Yeremiya 49 - Ala Wone Peenok Peebi Mbanak

O Amon eeppuurak wone

¹ It aakumi Amon mendek eeppiyoorak wone yi aret. At Aliku ALA nen ari logonet, “It Iterali inapuri ambi wonogwe lek a? Inogobamini ineyate koloorak ineebe ambi wonogwe lek a? Wonogwe iigak kwe, nonggop nduk, kugi Milikom nen it Nggat mendek inanggween unde eeppunuk wonage, Ndi, it Nggat mendek iname kota-kota at apuri nonggop nduk, ye mbambatinuk wonogwe, Eeko agaarik o?” Yinuk, yegerak.

² “It Amon mendek inawi o kota Araba nogome wim eeriyak noone nggomooriyak eyom panggoni woraagin me, Noone ari neenok, o ti, yigirik-noonom eerogo logonogo pit lagangge, Ndi, enaagan-ambokan yaga'lelo lombok kani nenet nage, Eerigin o. Ti eeke neenok, aakumi nen it Iterali tebembiigo logonet, inanggween unde eekkologogwaarak nogo, Iterali nen it tebenogo piigo logonet, inanggween kolaagun o,” yinuk, Aliku ALA nen aret yegerak o.

³ “O kota Ayi ti, yigirik-noonom eerogo pugun me, It Ketibon mendek ti, leenggu maakwi, O kota Araba aagalogwe komologwe nogo inoone nggwok paga le yogwe, Eeko logowak o! Inagugi Milikom nogo wonok mbo pi nogo logonet, It aap at unde inom, it inom eeka inengga warak inom, inom wogoren mbo piya nagun me, Yum nibinik maluk mendek yippunuk, inale yogo logonet, Nggeeme kumaa'nari nawi, yinuk, lin warit nugu logowak o.

⁴ O Araba aagalogwe wone yugu liirogon eeka'lek wogoppakwi ti, Inanggween kobappaga abu mili lombok wonage nogo paga nonggop nduk, iniki tiyappako agaarik o? Yi mendek ndi mendek ambik wonage paga panggombunuk yogo logonet, Aap ta nen nineebe ninoorigin? Meek aret o, yinuk, yogwe me,

⁵ It yi awi ndi awi inaagan-ambokan wonogwe abok aret nogo nen Inamineeri ne agan noorak mendek inoba kwippiya woraawak nduk, nappiya woraagin o,” yinuk, at Omaawi Lombok Menggerak Aliku inogoba ALA nen yegerak me, yokkiragi o. “Ti eeppiige neenok, it inalitik-inalitak o time nen mugogo wumbiyamenggaarak ambime agak eerit nugwi nogo At ambi nen it kuwak eerogo piyaagin lek aret o.

⁶ Togop kwe, ti'nuk, it Amon mendek ti, aa'nduk wonogogwa kwak eerogo piyaagin o,” yinuk, Aliku ALA nen aret yegerak o.

O Erom eeppuurak wone

⁷ O Erom eeppuurak wone nogo yi aret. At Omaawi Lombok Menggerak Aliku ALA nen ari logonet, “O Erom time iniki warak wonogogwaarak nogo yogondak ambi wonogwe ilik lek a? It aap iniki warak nen wone abe koonogo yorogo menggaarak nogo, ineebe abu lek aret ya? Ndi, iniki warak nen wone koonogo yorogwe nogo iniki apit agaarak ya?

⁸ At Etawu ombowologwe wiganak maluk onggo inoba piige logonet, aaninggin lombok inoba kwippiyaagin me, Kwippiyoorak eyom paga it o Nderan menggaarak ti, Yungguk togon kole mbaganit yugum ambe nggaganak inikime aken time mbet-mbet aret kumaa'nari nawak o.

⁹ Aap anggur anggen mbangga nen wogo logomenggaarik, anggen mbanit nogo logonet, ando pugun nogo lek a? It aap kumaaka nen oonikiya o ambime unggwi wogwe iinok ti, it woorak mbaremenggaarak nogo mban ko'nok nagun nogo lek a?

¹⁰ Togop eeko menggaarak aret kwe, at Etawu paga wiganak perak, An nen inapuri ambi lek we mbiyi-mbeyo eerogo piige, O ambime kumaa'nari nogwe iyo, it kumaa'narit unggwogo menggam abok aret tena'me eerogo pege, Eerigin o. At paga wiganak inom, at owe-awot inom, at inom menggaarak inom, abok aret lek eerogo piyaagin me, At anebunu mendek lek aret arugun o.

¹¹ Inapuri elege-aabologwe moono yumbunik ti perak, nenegen wogonake logogin me, teppiyaawak o. Ndi, inagalomini kumi togwe ti kunduk, iniki an noba panggombuwak o,” yinuk, yegerak me, yokkiragi o.

¹² Aliku ALA nen yegerak nogo yi aret. “It aakumi amburu toolak noorak lek kagak, Nanip, yoragagerak nunggugwaarak me, aakumi Erom mendek ti, it noorak lek teppiyoorak mbako agaarik ya? It teppiyoorak lek ti lek, it togon noorak aret o.

