyareegi kwak nit eerogo pinaninetak o.

¹⁰ Kit aakumi inarum waka o Torom wandek yi wae. At Aliku ALA wone yokkirage nogo kinaruk konenggo logonip o. Kit aakumi Nggomora wandek yi wae. Ninogoba Ala nen eeko logorak wone yereegerak yi, liippogo logonip o.

¹¹ Aliku ALA nen ari logonet, “It inaanggumi apit-apat warogo wo'nugwi ti, ta ake warogo wogogo agaarik? It ndomba ngguunok inoorogo nake kani kunggwi, Tapi inaagalogwe inooppunuk, inamok leenogo wo'nugwi, Eekwi ti, Pekkoorak woobut ee'nake, Tapi ngguunok inom, ndomba aagalogwe inom, kambin ngguunok inom, Inamiya an ninikilom mbakeelik neebi lombok ee'nake, Eeke agaarik o.

¹² Ninom lambunuwok nduk wagak mban eeko nogotik, an nawi wurik oore'nggam tigone-tagone eerogo puurak, ta nen yoragaarak?

¹³ It nen warogo wo'niri wogwe ti, inomaluk inoba lenggenak kagak wo'niri wogwe me, Aanom warogo eekwi ti, mbo puwak o. Kani kunggwi obari ti, ogole warak lombok kage agarik o. Tut ngget penengge paga lakwi, Ne 7 paga yonggonggologo logonet lakwi, It kuwak eeko logonet lakwi, Eekwi ti, Inomaluk wonage kagak eekwi me, pekkoorak meek lombok ee'nake,

¹⁴ Tut ngget penengge paga lakwi inom, Ndi eyom paga lako logorak, koonogo pugu inom, An mondok neebi lombok ee'nake, eeke me, Ti eekwi ti abok aret aaninggin lombok noba luurogo panugwi me, piyakkoorak anggon lombok ee'nake agaarik o.

¹⁵ It ineenggi paga aap inamiya wonage kagak eekwi me, Tamban eeko logonet, ineenggi nippunuk eekwi iinok, an nena nomok ari, Ko'lu-kii'me tamban eekak mban eeremenggaarak kwe, an naruk konengga'lek mbo pege, Eerigin o.

¹⁶ It ineenggi kookwi, Inalitak lombok inoba mbeenogo pakwi, Nenegen neegak, maluk eeriyak eeginake nogo mbo pugwi, Maluk eekwi nogo yogondak aret puk ogwe, Eeruwak o.

¹⁷ Eeko logomenggaarik, Obeelom eeriyak mendek mamunggologwe, A'me nggelok eeriyak mendek mugurok nogwe, Aap tebenak mendek iniki eyak wappiigwi, Elege moono inake koonggwi, Kumi togwe eeppiyoorak inawone mbanggwi, Eeko logowak o,” yinuk, ari kagarak me, yokkiragi o.

¹⁸ At Aliku ALA nen ari logonet, “Wone agaarak yi, ninom koonuwok nduk woraawak o. It inomaluk maa'ngga amu kunik kwak wonage ti, ndugu-ndugu abinak kwak eerogo piige, Inomaluk tawi maarak kwak wonage ti, ndomba eeruwak yanggwi kwak eerogo piige, Eerigin o.

¹⁹ Wone an yorage yi, Konenuwok o, yinuk, ndak-ndak eekwi iinok, It o time ineyabu eeremenggam anggen abe mban mbanogo nunggo logogun kwe,

²⁰ Eeriyak, ineebi mba'nuk, mbo pugwi iinok perak, Wooluwak nen ambeme yonggorinabigin o,” yinuk, Aliku ALA nen abet aret yegerak me, yokkiragi o.

Kota Yerutalem maluk ariyak yereegerak wone

²¹ Kat o kota aa'nduk noone liirogon mugurok nage nagandak kwe, kwe ya wukak pogom agandak yi, nonggop agan o? Aa'nduk a'me nggelok mban eerit nage, Obeelom mban wonage, eeke nagandak kwe, Yogondak nen aap inooka lombok agandak wonage agandik o.

²² Mbuti perak yi'mbaani kunogo pege, Anggur amburu at mendek mban wonage me niyo inom nenggelak-kenggelak age, Eeke menggi kwak, Kat Yerutalem togop aret agandak wonage agandik o.

²³ Aap karum wonogwe nogo noone ineebi yogwe, It aap kiraaka inom nugwi, It apit aret wone mage yugu kagak wu wogorogwe iinok waganggwi, Wu inambe nggi-nggi agan nugwi, Elege moono inaana'le mbangga'lek mbo piigwi, Kumi togwe inawone liirogon koongga'lek teppiigwi, Eeko agaarik o.

²⁴ Togop me, at Aliku Omaawi Lombok Menggerak Iterali Yeenggwaaraga inogoba Ala nen ari logonet, “A! It ineebi nombakwi nogo nini tayok togon eeppiige, Ninom ogoorak nogo nen eeppanugwi onggo eeppiige, Eerigin o, yinuk,

²⁵ An nen at Yerutalem ena koonogo pege logonet, Ambuti perak yi'mbaani kunik nogo koorogo pege, Mili lenggenak wonage nogo mbeenogo nappege, Eeke logominggirik,

²⁶ Inowak loongga nogo maan aa'nduk aakumi inowak loongga wonogogwa kwak inobaane'me mippiige, Aa'nduk inom wone koonggo nogogwa kwak inobaane'me eeppiige, Eerigin o. Ti eeke neenok, aakumi nen, O Yerutalem ti, Obeelom Eeko Menggam o. Ala Wone Liirogon Mugurok Nogo Menggam o, yinuk, kat yokkogo logogun,” yegerak o.

²⁷ Togop me, it kota Tiyon wonogwe nogo nen Ala wone yugu a'me nggelok eerit nugwi, It inomaluk mbo pemenggaarak nen obeelom mban eekwi, Eekwi iinok, At Aliku ALA nen inagap ndarigin kwe,

²⁸ “Ala wone eeriyak nineebi,” mbaka inom, maluk mban eeka inom, ambugwi aret pup eerogo piige, Aliku ALA mbo pugwi iinok, ineebe lek eerogo piige, Eerigin o.

²⁹ At Aliku ALA nen ari logonet, “At Yerutalem ti, Eyo teno ero aakumi ayuk wuko logorak inikilom mbaremenggerak nogo paga enggali age, Ndi, yabu wogo kugi ake nggomoorogo pemenggerak nogo paga endage maluk age, Eerigin o.

³⁰ Eyo tenoongga teebat age kwak, Yabu wogome niyo amburu lek menggi kwak, At togop aret logogin o.

³¹ At aap omaawi ambik ti, mbumbungga kani ne ambit nengge kwak age, Ndi, at eeke menggerak nogo ti, kani omoonuk tibili'nggin eerogo nagabit nage menggi kwak age, Eerigin o. Imbirak ne ambit wuluk togon nengge me, nogonogo puurak meek aret,” yegerak me, Kat kota Yerutalem yokkigi o.