Yeremiya 46 - Ala Wone Peenok Peebi Mbanak

AAKUMI INANEBUNU LOMBOK EEPPIYOORAK WONE (PASAL 46-51) O Metit tebenogo puurak wone

¹ Aakumi inanebunu lombok eeppiyoorak Aliku ALA yoge kagak yoraga Yeremiya yoreegerak nogo yi aret.

² It o Metit mendek eeppiyoorak yereegerak nogo ti, Aap Yotiya aput Yoyakim nogo it Yekura mendek inowe endagembogut a'nuk, wone lengganogo yorage kagak tahun kenagan eeppunuk, ambi eeke paga, aap Mbaben mendek inowe endagembogut Nebukanetat nen it aakumi o Metit mendek inowe endagembogut Pirawun Neko awuri ineegin warak inom o Karekemit niyo Eparat aa'nggi paga taati wonogwe me, tebenogo piyareegerak Pirawun awuri inom eeppiyoorak wone yoragagerak nogo yi aret.

³ “Nggeemu yo'nggok inom, nggeemu mbuulogwe inom, li'luk eeppunuk wim namburi nawak nduk, wundi nawak o.

⁴ It aap kuda paga nugu logonet wim eeka ti, Kwi'nagak kuda inamborowak paga keele maappunuk, kwi'nogwe, Wim eeriyak nduk, inawooluwak engget kenenggwi, Inabetagi omaawi mendek yikkologwe, inombaambile yikkologwe, Eeppunuk, Inawuri inom wim wundi nawam lombok nawak o.

⁵ It iniki ma'nage, inakom niruk nogwe, Inawuri wim eeka wakaa'ngget muk tebenogo piigwi iinok, Inambokan ina logurogon na'naga'lek kole mbaganggwi, Ambime nonggok yagak, ambime nonggok yagak mbaganggwi, Eekwi an nenegen iige ti, Nonggop nduk eeko agaarik o,” yinuk, Aliku ALA nen aret yegerak o.

⁶ “It inogowa ambik nogo kole mbaganit nogwe, It aap wakaa'ngget nogo inagap ndakko'nok mbaganggwi, Eerugun lek aret o. O omarip paga pa'nggwe niyo Eparat aa'nggi paga time aret iniyogobit lik yinuk, ngginnarit nagun o.

⁷ Niyo Nin nen pit agan lagangge kwak pilak ari, Niyo wu'nuk wage logonet, oone, Wo, ari menggi kwak oone agan wage, Eeke yi, ta o?

⁸ Niyo Nin pit agan lagangge kwak, Niyo wu'nuk wage logonet, oone, Wo, ari menggi kwak, Ti, o Metit nogo aret o. At nen, An pilak ari logonet, o nggween yi, tebenogo pege, O kota-kota inom, it aakumi kota-kota wonogwe me inom, lek eerogo piige, Eerigin o, Yinuk, ari agaarik o.

⁹ Togop me, it kuda-kuda ti, perenggola unggwogwe, It nggweendo wim eeka ti, nggaruk togon nonggok yi unggwogwe, It aap wim eeka inanggeemu ineenggime wonogwe Kuti mendek inom, Put mendek inom, ti, wim eeri unggwogwe, It ineegin wuppunuk wonogwe aap Liriya mendek ti, wim eeri unggwogwe, Eeko logowak o.

¹⁰ Ti eeriyak eyom nogo ti, Aliku ALA nen awim onggo eeppiyoorak aret o. Awim onggo eeppiyoorak aret me, At Omaawi Lombok Menggerak Aliku ALA onggo eeppiyoorak ake punik aret o. At Omaawi Lombok Menggerak ninogoba Aliku ALA nen O omarip paga pa'nggwe niyo Eparat aa'nggi paga taati ndomba warogo wogogwi kwak awim ineebe inoorit nagin me, Awooluwak awo ndonggoppega'lek kagak nenet mban nage, Inamiya ndonggoppanegi o, yaga'lek inoorit mban nage, Eeke logogin o.

¹¹ O Metit Aagalukwe Aap Kigin Waka'lek ti, O Nggileyat nage logomenggerik, andi kenok, amburu eeppiiga wa namenggerak kwe, Obeelom eerigin lek me, andi lek eeriyak nduk kwaarit nege ti, we aanom warogo kwaarit nege agaarik o.

¹² At maluk eerogo pegaarak nogo aakumi inanebunu lombok nen inaruk konenggaarak o. At kwa ari nogo o nggween paga abok ndak warit nage, It aap wim eeka it-it iniyogobit lin-lin yogo logonet, nggween paga ngginnarit nogwe, eekaarak o,” yinuk, yegerak me, yagi o.

Nebukanetat woroorak yereegerak wone

¹³ It Mbaben mendek inowe endagembogut Nebukanetat nen o Metit tebenogo piya woroorak wone Aliku ALA yoge kagak yoraga Yeremiya yoreegerak nogo yi aret.

¹⁴ “It aakumi o Metit wonogwe nogo yorage, It o Migiron wonogwe nogo yorage, It o Membit wonogwe inom, o Tapanaket wonogwe inom, yorage, Eeke logorak nogo yi aret. Aakumi it inaagan-inambokan wonogwe ti, wooluwak paga ineebe nenet nagin me, ineegin-inawooluwak woppunuk, Wim eeri nawam lombok arit nawak o.