¹³ O kota Mbotara yigirogo piyamenggaarak paga, aakumi nen, Inamineeri ne agan noorak mendek aago yi o, yinuk, yogwe, mbelaappugwi, at endage kumbunuk pulunogo piigwi, eeko logogun o. Ndi, at enaagan-ambokan kota-kota abok aret kunduk yigirik-noonom aago aret mondok-mondok wonage logogin o, yinuk, nendage kumbatinuk, yagi o,” yinuk, Aliku ALA nen aret yegerak me, yokkiragi o.

¹⁴ “O Erom ti, oonda mbanuwak nduk kuwak eekwi, Wim inom namburuwak nduk li'luk eekwi, Eeko logowak o, yinuk, Aakumi inanebunu lombok wonogwe me yora nawak nduk, Nappiyareegerak,” Aliku ALA nen an yo'nege konenggirak nogo ti aret.

¹⁵ Togop me, Aliku ALA nen ari logonet, “An nen aakumi inanebunu lombok inenggela'me at endage abu lek logowak nduk eerogo pege, Aakumi nen at meek eerogo pogo logowak nduk eeppiige, Eerigin o.

¹⁶ Aakumi inaganak waruwak nduk eerogo piige, Iniki wogoppatit nage, eeke nagagerak paga, at aret ambokan lagambatinuk, Yugum eraanu-eraanu me time wonage, puut-puut tiyarogon time unde eeppatinuk wonage, eeke menggerak ti, Towe pen ware kwak at awi tiyarogon wurit wonage kwe, An nen minogo wuppi woraagin o,” yinuk, yegerak me, yokkiragi o.

¹⁷ “O Erom ti, yigirik-noonom eerogo pemenggaarak paga It aakumi tu ti paga nogo logonet, aaninggin-paaninggin oba aremenggerak wonage kenok, Inambe piyak ari, inamineeri ne agan nage, eeko logogun o.

¹⁸ O Torom inom, Nggomora inom, pup eerogo pege logonet, O kota-kota enaagan-ambokan abok aret inom lek eerogo pereegi kwak, It aakumi o time ambi logogun lek ndiimbu-nggwiya mban iname aret logogin o,” yinuk, Aliku ALA nen aret yegerak me, yokkiragi o.

¹⁹ “Singa Yoreran ndirok eyoongga ku'mbanak me nen wundi woraanuk, Ndomba anggenogo omaawi wurik kagak obaga mbo unggwage menggi kwak, An pilak ari logonet, it o Erom wonogwe nogo yini-panip wumbiyaagin o. Wumbiige logominggirik, aap ambi leenogo mippiminggirak wone lengganogo yorage logogin me, Ta nen an nimbirak ndak-ndak me, nimbirak wakkage, Kat ti, nonggop nduk eekendak o? yinuk, ta nen an yo'nege, Ndi, it ndomba ndegeninaka ambi ta nen an eeriyak mbake nogo non mbanogo pege, Eeriyak mbakop? Mondok lek aret,” yegerak o.

²⁰ Togop me, at Aliku ALA nen o Erom eeppuurak koonogo pege, Ndi, it o kota Teman wonogwe nogo eeppiyoorak koonogo piige, Eereegerak yi, Konenggo logonip o. Ndomba aagalogwe kwak it inapuri elege-aabologwe nogo niik eerogo wumbiige, Ndi, it eekwi paga ndomba inagari'ngga nenet nogo menggam kwak, it wonogo menggam time abu maluk eerogo pege, Eerigin o.

²¹ “Tebek yigi o,” yinuk, keekok yogwe paga nggween nuk ari, Le yi-yi wo-wo yogwe nogo, niyo Laut Merah kuli ari nage, Eerigin o.

²² Towe pen ware a'naabit wiganinuk lagi nage, O Mbotara irimbaga taati a'naabit wiga agan nege, Eeke menggi kwak, Aap ti togop eeke kaamunggup o. Eeke ti eyom paga it Erom mendek inawuri ineegin warak ti, Kwe elege enegen paganak yagan wake logonet, iniki lek age menggi kwak, iniki togop aret lek arugun o.

O Ndamitik eeppuurak wone

²³ O Ndamitik eeppuurak wone nogo yi aret. “It Kamat mendek inom, Arapat mendek inom, wone maluk mendek konenggo nagaarik, inenggali age, Iniki a'nggan wo'nage, Yi laut abolok lek wonageelik, ngguk-loguk mban eeke menggi kwak, iniki togop aret wonage, Eeke agaarik o.

²⁴ O Ndamitik nogo omanggen tayok ari, Mbagani, nduk eeremenggerak kwe, iniki ma'nagaarak me, meek age, Kwe elege enegen paganak yagan wake menggi kwak yagan wake, Iniki andi negen wonage, Eeke agaarik o.

²⁵ O kota mondok iya lombok kenok tiyappugwi, ndi, kota an nale'nggen mbake, eekwi nogo Nonggop nduk mbo punuk mbagangga'lek wonogo agaarik o?

²⁶ At aagalogwe wologwe tu nggwok paga kambit nogwe, At awuri ineegin warak nogo ne ti eyom paga inoorogo piinet nogwe, Eerugun abet aret yagi o.

²⁷ O Ndamitik pak wurik an nen kani paarogo pigin me, Kani nenet nage logonet, Aap endagembogut Mben-Karat eebe op logorak awi o nggwok abe wurit nagagerak nogo kani nenet nage logogin o,” yinuk, at Omaawi Lombok Menggerak Aliku ALA nen aret yegerak o.

O Kerat inom, Katot inom, eeppuurak wone

²⁸ O Kerat inom, it Katot mendek inoweewi inendagembogut inabu'me piigo menggam inom, aap Mbaben mendek inowe endagembogut Nebukanetat nen tebenogo piyareegerak wone nogo yi aret. At Aliku ALA nen nen ari logonet, “At nen pilak ari logonet, o Kerat oonda mbani unggwage, It o oonegen lagi wage menggim pa'nggwe wonogwe nogo, lek eerogo piige, Eeruwak o.

²⁹ Eeke logonet, it inawooliya wurik oo'ngget maarak yum tabak inom, inaanggumi ndomba inom, wonok nage, Oo'ngget maaka yum tabak inom, inamindik-inamendek abok aret inom, inaanggumi unta inom, kabologo wagangge, Eeke logonet, Iniki ma'naruwak nduk, Kinaagan-kinambokan kinagabolo nirik-kirik eeriyak mendek kinoba kwi'naga o, yinuk, keekok piyanggaawak o.

³⁰ At aap Mbaben mendek inowe endagembogut Nebukanetat nogo inooriyak nduk wone koonogo pege, Ndi, tebenogo piyaawok nduk, wone amburu mbanogo pege, Eereegerak me, It aakumi o Katot mendek ti, kole mbet-mbet mbaganggwi, Yugum ambe nggaganak aken time kumaa'nari unggwogwe, Eeruwak o,” yinuk, Aliku ALA nen aret yegerak me yokkiragi o.

³¹ “Nit niniki ugun tayenak wonogwe, Niname obeelom mban wonogwe, Mbako logonet, inawi pak wurik ambe paarak aret wonage, It inawi wuppatinuk, inalik mban wonogwe, Eekwi nogo Inawi tebenogo piya ungguwak o,” yinuk, Aliku ALA nen aret yegerak o.

³² “Inaanggumi unta abok kugun waganggwi, Inaanggumi lembu-tapi ambik wonogwe nogo ineengginabut aret waganggwi, eerugun o. Ineeruwak kondogok peenok-peenok mbanggwi ineebe nogo, O wiya yi awi ndi awi warit nage menggim nogome nappiige, It maluk inoba kwi'naruwak nduk, tu andogon-andogon nen nappiya wage, Eerigin o.

³³ O Katot ti, it nggweewo owo kiraarak logowam aret age, O ti, yigirik-noonom aago o wogo mondok-mondok aret wonage, Eerigin me, Aakumi ambiriluk ambi o time logogun lek ndiimbu-nggwiya mban logogun o,” yinuk, Aliku ALA nen aret yegerak me, yokkiragi o.

O Elam eeppuurak wone

³⁴ At Terekiya nogo it Yekura mendek inowe endagembogut a'nuk wone lengganogo awo yorage kagak, Aliku ALA nen o Elam eeppuurak at yoge kagak yoraga Yeremiya yoreegerak nogo yi aret.

³⁵ At Omaawi Lombok Menggerak Aliku ALA nen ari logonet, “It Elam mendek iniki panggombunuk inomaawi menggaarak ineegin nogo, abet aret kalenogo piyaagin o.

³⁶ An nen aakumi Elam mendek wonogwe me o wiya agi-ogu nen, aru-ogwe nen, nappit woraminggirak paga Wogoren agi-ogu, aru-ogwe, mappiyaminggirak aakumi inanebunu lombok wonogwe me time unggwit nagun lek ti lek, abok aret inenggela'me unggwit nogo logogun o.

³⁷ Inawim inowagam wok yi wogwe, ineebe inooriyak nduk muguren wogwe, Eekwi iinok, It aakumi Elam mendek iniki ma'naruwak nduk eeppiige, An nanini kani kunik negen mi'nage logonet, aaninggin alik negen inoba kwippiige, Eerigin o,” yinuk, Aliku ALA nen aret yegerak o. “Wooluwak nen ineebe muguren-magaren eerit ineebe lek eerogo piige,

³⁸ It inowe endagembogut inom, at inom eeka inengga warak inom, ineebe lek eerogo piinok, O Elam time nawone lengganogo yorage logowam aret eerogo pege, Eerigin o,” yinuk, at Aliku ALA nen aret yegerak o.

³⁹ “Togop aret eerigin kwe, peebi o Elam aa'nduk wonagagi kwak eerogo pigin o,” yinuk, at Aliku ALA nen aret yegerak o.