¹⁵ It inagugi wakaa'ngget endage Apit ti, nonggop nduk mbaganggi? Naliku ALA nen tebenogo pigirak me, it inagugi tapi ngguunok ogut eerak ti, Omaawi lek me, puk arulik kole mbaganggi o.

¹⁶ It ineegin warak nogo iniyogobit lin-lin ngginnarit nogo logonet, Nit yogobi eeppinanit nage me, it tebenogo pinaniyak mbakwi nen inawooluwak paga ninookwi iyo, Ninagap ndakko'nok ninowe-ninawot wonogwe me, ninamulok paga nawok o, yinuk, yogo agaarik o.

¹⁷ Iname nanuk wonogo logonet, It Metit mendek inowe endagembogut Pirawun ti, Op eeppinaniyak nanonggwan kagak we oone mban agan nega at aret, yogo logogun,” yegerak o.

¹⁸ At endagembogut endage Omaawi Lombok Menggerak Aliku ALA nen ari logonet, “Yi puut ndi puut enggela'me puut Tabot menggi kwak, Niyo kole yenggenak laut ambet paga puut Karemen menggi kwak, At ayuk warak ambi togop aret ari woraagin o, yinuk, an mondok neenik minggirak nendage kumbunuk yagi o.

¹⁹ Togop me, o Membit maluk eerogo pege, Kani nenet nage logonet, o yigirik-noonom eerogo pemenggerak paga aakumi ambi wonogwe lek o wogo aret wonage, Eerigin me, It o Metit wonogo menggaarak ti, Kugun wogoren nagun me, inamindik-inamendek pipuk eerogo pako logowak o.

²⁰ O Metit ti, lembu awo ngget ndarak eeruwak amuni mbanak kwak wonage kwe, Ti'neebon ambi o omarip paga pa'nggwe nen at owagam woraagin o.

²¹ Wage kenok, it Metit mendek inawuri aap ineegin warak onggo kolaga inom wonogwe ti, lembu aagalogwe inamok ambik mengga kwak wonogwe me, It onggo eeppiyoorak eyom panggoni wage, Aaninggin inoba piyoorak ne nogo ari wage, eerigin me, It ko wappunuk puk arugun lek ambugwi aret kole mbaganit nagun o.

²² Inawim ineebe apit aago inoori wogwe iinok, Waalo oone tiip-mbup agan mbagangge menggi kwak it Metit mendek inoone togop aret agan mbaganggwi iigak, Ye mbuti paga eyo muurit nogo mengga kwak, it Metit tebenogo puwok nduk, inaye wonok wogwe,

²³ At eyoongga ku'mbanak kagak muurogo pit unggwogwe, Eerugun, yegerak o. Inawuri ineegin warak wogwe nogo ti, aap ineenggi lingginiyak abu meek wurin aago kwak woraagun o.

²⁴ O Metit Aagalukwe kwak, it Metit mendek ti, aakumi o omarip paga pa'nggwe nen wogwe nogo ineenggime piyaagin me, inenggali arugun o,” yinuk, Aliku ALA nen aret yegerak o.

²⁵ At Omaawi Lombok Menggerak Iterali inogoba Aliku Ala nen ari logonet, “It o Tebe mendek inagugi Amon nogo inom, at Pirawun inom, o Metit wonogwe inom, it inagugi inom, it inoweewi inendagembogut inom, it aap Pirawun paga panggombunuk wonogwe nogo inom, abok aret maluk onggo aaninggin inoba piyaakit nduk eeke agarik o.

²⁶ It aap ti, inooriyak eekwi o Mbaben mendek inowe endagembogut Nebukanetat inom, awuri inom eeka inom, ineenggime piyaagin kwe, aakumi o Metit aa'nduk wonogogwa kwak, peebi togop aret wonogo logogun o,” yinuk, Aliku ALA nen aret yegerak o.

²⁷ “Togop me, at nayeloman Yakup paga wiganak ti, inagabiti mbakwi, Ndi, at Iterali paga ndarak ti, inaganak wakwi, Eerugwaarik o. An o nda nen it inagap ndarogo piya wage, At paga wiganak wogoren mbo piya nogogwam nen iniyokan wogoren piya wage, Aa'nduk iniki ugun tayenak inale'nggen paga wonogogwa kwak eerogo piige, Eerigin me, Iniki ma'nariyak mendek ambi inoba arigin lek aret o.

²⁸ At nayeloman Yakup paga wiganak ti, ninom logogin me, inagabiti mbarugwaarik o. Tak-mak eerogo yi aakumi ndi aakumi wonogo menggam inenggela'me It Yakup mendek nappiinet naminggirak logowam nogome ineebe lek eerogo piyaagin kwe, It perak, lek eerogo piyaagin lek o. Eerit nogo nogogwaarak onggo aaninggin inoba piyaagin lek ti lek, eeppiyaagin aret me, Iniki koonnaruwak nduk, eeppiige ti, eekaarak ndak-ndak aret eerogo piige logogin o,” yinuk, Aliku ALA nen aret yegerak me yokkiragi o.